行山遇到三條女（少甜）: 重燃篇6

我哋再玩左陣之後，老人院就搞咗個活動叫「老人長駐心」不過都係我地同其他職員同啲老人家傾吓計咁。

我就咁岩得咁橋同返頭先個伯伯一組，單對單咁傾偈，我就搬咗啲櫈去旁邊坐低同佢傾偈。

坐低咗之後，伯伯就問我「點啊世姪頭先冇嬲吖嘛。」

我：「我點會嬲伯伯你姐，頭先仲幫我同大家融洽左添」

伯伯：「原來你都知架喎。」



我：「梗係啦」

伯伯：「係呢，你同芷晴點識架。」

我：「我哋行山識架，我同啲朋友去行山，咁啱佢同佢啲朋友唔識路問我地，我地就相識到依架啦，最後我就同左芷晴一齊啦。」

伯伯：「真係咁啱都有既，依啲真係緣份黎。」

我：「係囉，真係個天對我好呀」



伯伯：「你識到芷晴真係你好彩呀，你以後好好對芷晴呀知唔知呀」

我：「知道」

伯伯：「見到你同芷晴咁開心就得啦，你知唔佢細個既時候，都無咁開心架，依架同你一齊感覺上成個人都唔同哂，同我細個嗰陣拍拖既時候一模一樣，成個人都陽光煥發左」

俾伯伯咁講一講，我成個人都變到沾沾自喜咁，但都無話太表露出黎「邊係呢」同時就轉一轉話題問伯伯「係呢伯伯，你不如講下你啲情史。」

伯伯：「你想聽我就講一講啦。我拍拖就唔多係得一次姐，但就好刻骨銘心既。



我細個做行船啦，就四圍去啦，五湖四海都去齊，有次就去到英國啦，就識左個外國女仔，我雖然唔知佢點解鐘意我啦，但係就順理成章一齊左，每個月去英國都同佢一齊，幾咁開心寫意呀。

正當我以爲事情會一直咁樣開開心心咁落去既時候，佢就就咁無聲無息咁消失左，你知架啦，以前無手機既年代，淨係可以係人地屋企搵佢，結果佢粒聲都無出就咁走左，無辦法搵到佢，我就淨係可以忘記佢。

直到依架我都係無結婚，就係一直等緊佢，但係隔左成個大海再見到既機會究竟有幾大呢。所以你同芷晴一齊咁好，真係要好好珍惜呀。」

聽完之後，我第一時間諗到既係Irene，經歷都係咁相似，無聲無息咁離開，你還過得好嗎。眼睛不禁又泛起顆顆淚珠。「喂世侄，我喊就話啫，你又喊乜野呀。」

我：「無野呀，替你感動姐」

芷晴過左黎講：「都差唔多閂門啦，我地走先啦，拜拜林伯。」「拜拜」

我一路係路上就思考，得一係咪就唔可以想二，我要一樣野，係咪就一定要放棄另一樣野呢，依條究竟係選擇題定多項選擇題呢。