今日我開始左對公司啲同事進行復仇大計: 第六節
尋晚阿輝半夜whatsapp我搵我訴苦，話大明呢幾日係咁對佢落井下石令到佢真係好唔忿氣，佢同我講話大明條友自己其實都其身不正，大明好鍾意約啲妹妹 仔出黎話係私影，但次次都約人上酒店房影相。呢啲咁重要嘅情報我聽到之後緊係即刻記低以作日後對付佢之用。突然我醒起我有個中學同學叫相機基，呢條友聽聞 喺龍友界都算出名，出名淫賤。每逢星期六日你都會見到佢喺旺角度拎住部單反影啲嚫模同promoter咁，而且次次咩動漫展呀遊戲展你都一定可以發現到佢 踪影。呢條友喺中學果陣已經有鋪影相癮，為左買相機架生搞到飯都無錢食，果陣我間唔中都會請佢食下我食剩果啲嘢。正所謂養兵千日，用左一時，我都係時候係 搵佢收返果陣嘅人情債。
相機基呢條友真係唔係咁易刮到出黎，聽聞佢除左佢個咸濕龍友圈子之外，基本上都係與世隔絕，電話呀Facebook呀呢啲渠道係絕對搵唔到佢嘅。好彩，我 仲記得佢住邊，唔係話睇死佢，不過而佢搵幾多就買幾多錢架生嘅理財方法，佢九成九都仲係住喺老豆老母度痴飲痴食。我果日專登臨時攞左日假去搵阿基，由於公 司人事部而家無人睇，我同阿Sam姐單左聲就搞掂。等左大約十分鐘我就見阿相機基拎住一袋二袋行出黎。我見到佢果陣即時大喝左一聲：「李志基，拎住一袋二袋 去邊呀，係咪衰左咩風化案而家要棄保潛逃呀」。我嘅聲量其實唔係話真係好大，不過成條街嘅街坊都應該聽到。阿基聽到之後即刻面都紅埋，氣急敗壞衝過黎拉埋我 去一邊。佢一路拉住我果陣我仲要一路叫：「喂你叫阿基姐，但都唔洗連男人都搞埋架…」果一刻啲街坊個個都望晒過黎，可能有幾個師奶阿叔仲以為我地係街坊會做緊街頭劇。
阿基拉埋左我去一邊之後，嬲到想打我咁。我就以我一貫嘻皮笑臉咁佢應付佢：「喂阿基話晒中學果陣你都食我唔少飯呀，而家係咪恩人同你開下玩笑都要扯晒火咁先，你啲火留返你影啲promoter呀私影妹果陣先出啦。」阿基聽完我咁講之後行後左兩步，不過佢神情依然帶住果種毒男畀人恰完嘅不忿…我見都玩到咁上 下，係時候入正題，我喺個袋度拎左幅相出黎，問佢：「我今次黎係有嘢搵你幫手，你識唔識相中人呀，佢同你一樣係咸濕龍友架。」幅相係大明喺facebook嘅 profile pic，雖然都係果啲加左instrgram effect仲要係三七面chok相，不過我估都應該仲認到佢係邊個。佢見到幅相之後明顯地神情有異樣，不過可能想攞返個采，佢用毒男果種口疾疾，依依哦 哦嘅語氣答我：「我…我識佢又點，我點解要幫你。」挑，啲毒男真係麻鬼煩，差唔多都明示左係識佢，但又要攞下尾采咁。
為左唔想同佢喺呢啲無謂節眼上糾纏咁耐，我學左Judy果種變臉術，用誠懇嘅語氣同佢講：「拿基哥，你買相機架生都要錢架嘛，不如你畀我做你patron資 助下你搞呢啲攝影藝術，而你又行個方便話畀我知你知道相中人啲乜，咁咪雙贏囉。」相機基真係驗證左三歲定八十呢句說話，同以前一樣只要有人肯畀錢佢買相機架生佢就乜都制，聽到我呢個offer之後佢即刻拉我下附近茶餐廳話要請我食早餐。
「James哥，估唔到你同阿米原康明係同事呀下，呢條友喺我地人體攝影師界都算有啲名架。」我聽到之後真係差啲噴左口中果啖奶茶出黎，求其拎部相機影下私影 妹就自比米原康正，咁我估我眼前呢位基哥應該更加唔簡單。我按捺不住我好奇心問阿相機基：「多口問句，其他人體攝影師又點稱呼你呢？」阿基聽到之後神情即刻變 到好興奮，口入面件多士都未咬完佢就忍唔住答我：「佢地叫我Richardson，因為話我影相風格似Terry Richardson呀。」我聽到之後唯有忍笑，附和道：「哦咁我叫你Richard啦，我覺得叫你Richard親切啲呀。喂入返正題，阿米原康明同你有無 兩句架，你知佢幾多野架？」聽到我咁問我見到阿基個樣顯露左小小不忿出黎，呢種不忿表情我早兩日而都喺文員輝身上見過，我知道呢條友九成同阿輝一樣畀阿明恰 過啦。阿基靜左一陣，之後神情凝重咁問我：「阿James，我而家好認真咁問你，你點解想知阿明啲嘢，你有咩居心先。」我好直接咁答佢：「我想對付佢，所以我希望你會爆到佢啲衰嘢出黎畀我知。阿基…呀唔係，阿Richard，你而家認真咁諗下你知道啲咩可以幫到我。」
佢聽到之後又思索左一陣，我知佢其實已經落左搭，不過又係毒男性格使然令佢驚自己會上身，畀阿明過返佢一棟。過左良久，「佢答我：我同阿明喺人體攝影界被稱 為東邪同西毒…」我本身想插咀話唔洗問都知你條毒男一定係西毒啦，不過我唔想打斷佢，佢繼續講：「我同佢本身係互相敬重嘅好朋友同好對手，直到我地遇到 Cici之後，佢係我地成班攝影師都好鍾意約嘅模特兒黎，因為佢喺著衫方面好有sense，一啲都唔怕為藝術而蝕底…」我第二次按捺住自己唔去打斷佢，講咁多廢話，其實即係話阿Ceci肯著得少布，又或者什至唔著呀嘛，挑…不過從佢呢句說話，我估到Cici同佢同阿明三個之間應該發生過啲咩驚天動地嘅三角戀，點知，我估錯左!阿基講講下突然神情激動咁拍枱話：「屌，點知果個Cici剩係肯跟阿明上酒店房影，同我影就指明要日光日白喺戶外影，佢真係當自己皮膚好撚好咩，正式見光死黎架佢，仲要同我出去就著到鬼咁密實…」我真係無咁好氣聽條毒男喺度抱怨點樣畀條私影妹差別對待。不過我就突然靈機一觸，阿明哥既然咁鍾意去酒店房 同啲妙齡少女影沙龍，我不如就搵個妙齡少女畀佢慢慢影啦，問左阿基攞阿明用黎約人私影專用嘅email之後，我放低左一百蚊畀佢：「拿阿基哥辛苦你啦，拎去 買菲林啦。」講完之後我就頭也不回咁走左去。一路行我一路聽到阿基嗌話：「James哥而家無人用菲林架啦，你最少畀埋餐早餐錢呀，我而家量緊地架…」