［真人真事改篇］《有一種鍾意，係我鍾意你鍾意我。》/《初戀1000天》: 第十二章上 「無言共對 感覺變壞告吹 就算登對 心裡面各自在想誰 問我怎可愛下去」 〈拖泥帶水〉

https://www.youtube.com/watch?v=5XNd3IX-TAA
第十二章上
「喂，Jessie，有人搵你呀。」彷彿坐在這裏整天就是為了等這句話，Jessie聽到後，馬上跑到課室門前。

可惜，眼前人卻不是她預期的他。



「你做緊功課呀？咁耐先出黎嘅。」Jonathan問道。

「係呀，英文又有Reading，無咗你坐我隔離無得抄，咪唯有自己做。」Jessie微笑道，「係呢，你黎搵我做咩？」

「無呀，啱啱Miss Lui問我參唔參加依個比賽，其實好似做IES咁，只係探討嘅係現時嘅網絡問題，贏咗可以去新加坡嘅大學發表演講，費用全免。我見幾吸引，就應承咗，但佢要三個人一隊，想黎問下你有無興趣姐。」Jonathan把活動的海報和報名表格遞到Jessie手上。

「新加坡咁正，我咁大個都未去過邊度旅行，有得去就好啦。」想到可以出國，本來揮之不去的煩惱頓時被Jessie拋諸腦後，「不過新加坡你唔係去過啦咩？我記得你F.2嗰年暑假好似係去新加坡架，返到黎仲係咁同我講有幾好玩添。」

「咁唔洗錢去唔同架嘛，仲有得去新加坡國立大學交流喎，旅行邊去到。」



「咁又係。」Jessie仔細地閱讀那份閱讀海報說。

「一係你睇完考慮下，有興趣Join再話我知。」當Jonathan準備走的時候，Jessie竟爽快地回答道：「唔洗考慮啦，你介紹得都唔會伏架啦，Join囉。」

「真係？咁爽快？」Jonathan難以置信地問道。

「家下揀老公咩？就算輸咗都唔會點，贏咗反而有得去新加坡交流喎，唔洗諗啦。幾時要交Form？」Jessie從裙袋掏出一枝筆，挨着大門開始填起報名表。

「但我地要搵多個人先夠人，你想搵邊個？」



「你想呢？」Jessie正專心地填表格，暫時無遐細想這問題。

「你話事呀，我都OK。」

「Joey？佢應該都會有興趣。」

還未升上高中，Joey的好友Tina已退了學，只剩Joey獨自升上這一個熟人都沒有的精英班，加上那次露營的通宵夜話，很自然地，便和朋友同樣不多的Jessie成了朋友。

像是相逢恨晚的一對摯友，不論甚麼話題她們都能聊上半天，漸漸地，Joey甚至取代了Andy，成了Jessie最好的朋友。

「好呀，咁你問埋佢，填完表拎過黎比我，我交比Miss Lui。」Jonathan說。

「好呀，希望我地贏到個比賽，一齊去新加坡啦，聽講新加坡有好多好野食。」

咖央多士、叻沙、海南雞飯、榴蓮⋯⋯新加坡的美食已爭相在Jessie腦海浮現。



看到Jessie快流出來的口水，Jonathan忍不住笑了，說：「唔好咁快諗新加坡住，係去到之前我地有大把Research要做。」

「有你係到，唔洗驚啦。」Jessie說。

想起以往每次的小組報告，只要有Jonathan在，都能取得好成績，Jessie便感到安心。

「咁信得過我，到時去唔到唔好賴我呀。」

「唔會嘅！」

「好啦，我返番去做莊務先。呀，係啦，爭啲唔記得講，下個星期五就要交份Proposal比個機構，今個星期六，我地返完Part-time之後傾？」

James的生日快到了，剛巧他最喜歡的周杰倫要來香港開演唱會，Jessie很想把演唱會的門票送給他作聖誕禮物。雖然門票不算得貴，可對還未有工作能力的Jessie來說卻是價值不菲。



