【青春純愛+靈異】收音機裡的情人: 第十九章：催眠

--------
會客室內，牆紙雖然因滲水而變得破爛，但房間中心仍有一張簇新的辦公桌，而大師就坐上皮椅，帶上耳筒。

 「昕昕，我係嚟幫你㗎，我已經叫你個朋友唔好入嚟呢間房，佢唔會聽到你講嘢㗎喇。」外貌穩重的大師不知爲何予人一種可信的感覺。 

保險起見，我還是不說話好了。 

「您想唔想用真身同呀謙見面？我知你都係覺得自己同佢係唔同世界嘅人，所以先特登避開佢嘅。定係你好擔心自己會失去佢呢個唯一嘅朋友，抑或係情人？」他那懾人的眼神爲何能夠一眼看穿別人的心思？實在是太恐怖了。 

「你......點解會知？」我戰戰兢兢的回答。 



「經驗啩。不過我都好耐冇見過好似你呢種情況咁有趣嘅客人喇。放心啦，你有咩都可以同我傾訴㗎。我可以幫到你同呀謙見面，到時你哋就唔使受呢個收音機所限。」

 「我要點樣做？有得掂下佢我就已經夠㗎喇！」雖然大家人鬼殊途，永遠都不會有未來，但脫離收音機總比困在這個無人的空間好，至少能自由的陪在呀謙身旁。

 「我想聽吓你未困喺呢個收音機嗰時嘅經歷。如果你覺得唔舒服嘅，或者我都可以用催眠嘅方法令到你舒服啲。」他平和的說。 

「但......我唔係好記得以前嘅事喇喎！」每次一回想起往事時，腦袋總會一片空白，伴隨着痛不欲生的頭痛。 

「咁你應該要催眠先得。你宜家合埋眼，聽住我講嘅嘢。」我也想嘗試催眠是否能讓人心曠神怡，放開一切。 



「你而家喺一個一望無際嘅草原上，天色漸暗，成個天空滿佈繁星，唯獨是有一粒特別閃，特別大粒，仲要不斷遠離你。」 他的話語猶如有特殊的魔力般把我吸到那個只有繁星，沒有煩惱的世界。

 「你追住嗰粒星跑呀跑，跑入你間房到。檯面上除咗有部收音機之外仲有啲咩？」 我遊走在這間熟悉的房間，看着雜亂無章的書桌上全是文具，試卷的物體，書桌一旁就有一些雜物如照片框，瓶子等。 

「我見到好多好多嘅DSE mock 卷，有啲文具，有個相框，同有個罌。」我如實回答。

 「相框入面嘅相有啲咩人，又或者係景？」

 「係......係我哋一家人喺影樓影嘅相。」我聲音變得顫抖。 



那幅看似溫馨的家庭照竟然像無垠的黑洞般把我扯進，耳畔徘徊着的只有無盡的謾罵。 

「呀呀啊啊!唔好啊！！」我頭痛就像腦袋快要炸裂般。

 「唔好望住幅相！快啲合埋眼！！」他命令道。

 果然，我聽從着他的指示，在夢境中緊閉眼睛，幻覺就沒有再出現了。

 「你而家全神貫注地望住隔離個罌。打開佢嚟睇吓，裏面裝住嘅係咩嚟？」 我扭開白色的瓶子，只見裏面全是潔白的藥丸。

 「係藥。」看着藥丸，我竟然沒有任何幻覺。

 「你食咗裏面嘅其中一粒藥，進入咗一個純白色嘅世界。裏面一個人都無，只有你一個人喺呢個同樣巨大嘅空間來回咁樣跑，但係都係搵唔到出路。」 



「呀！唔好咁呀！我要出去！」盜汗使得收音機機身也瀰漫着濕氣。 

「呢個時候，一道門打開，門口散發住無法令人直視嘅強光，而強光下企咗一個人。佢就係呀謙。」 

「呀謙，唔好拋低我呀！帶我走！」我不受控的身軀左右抽搐。

 「呀謙一下捉住你隻手，帶你離開咗嗰個白色嘅房。你哋兩個嚟到一個同樣喺白色嘅空間，但係呢個空間散發住聖光，周圍仲有唔同嘅人，好不熱鬧。」

 「呢個時候，呀謙同你講，『我永遠都唔會離開你！』，就比咗樣你最鍾意嘅物件你。個樣嘢係咩嚟？」

 「係......係部電結他.......」我嗓音顫巍巍的吐着幾隻字。 

「你好耐都冇見過部電結他，所以一拎上手就彈咗首歌比呀謙聽。你彈嗰首歌叫咩名？」

 「榮幸有你放任伴我傻 頑固地喝彩 繼續頑固的高歌......」我直接把歌詞唱出來。



 「佢話你唱歌好好聽，想聽你繼續唱落去喎。」