行山遇到三條女（少甜）: 新同事篇2

話咁快就去到午市，有Irene同李可嵐依兩個生招牌真係吸引到好多客源，根本就做唔切。

但係李可嵐既業務能力真係勁，啲收銀，送餐，迎賓工作，全部都做。

怪唔之得，老闆娘叫我地安心休息啦，一個頂十個既。又靚又女強人，高攀唔起呀。

完左午市之後，我地就係度圍爐食飯，Irene唔知點解就狂咁餵我食野，一食完就餵咁，搞到我成個bb咁，不過我都明佢係係度宣洩主權。

但係人地李可嵐根本一眼都無望過我地，只係係度自己一個粒聲都無出咁食飯。



佢好快就食完野，講左句「我食完啦」，就去返準備工作。

真係一個好難觸摸既人呀。

我係一個好鐘意新鮮感既人，返工既日子真係好枯燥，諗住有個新同事，可以識下新朋友調劑下，點知咁冷漠:-(。

返到去工作之後，又辛苦左一大輪，終於就完左夜市。

我就入左廚房又學下藝咁，老細教啲餸好似無窮無盡咁，教咁多日都仲有貨仔。



今日就用左啲剩菜煮左個羅勒風味海瓜子蛤蜊義大利寬麵，我學左咁多日，廚藝都長進不少，同老細煮既賣相都幾相似下。

今日老細就攞左我煮啲野同佢嗰啲出去。

出到去，就見到老闆娘佢哋三個就坐係到等我地。

老細就講「依到有一碟係浩然煮既，一碟係我煮既，你地食下睇下邊個煮得好食啲。」

然後，佢哋每人都食左啲，再同一時間指向同一碟，我都唔記得邊碟係我架啦，唯有等老細講啦。



老闆娘就點評話「依碟既醬汁適中，麵條既軟硬都煮得好好，條條都分明有理，所以我揀依個。」

Irene就講「兩碟不相伯仲，我食起上黎都係差唔多，但係好似依碟個味道好似大眾化啲。」

最後，可嵐側一側個頭講「我唔係太識點評，但真係好好味，好有一種家既味道。」

老細都發聲講「好啦，大家都覺得好食既依碟菜就係.......浩然煮架啦。」

Irene同老闆娘都用住贊嘆既眼神望住我，可嵐就好驚訝咁望住我，好似講竟然係你咁。

老細就繼續講「好啦浩然，你出師啦，得閑就入廚房幫手煮下野啦。」

我就答老細「好既」

之後，我地就一齊食埋啲晚飯，就走左返屋企。



我同Irene就一齊行，拖住手，享受住依十幾分鐘既二人時光。

Irene就問「點呀，今日辛唔辛苦呀。」

我就講「ok啦，個李可嵐咁勁，我地都唔使做野咁。」

Irene就講「係囉，有車啦，唔講啦，聽日見啦。」

然後，我就自己一個行返去黃大仙，係途中就見到個李可嵐，我就鼓起勇氣上左上去打招呼「喂，hello，你都係住黃大仙架」

佢望左我一眼，之後答我「係」

我又再問佢「咁你住邊架」



佢就答我「黃大仙」

笑死我啦，忍唔住露出左微微笑容，但係佢就無理我，搞到我有啲尷尬添，然後成個場面就凍結哂。

去到黃大仙，佢就閃閃縮縮咁講「你今日啲野食真係好好味呀，拜拜」

我就講「拜拜」今次真係佢對我講得最長既說話呀。

等我去接一接芷晴放工先。