家境並不富俗的她唯一想到的辦法就是：做兼職。

剛巧，這時候Jonathan來問她有沒有興趣去他工作的快餐店上班，她便一口答應了。

「好呀，我問下Joey嗰日得唔得閒先，放學答你。」

下課後，Jessie和Joey來到Jonathan的班房，把剛才的報名表格交到他的手上。

「咁快填好啦？」Jonathan問道，拿着書包的他正準備離開。

「填個名有幾難姐，Joey話佢星期六都得，但我地去邊傾？」Jessie問道。

「Foodcourt？」Jonathan問道。

「要做Research喎，Foodcourt邊有電腦。」



「咁⋯⋯不如去你屋企？」Joey看着Jonathan提議道。

Jonathan頓時面有難色，因為他從來沒有帶過朋友上他的家，也不願帶人回去，像是赤條條地現身於人前一樣，讓他感到沒安全感。

「um……但我屋企又亂又多人，定去你屋企呀？」Jonathan嘗試找一個好看一點的藉口。

「不如咁啦，反正個Project都有排傾，一人屋企一次，我貢獻我屋企先啦，下次到你地。」Jessie說。

「好，成交。」凡事講求公平的Joey馬上附和道。

「好啦咁，」儘管Jonathan百般不情願，可主動提議參加比賽的是他，只好勉強答應，續說：「咁我去交Form先啦，星期六見。」

「一齊行呀，我都要去搵Miss Chan搞埋社啲野。」說罷，Jonathan和Joey便離開了。



雖然已經下課，倘大的課室竟還有不少人，趕功課的趕功課，聊天的聊天，比起放學更像是在放小息。

James也不例外，正和Hannah、Kelly她們聊得興起，滿臉笑容。

今日唔洗Re-quiz咩，仲咁得閒係到傾偈⋯⋯Jessie心想。

「你搵James呀？」Lemon走到門前問道。

「呃⋯⋯算係掛。」Jessie說，沒想過Lemon會走過來。

「James，Jessie搵你呀。」Lemon大喊道。

聽到Lemon的話，James才把注意力從Hannah身上分出來，施予Jessie，不情願地走到門口，問道：「做咩？」

「你今日唔洗Re-quiz咩？」Jessie問道。

「無心情，唔Re啦。」

「咁我地一齊放學？」Jessie問道。

自從升上高中後，他們便很久沒有一起放學了，James最近甚至好一段時間都再沒拿着雞蛋仔接她放學，或是主動打給她。

敏銳的直覺告訴她，一定發生了些甚麼，可是她又說不出確實的原因，只好來逮James放學，直接問個清楚。

「唔啦，我約咗Lemon同Hannah佢地去食Tea。」James冷淡地說。

「我地都好耐無食Tea啦。」Jessie說。

你搵Jonathan食囉，James心想，卻說不出這樣充滿醋意的話，改口道：「下次先。」

「你最近好似有啲唔同。」

「係咩？」

「你⋯⋯唔開心？」jessie試探地問道。

「無。」James說。

「真係？」如此冷漠的James和平日熟悉的他判若兩人，Jessie不相信他的話。

Jessie想要從James的眼睛找到答案，他卻低着頭看着地板，使人無法從他的臉讀取任何信息。

「係呀。」

「真係唔同我去食？」Jessie又問了一遍，「我想食芒果鮮奶燉蛋呀，最多⋯⋯我請你呀，我最近返Part-time賺到錢。」

「唔想食。」

Jessie從來都不會主動約人，所以不知不覺間，便和初中的好友Chloe、Andy疏遠了，唯獨James是唯一一個她還會主動找的人，因為她知道他從不會拒絕她。

可是，今天的他卻不同了，他甚至連眼角的餘光也吝嗇，看都不看她一眼。

既然如此，她為甚麼還要熱臉貼冷屁股？

「咁算啦，你地食得開心啲，記得送埋人返屋企先好走。」

那夜James送Hannah回家時，Hannah拍下了他的背影，還附上一句：同是天涯淪落人，Post 在IG的Story裏。為了這件事，Jessie已氣了好幾天，剛巧這段時間James都沒找自己，她也就沒有提，時間一久，便漸漸消氣了。

可面對這樣冷漠又別扭的James，新仇舊恨突然一湧而至，沖昏了Jessie的頭腦。

「你⋯⋯」James還未來得及反擊，Jessie便頭也不回地走了。

「Jessie做咩嬲爆爆咁走咗，你地鬧交呀？」Lemon問道。

「關你咩事？」James瞪了Lemon一眼，徑自走回自己的座位，遠看已能感受他那股怒氣。