行山遇到三條女(少甜): 事情曝光篇2
我就一路拉到佢去舖外面無咩人既地方,「你拉到我好痛呀,放手呀。」
我就放開左佢隻手「芷晴,你可唔可以冷靜啲聽我講呀。」
芷晴聽到之後,就擰轉面,但係就無走到。
咁我就繼續講,橫掂遲早有一日都會發現,我都唔多作隱瞞啲咩啦「今日朝早我同Irene一齊上左...」
芷晴突然擰返轉個頭過黎,眼睛開始變得通紅。揮手用力咁拍左落我塊面到。
其實真係避到,但係真係有種有心無力既感覺,可能因為自責,或者係等芷晴打一打,自己個心會好過啲。去到尾我都係自私既產物。
「啪」一聲響亮出現係我塊面到,我感覺到我塊面好火辣辣,應該有一個紅紅既手掌印,好痛好真實。
但芷晴無走到,好似等我繼續講咁。
我就繼續講「山頂,同埋Irene佢同我一齊左」
又另一巴打係同一邊面到「啪」,痛上加痛。
然後,芷晴就喊住咁走左。
依啲時間追定唔追呀,梗係追啦,唔好聽埋哂啲咩過左陣啖氣消左就無野依啲on9野呀。
我就一路跟住佢,但係又唔敢上去,佢都無望過去後面,一直去到的士站旁邊就截左部的士走左。
我都唔知點做好,唯有跟住佢番黃大仙啦,真係好驚佢一陣做傻事呀。
去到黃大仙,就見到佢落左車,我都係唔敢上去,你話我點解,我都唔識講,就係一道力場,一種阻力,我唯有默默咁跟住佢。
佢搭𨋢,我就行樓梯,望住佢入去間屋到,我都無做任何既舉動。
我就趴喺芷晴屋企門口,我都唔知佢係入面會做啲咩,割脈?跳樓?開煤氣?我係出面愈諗就愈驚。
我嘗試拍門「芷晴可唔可以開一開門呀」,但係佢都無應我,「應下我得唔得呀」
拍到啲鄰居都出哂黎屌我,「咪撚嘈得唔得呀」。
芷晴就sent左個message俾我「唔好煩我」至少都知道芷晴無事,咁我都放心啲。
但係我都繼續係門口坐住係度,睇下message咁,就見到老細老闆娘仲有可嵐都有問我有無事。
老細就好簡單一句「無事嘛浩然」
老闆娘就長篇大論咁同我講唔好一腳踏兩船,處理好啲感情,教訓下我咁,到最後都有關心下我咁,睇到都幾窩心。
而可嵐就同我講「唔好意思呀浩然,今日我同芷晴佢哋講野既時候,唔小心講漏囗,講左你今朝無返黎呀,希望你同芷晴無事啦。」
屌,果然係佢,不過都唔怪得人既,有啲野做左,人地配合你係人情,唔配合你係道理,有錯既係自己,怪得邊個啊。
我就繼續坐係度無所事事咁,坐下坐下已經成八點幾啦。「叮」電話又響。
Irene就message我講「芷晴一陣九點約左我係你地樓下公園等呀,你係咪被人踢爆左呀」
我:「係呀」
然後,Irene就無再覆我啦,芷晴約Irene出黎做咩呢,一陣都係匿埋靜觀其變先。