我們來到天后廟前的一個小公園,她說:「如果你可以捉到一隻鬼,咁我哋之間嘅事再講。」
 
「一嚟就捉鬼?妳都未教我,我乜方法都唔識㗎啵。」
 
「用你自己嘅方法,捉到就得。」她繑起手,安居態然地說:「呢度有一隻出名嘅百厭鬼,你只要捉到佢就得。」
 
「捉到就得?」
 
「係。」
 




「好!嚟啦!」
 
話未說完,已經衝出一隻全身青色,活像咒怨俊雄的鬼,對著我做鬼臉。
 
「死𡃁仔!」
 
我上前一撲,他立即變回虛體,如雲霧般摸不到,我撲了一個空,倒在地上。
 
不服氣!
 




我再一撲,他又變虛體,打著屁股嘲笑我。
 
他虛實交換,一下子實體,用腳大力踢我,然後變回虛體,躲避我,一時間我被他弄得像傻瓜,玩弄得焦頭爛額,完全拿他沒法子。
 
她一邊觀望我們,一邊打哈欠。
 
頭腦忽然一轉,趁他進攻時,趁機抓著他的腳,她眼睛一亮,我知道做到,可是他又變回虛體。
 
「點搞呀⋯⋯」
 




我想起了!
 
掏出相機,對俊雄拍了一照,這就算是捉到了。
 
「咁都叫『捉到』啦。」
 
「小聰明喺戰場上係救唔到你,不過今次當你啱。」
 
「師父!」
 
「等等,我都係唔收徒弟。」
 
「咁妳即係玩我啫。」
 
「我可以保護你直到無殮房殭屍再追殺你,你可以做住我助手,但保護費10萬。」




 
「10萬? 」
 
「唔畀無所謂呀。」
 
「好⋯⋯」我幾乎將所有的儲蓄都給了她。
 
銀行過數後,她說:「你跟我嚟。」
 
我們來到土瓜灣一個舊區,古舊的屋邨,某層的鐵閘裏有一個女人在吃飯,枱前是她兒子的相片。
 
我認得,正是先前襲擊我的那個仵工。
 
「仔⋯⋯你去得安心啲,唔好要阿媽擔心。」她正在一邊上香,一邊吃飯。
 




南門蔚拍一拍門,那個老女人嚇了一跳,幾秒後,摸門來到門口。
 
「婆婆。」
 
「你哋係邊個?」
 
「我哋係你個仔,孫仔嘅朋友嚟,佢有啲嘢叫我哋交返畀你。」
 
「孫仔嘅嘢?」她立即邀請我們入屋,只見屋內陳設破舊,是二百多尺的狹小單位,有一張碌架床,應該是母子二人同住。
 
她想倒兩杯水給我們,但是連連倒瀉,我接過杯來,不禁說:「婆婆,不如等我嚟。」
 
「對唔住,阿婆白內障,唔係好睇到嘢。」
 
「呢度二十萬,係佢叫我哋交畀妳。」她放在枱面說。




 
「佢?佢邊度咁多錢?」
 
「二十萬唔多,不過佢生前儲落,所以希望可以幫到妳一啲。」
 
「佢⋯⋯佢好勤力又乖仔,明明讀到書,但因為想賺錢,話要孝順我,走去做仵工,明明自己都驚屍,話咁樣搵得錢多⋯⋯佢真係一個好仔嚟㗎,邊諗到白頭人送黑頭人。」婆婆說著,不由得淒淒流淚。
 
「婆婆,我哋得閒都會嚟探妳,放心啦。佢叫咗我哋好好咁照顧妳,妳唔介意我哋煩住妳嗎?」
 
「唔介意唔介意,孫仔朋友即係我朋友,多啲上嚟坐啦。」
 
我們出門後,她點了一枝香,我只見門口不遠處,站著孫仔,但整個人是半透明色。
 
我嚇了一跳,深怕他又來搞我,但南門蔚搖搖頭。
 




他向我們點點頭,眼神中是不捨又猶若感激之情,不多時就消失在黑暗之中。我們也隨即離開大廈。