行山遇到三條女（少甜）: 不快樂時光篇5

我整裝待發就去到海濱到，係度等左陣老細就黎左，佢手執十幾樽啤酒，身穿牛仔褸，同平時啲mk仔無咩分別。

我:「嘩老細，你咁靚仔呀」

老細:「好耐無黎過，咪執靚下自己囉，行囉」

我地就搵左係海邊既樓梯囗到飲，好似兩父子，又似兩兄弟咁一枝一枝咁飲，不停咁酒入舌出，敞開心扉。我就講述哂所有大大小小既事俾佢聽。

我:「老細，你..覺得..Irene同...芷晴點..呀」



老細:「兩個都好好，Irene就善解人意，芷晴就體貼入微，得一個人係衰。」

我:「邊...個呀」

老細:「你囉，仆街仔，一個就係為左你唔好唔開心，先唔同你講，等你開心，佢就感受住時間倒數，痛苦佢受哂。

一個俾你同其他女仔拍拖，條女走左，你仲要牽腸掛肚，仲要用其他女仔黎幫你安撫情傷，你仲要趕走人，真係傷到爆呀。我唔係當你係我仔咁，我真係打撚死你呀。」

其實我事後已經諗到，但係就無所覺悟，但等完老細講完，我就發現到自己既錯處，真係好失敗，好慚愧呀。



我:「今日..芷晴有無返..呀」

老細:「有呀」

我:「咁佢點呀」

老細:「前幾日都唔開心架啦，依架仲無心機做野，送錯野俾啲客囉，魂不守舍咁，原本以為佢姨媽到，依架知咩事啦。」又望左我一眼。

我:「唉，我都..唔知...呀，其實我..係咪真係愛..佢，我..都唔知。」



老細:「你講下你一開始對佢既感覺呀」

我:「見到佢...好靚，好..可憐，好想...照顧佢..囉」

老細:「你依架仲有無依種感覺呀」

我:「有呀，我都係好...想同佢一齊，照顧...佢，日日見...到佢。」

老細:「咁你又趕佢走」

我有啲尷尬咁講「咁..我當時..想要..啲私人..空間呀嘛」

老細不屑咁講「自私撚，咁如果係芷晴走左移民左呢」

我諗左諗就答「一模一樣，我個心..一定同樣...咁傷咁痛，失去佢哋兩...個邊個我...都係咁」



老細:「真係？」

我:「我呃..你做咩...姐」

老細:「咁我信你啦，你係仆街啲，但起碼係真係鐘意佢哋，你以後對人好啲啦，唔好諗Irene啦，老婆奪命追魂call，我走先啦」

我唞左陣，就返返黃大仙，我望一望芷晴橦樓，就諗住趁住酒醉同芷晴講下野，就搭電梯上去左去。