行山遇到三條女（少甜）: 事情曝光篇3

我就靜靜咁匿埋係防煙門到，等待住芷晴出黎，依一刻真係好似嗰啲咩尾隨，跟蹤痴漢咁。

去到八點九左右，芷晴就好小心咁開左橦門，睇清楚我走左之後，就開埋鐵閘。

我隔住防煙門既小窗口，離遠都可以睇到芷晴既憔悴，佢應該係入面都喊左幾耐，隻眼都腫哂，睇到個心真係好痛。

佢關左橦門之後，就行左過黎搭𨋢，我就即時踎低番。

然後，就行樓梯落去地下。



去到地下既同時，芷晴都到左地下，我就一路偷偷摸摸咁跟住佢，近距離睇佢，可以確定佢無帶刀，至少保証一陣唔會有命案發生先。

我好好小心咁一步步跟住佢，佢一望後面，我就即刻匿埋。

無幾耐就到左公園，Irene都好準時咁到左公園，然後就靜靜咁坐係度。

芷晴就行左過去，Irene見到芷晴過到黎就起左身。

但芷晴咩都無講，直接展示剛才對我所做既姿勢，就係揮手一巴掌。



我見到佢舉手嗰刻，我已經衝左過去，但係你真係以為我係保特咩，邊有咁快呀，最後只可以眼睜睜睇住芷晴一巴打係Irene既臉上「啪」清脆一聲。

Irene就好不知所措咁望住芷晴，摸住自己塊面，眼發淚光咁慢慢癱軟係公園既櫈到。

我就即刻上前分開左芷晴，佢仲不停有意慾想打Irene，我就不停咁細細力推開佢。

過左一陣，佢發覺唔夠我大力，就轉移目標去我到，不停咁打我，一拳又一拳咁打我，拳拳到肉。
但真係身黎既痛都不如心黎既痛，真係好想喊。

但係因為自己一腳踏兩船，被人發現左，之後覺得後悔，害怕失去，咁賤格既男人，真係有資格喊咩。



芷晴可能打到無力，或者覺得無力感，就踎低咗係度喊，一路就講「點解..你..死都要..幫佢呀，你一直...就為左..佢，你究竟..有無鐘意...過我架。」

我都踎低左，環抱住佢講「有呀，我由一開始的確係鐘意Irene，但係我慢慢同你一點一滴咁相處落黎，我發覺自己真係鐘意左你。

然後就同左你一齊，我地生活得好開心，我每分每秒都想有你既身影，同你一齊，我行街煲劇行山，我任何時候都好開心，因為你俾到關懷關心我，種感覺真係好溫暖。

你仲記唔記得當初啲黑警想搞你既時候呀，我嗰時係幾咁驚，好驚你會受傷害呀，我就咩都無理，直接上去擋住個黑警呀，因為咩呀，因為我鐘意你，想關心你，呵護你呀。

但係同時間，我都鐘意左Irene，我明知你地係朋友，點解我要咁犯賤，同一邊分手唔好，因為我愛你地，我失去其中一邊都唔得呀。」

芷晴聽完之後，成個身就震一震，緩緩咁鬆開我既懷抱，同時開始慢慢停止左哭泣聲。

應該開始冷靜左落黎，默不作聲咁坐左係Irene旁邊，Irene都係我講野既時候慢慢停止臉上既傷痛。



佢就揮手示意我走，我就擺左個ok手勢問佢o唔ok，佢就擺左個ok。

我又擺左個大叫既手勢，叫佢有咩事大叫。佢又話ok。

希望girls talk真係有用啦。

我就去到個轉角位到，靜觀其變，聽唔到佢哋講咩既同時，萬一佢哋打起身，都可以及時去阻止。