廟街有殭屍（已在各大書局上架）: 第二十一章

「第一步？」我問。
 
她帶我去到廟街的街市，找一個叫鵬哥的人。
 
鵬哥赤身露肩，是街市的豬肉檔大佬，他一口叼菸，噴出迷幻的煙氣，用麥兜的身材、張國榮的眼神說：「就係佢？」
 
「係。」南門蔚問。
 
「係？係咩？」我緊張道：「妳要賣我豬仔？」
 




「屁股都多肉，唔錯。」鵬哥說。
 
「哈哈，一睇鵬哥一身打扮就知道你係英雄好漢⋯⋯我唔使賣屎忽㗎可。」
 
「唔使講咁多啦，斬啦。」鵬哥一下推我，著我拿起刀。
 
之後的幾日，我痛苦得想死，每日都在街市斬肉，人流眾多，忙得不可開交，斬了好幾百次肉，手都麻了，腳也震了，回到家只想躺在床上，完全發不上力，貼了數十塊殺龍巴斯在身，也舒緩不到我的痛楚。
 
「點？想放棄啦？」南門蔚推門而入。
 




「好痛呀⋯⋯」
 
「當然，鵬哥嗰檔喺最出名，每日都好多人嚟。」
 
「我斬到就想死。」
 
「你有無諗過，可以唔使斬得咁痛苦。」
 
「吓？」
 




「試下諗多次莊子嘅緣督以為經。幻想自己內心有一道氣，御氣使劍。」
 
「啊⋯⋯」
 
這時，一陣吵鬧聲，是呂子璇大叫救命的聲音，我們衝到她的房間，只見她半身赤祼，校裙和內衣褲散在地上，身上正被一個大叔騎著，她一邊推開他，一邊大叫不要。
 
「喂！」我大聲喝止。
 
我們拉開那男人，他見我們進來，嚇得腳震，急忙拿起褲子就跑，臨走前還大吵：「係雞又唔比上，扮上菜，痴線痴線！」
 
「妳無事？」南門蔚替她披上外套。
 
「走開呀！」她臉紅耳赤，淚流滿面，雙手抖震似是仍未鎮驚。
 
「Sorry，係咪搞錯啲咩？我哋救咗妳喎。」我忍不住道。




 
「使乜你哋救⋯⋯」她說。
 
「妳做PTGF其實好危險，點解要做啫？」我問。
 
「又關你乜事呀？好多事呀你！」她反問。
 
「咁妳一陣又遇到呢啲事又要我哋救呀？」我不客氣地說。
 
「唔使你理，你哋多事⋯⋯」說罷，她竟然又流下淚來。
 
南門蔚搖搖頭，示意我到樓下串燒店等，自己留在房內陪伴她。
 
此時已經深夜，鬼市旺盛，眾鬼開始遊市，亮燈做生意的做生意，買東西的買東西，就像人間的世界，沒有什麼分別。
 




鬼老婆婆的串燒店也開門，她見我到來，就招呼我坐在門外的那枱。
 
「後生仔做乜嬲爆爆咁？」老婆婆問。
 
「妳都睇得出？」
 
「點會睇唔出，你平時笑臉迎人，今日黑到乾柴咁。」
 
「唉唔好提，幫咗人仲要俾人鬧返轉頭，你話有無天理？點解要自甘墮落啫？」
 
我見老婆婆沒有說話，一時間害怕自己失言，便問：「死啦，婆，你生前唔會都係⋯⋯」
 
「咁又唔係，不過我生前都係喺廟街呢度大，見證好多風塵女子，佢哋有啲係自己擺嚟，不過都有好多係一時錯或者唔係自願，你咪問下佢囉，唔係咩⋯⋯施比受更為有福咩？」
 
「老婆婆你係啱嘅⋯⋯」




 
我想起南門蔚曾經說過，留在人間的鬼，多是有未了的心事，便問：「婆婆你係咪有咩人好掛住？」
 
鬼老婆婆說：「每個人都總有啲遺憾嘅。婆婆唔多唔少都有啲，都係好耐之前嘅事囉，而家講返出嚟都笑死人。」
 
婆婆年輕時風華絕代，不少男生都拜倒在她石榴裙下，追求者不絕。
 
選擇越多，越不容易尋找到一個真心的 ，新鮮感完，又再開始新一段感情，來來去去，她總是遊走在不同男生之間，但不用緊，因為她能有許多選擇。
 
唯獨一次，她是傷害了一個最純真的男生。
 
故事未完，她就忙於做生意，招呼客人。
 
我喝了一口啤酒，不久後南門蔚就來到，她見我的氣還未完全消下，就叫多幾串雞肉。
 




之後的幾天，我都沒有見過呂子璇，反正她也不常在家。
 
我也沒有太多時間去思考，原因是我在街市忙得要死，每天斬肉的工作讓我腦海根本沒有空閒想其他事。
 
「咦，你斬得快咗喎。」鵬哥說。
 
「係咩？」
 
自從聽了南門蔚的說話，雖然我仍然覺得抽象，只是多幻想腹中有一股墨氣注入刀內，起初是什麼改變也沒有，如普通刀一般，但漸漸我不知道是斬得太多出現幻覺，還是什麼，我開始看見豬骨和骨之間的紋理，切得順手，本來一日斬得三百塊，開始變成半日三百塊，一日上千塊也不是問題。
 
「係咪我錯覺，你把刀點解紅咗？」
 
「係咩⋯⋯」
 
之後我的大假放畢，回到殮房接收的第一具屍體，家人就是呂嬸和呂子璇。