廟街有殭屍（已在各大書局上架）: 第八章
「呃⋯⋯」我尷尬得想死，大叫：「妳知咩事！」
「當然，屍氣蓋頂，五行不運。」她定睛望著我 ，這時我望到她的眼睛是水凝的啡淺色，好生美麗。
她知道？不太可能，上司明明說只有我跟他兩個人知道。
「琴晚嗰啲⋯⋯真係殭屍？」我問。
「無錯，仲陸續有嚟。」她說。
「吓？」
「係幾時開始？詳細啲講究竟發生咩事。」她說。
「係⋯⋯大概一日前⋯⋯」
我把整件事的來龍去脈都解釋得清清楚楚，她問得倒也仔細，包括有幾多具屍體遺失，有否接觸到屍體的手腳、口。
「無，淨係點到佢啲屍水。 」我說。
「咁已經足夠，屍水中都有好多屍氣，因為咁樣，你身體沾咗啲屍氣，不足以令你變成殭屍，但呢種屍氣會導致啲殭屍嚟到搵你，同時，因為屍氣帶陰，對人體嘅影響就係，你會見到陰間嘅事物。」她說。
「妳講陰間嘅事物，係咪即係⋯⋯」我輕聲地問。
「鬼。」她答得直接了當。
「但⋯⋯我沖咗涼㗎啦喎。」
「屍氣係洗唔走，只有時間過一排先會慢慢消散。」
「吓，咁我點算，佢哋係咪會不斷嚟搵我。」
「走，普通人無可能同殭屍鬥。」
「妳救我咪得！」
「琴日已經救咗一次。」
想的也是，如果每次都要她救，每次收費$2000，我豈不是破產都不成。
「咁妳同我做合伙人？」
她眉頭深皺，問：「點解？」
「因為我見到鬼，咁就可以幫妳捉鬼，幫妳做生意，做妳生意合伙人，取而代之妳保護我或者教我點自保，好唔好。」
「唔好。」
我大力拍枱說：「好！我鍾意妳直接又爽快，咁一係收我做徒弟，當係我打工，取而代之妳保護我或者教我點自保，好唔好。」
「唔好。」
「好！」我又再拍抬，卻已無計可施：「咁妳究竟覺得邊度唔好？」
「收你做徒弟唔好，根本百害而無一利。」
「真係？我乜都得喎，求下妳啦。」
「你真係乜都得？」
「係！師父！」
「等等先，我無話收你。但你可以跟我去一個地方先。」
我們來到廟街一間小串燒店，那店殘舊破落，連火爐滿佈污痕，一看便知多年歷史，由於店內太窄，桌椅都會放置街邊，毫無格調和私隱。
「阿蔚今日咁夜先嚟呀？食咩？」老闆娘是一個六十多歲的老婆婆，熱情好客，一看見我們來到，就立馬招呼。
南門蔚說：「係呀，今日遲咗啲，照舊呀唔該。」
不久後，一碟疊得滿滿的韮菜、茄子還有翠玉瓜串燒便送上。
「嘩⋯⋯妳一個人食得晒咁多？」
「當然。」
「點解全部得菜？」
「我唔識食肉。」
「吓？」
「我唔識食肉。」她再強調，我便不好問下去，然後點了一堆豬扒、雞肉串。
過了一會，老闆娘又送上一數枝涼茶，說：「阿蔚你呢排有啲咳呀，飲啲涼茶啦。」
「唔該老闆娘。」她笑了一笑。
我是第一次看見如此冷酷的她露出笑容，果然十分好看。
「妳笑嘅時候好好睇，點解唔笑多啲？」
「關你咩事？」她馬上又回復冷面。
「唔使錢㗎？」
「你唔明㗎啦。」她說。
「究竟呢，啲殭屍係點嚟？香港點解有？」
「殭屍係屍氣所致嘅怪物，分七等，但最簡單係跟眼睛分，最低級係白色，跟住係黑、紅、黃、藍、綠、紫，紫色又稱為不化人。通常形成方法都係黑貓經過屍體，或者屍氣注入，即係被咬。每個被殭屍咬嘅人，都會被屍氣入侵，屍氣係至邪之物，強化一個人本身嘅怨念，放大咗佢對塵世執著，走火入魔，最後放棄自由意志，人可以選擇成唔成為殭屍，但大部分人都會放棄作為人。」
她吃了一串翠玉瓜後繼續說：「香港一直都有殭屍存在，不過好少數，所以撲滅得快，所以無人知。殭屍就好似傳染病咁，一傳十，十傳百，又無藥可以醫，所以一定要好快咁撲滅佢哋，如果社區爆發，就無人可以救到呢個社會。」
「咁⋯⋯咁殮房咪大件事，走咗咁多殭屍？」我問。
「無錯。」
「咁死啦，我今次切腹都唔掂。」
「你放心啦，大部份殭屍都會有人捉，香港唔單止只有我一個人捉殭屍，仲有殭屍工會嘅人，佢哋都好有經驗，今次咁大件事，好多人都出咗去幫手。」
「唉，真係好對唔住。」
「你又唔使道歉住，件事未必全部係你錯⋯⋯你要知道，好多人想將香港變成一個殭屍嘅地方，好多年嚟，呢個都係一班人嘅心願。」
「點解要咁做？」
「有啲人係覺得容易管理，因為殭屍無自由意志，而有啲人覺得殭屍係進化啲，好多原因。」
「等等先，如果係咁，我做乜要畀錢你，其他人都捉晒。」
「殭屍工會雖然18區都有分店，但全行唔過一百人，所以呢⋯⋯」她瞄了我一眼：「你都係好有危險。」
「妳又係點入行呢？」
「關你乜事？」
「咁⋯⋯咁多類？殺殭屍係咪好難。」
「殺殭屍唔難，後續先難。」
「咩意思？」
「你之後會知。」
「咁鬼呢？」
「鬼得好鬼同怨靈兩種。」
「好鬼？咁我幫你捉好鬼。」
「好鬼根本唔使捉，反而係一件好平常嘅事。鬼係等待重生嘅一個狀態，唔入魔根本唔使理，但殭屍唔係輪迴六道，必須要殺先幫到嗰個人淨化。」她瞄了一眼串燒店的老婆婆說：「事實上老闆娘都係鬼。」
「吓？」我嚇了一跳。
「驚鬼就唔好講捉鬼。」
「唔驚！相信妳，乜都唔驚。」
她白了我一眼。
聽了許多，我覺得自己需要一些時間消化。
「食飽未？」她問。
「食飽啦。」
「咁去一個地方。」她說。