行山遇到三條女（少甜）: 事情曝光篇4

佢哋大家都好平心靜氣咁講野，無我諗既打架出現。

我就不停咁望住佢哋既一舉一動，Irene要面對住芷晴講野，所以就背對住我，同時就搞到我淨係睇到芷晴既表情。

佢由一開始既沉重，去到面色凝重咁攬住咗Irene，又係度喊，眼紅紅咁。之後又再點一點頭。

再講左陣芷晴就走左，我一見佢走左，我就追上去。

點知中途Irene就行左過黎攔住咗我「唔使追啦，俾佢冷靜下算啦。」



我就停低左無再追講「傾成點呀」

Irene就貼近左係我耳仔邊到講「唔話你知喎」然後就調皮咁笑一笑，真係呀。

我就繼續講「我見你地又攬埋一舊，又喊哂囗咁，無野呀嘛。」

Irene:「無野呀，唔係喎，你條粉腸呀，偷睇我地」然後就打左我幾下手臂。

我:「屌你，咪打啦，痛呀」我就扮到真係好痛既表情。



Irene就停低左手，好關心咁望我個身講「點呀，無事呀嘛」

見到佢咁關心我，真係開心呀「無事呀，你呢，頭先芷晴打得你痛唔痛呀。」我摸一摸佢塊面。

Irene就有啲怕羞咁推開我隻手講「無事啦，都夜啦，我返屋企先啦」

我:「好呀，我送你啦」

我就拖住佢隻手，慢慢咁行去巴士站。



真係唔知佢哋傾成點，是好是壞，我都唔知，真係好疑惑，好迷惘，好驚失去。擁有既野愈多，你失去既野就會愈多。只能希望唔係今日跌落神枱。

我去到巴士站，十點鐘既黃大仙已經變成人煙稀少，成個巴士站已經得返我同Irene係到等。

我:「係喎，上次我同芷晴去下白泥呢，又撞到對夫婦喎。」

Irene:「又會咁啱得咁橋既，咁點呀又踢爆左呀。」

我:「係呀，但係當時我都未同你一齊，咪諗住可以暪天過海囉，點知都係咁，不過依啲野都係無得呃架啦。」

Irene忽然望住天空講「呃得一陣就得，唔通呃到一世咩，有車啦唔講啦。拜拜。」

我:「拜拜Irenebb」第一次叫佢bb呀。

佢就係架車上面淺淺一笑，狂咁揮手同我講拜拜。



係喎，我未食飯喎，芷晴其實都可能未食飯，我一直係佢門口，點會唔知佢食左飯未呀，不過都係算啦，Irene話俾佢休息下咁就休息下啦。

我就自己一個返到屋企食杯麵算，一個人真係懶得煮飯。

食完之後，就沉沉咁瞓左落張床到，今日真係好攰呀。