喺尋日放工果陣,目睹我同Daisy狀什親暱嘅Evans依然無黎神氣,成隻喪屍咁,無論我同佢講咩佢都唔多應我。一直到今日返工佢都依然係行屍走肉嘅狀態;而Daisy唔知係因為尋日畀我推開左果下定係唔知聽Miki講左啲咩,佢今日喺公司又刻意同我保持距離,但喺我私下同佢whatsapp果陣佢都仲會同我打情駡俏下;至於Miki我就一直見佢成日用關心嘅眼神望住Evans,不過由於Evans連Miki都唔多理睬,所以Miki除左一直默默喺遠處咁凝望住Evans之外,佢都無乜嘢做到。阿油唔知係咪見到Miki悶悶不樂咁,佢成個朝早都頭借路走埋去撩Miki,但阿油可能朝早起身無照過鏡,佢唔知以佢副尊容加埋口才,成日走埋去只會令Miki更加煩躁。Miki喺臨放lunch果陣,終於忍唔住鬧成個身哄埋佢度嘅阿油:「阿油,你做it架,我部電腦無事呀,你唔洗成日行過黎架。」由於當時大家都做緊嘢公司都算係幾靜,再加上Miki好少喺其他人面前發脾氣,所以大家即時起身望過Miki度睇下佢地發生咩事,不過其實都唔係全部人都望晒過去,因為Evans依舊係好似進入左個密封罩咁,對呢個世界充耳不聞。呢個時候Valarie可能見尋日自己唔係太受歡迎,佢以為呢個係佢爭取表現嘅好時機,佢立即一馬當先咁走埋去以公司大家姐嘅身份推開阿油,之後義正詞嚴咁指責阿油話:「你可唔可以唔好騷擾其他女同事呀,你見唔到Miki好困擾架咩,雖然我無權干涉你嘅私生活,但你喺公司度搞其他女同事就唔得!」阿油可能頭先畀Miki當眾侮辱完已經好難過,而家仲要喺Miki面前再界Valarie插多刀,平時一向擅於吞聲忍氣同扮死狗嘅佢竟然忍唔住向Valarie怒吼左句:「老女人好心你唔好而家出黎做架兩啦,你咪一樣成日喺公司搞搞震!你以為自己真係坐正而家喺度扮老細呀?你而家企出黎扮維護Miki,其實咪又係為左收買人心。」我真係好少見阿油可以咁連貫地去大大聲鬧人,中間仲要無口疾疾,果然毒男被人迫到埋牆果陣都識得吠兩聲。Valarie估唔到一向溫馴嘅阿油會狠狠咬左佢一口,佢都呆左一陣先識反應,正當佢想開口還擊阿油之際,我知道我係時候出手啦。

 

「喂Valarie,如果你而家開口唔係同阿油道歉的話,唔該你收聲啦好唔好?」我行左過去,學返Valarie頭先咁懶係義正詞嚴咁做架兩。Valarie見我加入戰團,即刻忍唔住大聲咁話:「阿油佢頭先無理指控我,我都未同佢計,你憑乜要我同佢道歉呀?」「我先唔評論阿油對你嘅指控有幾成係真幾多成係假啦,但係先作無理指控果個係你。」「我幾時有無理鬧過阿油呀,大家都見住Miki畀佢煩到忍唔住發脾氣我先幫佢出聲咋喎。」我呢個時候望一望仲怒火中燒嘅阿油,再望一望置身事外嘅Miki,我用左幾十秒黎諗一諗之後話:「你知唔知道阿油點解成日煩住Miki先?唔知呀嘛,咁又你知唔知阿油同Miki私下有咩關係先?都唔知呀嘛。我而家就同你地講佢地係咩關係,同解釋點解阿油會咁關心Miki啦。」呢個時候本身一副置身事外,粒聲都唔出嘅Miki終於對我講嘅嘢產生興趣,而本身怒火中燒嘅阿油亦都由盛怒變到緊張起黎。我見全場氣氛一時之下又喺我掌握之下,忍唔住由心笑左出黎,Valarie見到我一副得戚樣就更加嬲,佢催我話:「快啲講啦,我就睇下你啲所謂解釋有幾合理。」其實Valarie真係錯估晒形勢,呢一刻佢先係公敵,我根本講啲乜Miki都會迫住認同我。不過係爭在我點樣令個故事有趣啲,等大家喺見到Valarie被落面之餘又可以娛樂一下。「其實,佢地嘅太爺都係黎自同一條村,佢地係同鄉黎。」

 

Valarie聽到之後即刻好不屑咁話:「同鄉又點?關阿油煩住Miki咩事先?」我望一望Miki同阿油,再望一望Valarie,之後轉身望住窗外嘅遠方講:「本身呢啲嘢其實係阿油同Miki嘅私隱黎,我都唔打算講出黎架啦。但係為左阿油嘅清白,我今日唔講都唔得啦。其實Miki喺佢鄉下黎講,地位可以話係等同公主架,佢喺條村度地位可以話係至高無上。簡單黎講,佢係村長個女。」Valarie面上依舊掛住不屑嘅笑容,佢話:「你唔係想同我講阿油就係村中嘅武士,要保護Miki咁呀,你係咪打機打上腦呀James哥?」「你又錯啦,阿油喺村中唔係武士,佢係太監。雖然佢性器官應該都係健全,總之佢係太監啦。保護Miki可以話係佢嘅天職黎,你估佢真係好想煩住Miki咩,不過佢一出世已經發過誓話要保護Miki,如果唔係會畀雷劈架。」Valarie依舊係一副不屑嘅模樣,





但係我再望向Miki同阿油問佢地我講嘅嘢有無錯嘅時候?Miki一路忍笑一路認同我,而阿油雖然畀我話係太監,但佢除左認同我之外都無其他選擇。Valarie見咁格硬嘅說法Miki都認同,佢除左氣結之外又奈我地唔何,佢唯有死撐幫自己辯護話:「我都係想幫同事姐,我唔覺得自己有咩問題喎,但如果係因為你地想夾埋黎對付我而亂作嘢,我的確奈你地唔何……但係有眼嘅人都知我係一片好心,只係有啲衰人有心人裝無心人姐。」呢個時候,一直沉默不語對所有嘢不聞不問嘅Evans突然企起身,同佢平時去示威般嘅聲線向住全場人大喝一句:「玩夠啦,呢度係公司黎,你地全部人都同我收聲呀。」可能係佢都預計唔到自己會失控鬧人,而全場嘅人都畀佢嚇到即時靜晒,氣氛太尷尬完全收唔到科。Evans自己都呆左一陣諗點善後,而喺佢呆左果陣全公司嘅人都跟住佢一齊呆左,大家連郁都唔敢郁。Evans最後選擇左坐低繼續埋頭做嘢,一直到放工佢都係埋頭苦幹,連我同佢講嘢佢都係完全無反應。