由於Miki因為擔心住成隻死狗咁嘅Evans,搞到連佢自己都集中唔到精神去做嘢。望住佢失魂落魄咁,唔知點解我就覺得好嬲,喺今日去食lunch之際,我偷偷地約左佢去單獨食晏。佢可能真係好無心機,坐低左之後,佢咩食物都無嗌,只係叫左杯檸檬茶。但佢直頭無心機到想連檸檬都唔篤就將杯檸茶一飲而盡,我忍唔住擔左佢杯檸檬茶幫佢篤,佢見到我呢個舉動都無乜反應,依舊喺度發呆,而我亦都唔知應該點開口同佢講嘢。過左一陣佢開口問我:「你叫我出黎係想知我果日同Daisy講左啲乜?」我將杯篤好左嘅檸檬茶遞畀佢之後話:「唔係,我根本無care過你同佢講啲咩。我叫你出黎剩係想問你一個問題,係咪只要Evans肯上進肯生性,你就會開心返?」佢諗左一陣,之後點一點頭,我繼續問:「就算到時佢都依然係唔會鍾意你,什至佢會變到同而家好唔同,你都唔會後悔?」「我唔想過見到佢過幾年到左三十歲,都仲係好似而家咁,做人無目標,而且仲會因為小小感情問題就無晒心機做嘢,佢係男人黎架。」我聽到佢責怪Evans因為感情問題而無晒心機做嘢果陣,真係差啲笑左出黎,不過我都佢一直以黎都咁係咁不問回報地去幫Evans,諗到呢一層我又笑唔出。望住眼前嘅Miki,再細心諗左一陣我黎緊嘅計劃,我最後喺心入面做左一個決定,我捉住Miki隻手同佢講:「雖然唔係出於你本意,不過你之前都叫間接幫左我咁多次,我而家就送一份禮物畀你當係還債,你到時可能會感動到以身相許呀哈哈。」Miki聽到之後無鬆開我隻手,佢只係同我對望左一陣,之後嘆口氣話:「你發夢啦,我係唔會多謝你架。」

 

夜晚,我約左Evans喺佢屋企附近,半山區嘅一個公園度傾計。佢初初都好似唔係太願意出黎,不過喺我堅持之下佢最後都係出左黎同我傾。由於佢成日都鍾意否定自己嘅富裕出身,所以約佢喺呢個有錢人區度傾應該令佢唔係太自在,又或者佢好想努力去否定呢個事實,佢又故意打扮得草根,而且車都唔揸專登喺屋企用左十幾分鐘行過黎。佢見到我果陣,唔係太知點開口,佢只係默默咁坐左喺我身邊望住街燈發呆。我決定由我做開口,我單刀直入咁問佢:「你係咪鍾意左Daisy?」佢聽完之後猶豫左一陣先話:「我一直唔知佢同你原來……」「我問你係咪鍾意Daisy,呢個問題得兩個答案架咋,係定唔係呀?」Evans可能從來無見過我咁正經,佢一時間唔識反應,不過喺我凌厲嘅眼光之下佢鼓起勇氣咁答我話:「我係鍾意Daisy。」「但你覺得以你而家成隻死狗咁,你有資格去追Daisy咩?我唔怕同你講,我已經向Daisy表白左,而且佢都無拒絕我。」Evans聽到之後即係苦笑住咁話:「你放心,你係我朋友,我唔會同你爭Daisy,你放心啦,我會祝福你地。」「挑,你慳啲啦,而家唔係你讓畀我,而係你成篤屎咁憑咩同我爭先?」Evans有啲動氣咁話:「咁你想我點呀?」我拍一拍佢膊頭安撫佢,之後話:「黎緊呢番說話,你未必想聽,而且我可以肯定一定係唔啱你心水。我一直當你係朋友,或是咁講,你係我一直夢寐以求嘅兄弟,我好欣賞你嘅好心,亦都好想有你嘅天真,不過到左呢個時候,遊樂場係時候要關門架啦。」「我唔明你想講啲咩?」「你最大嘅問題就係唔肯去爭取,男未婚女未嫁,咩都未成定案。我同Daisy莫講話未結婚,我同佢連男女朋友都未算係,你點解唔努力啲同我爭?你覺得你有邊方面差過我先?如果你真係鍾意Daisy嘅,你唔係應該努力爭取?由你自己去畀幸福Daisy架咩?朋友又點呀,唔好用我同你之間嘅友情去掩飾自己嘅懦弱。」

 

Evans望住我,欲言又止咁,我唔理佢繼續講落去:「就算我真係當你係朋友,不過換轉立場,我一樣會追Daisy,我唔會理你嘅感受架喎。同樣地,我會支持你去為左令Daisy刮目相看而爭Kate個位,我唔會因為你係我情敵而唔支持你。咁樣唔係因為我偉大,而係我明白放眼公司入面咁多個人,由你去坐阿Kate個位係對我最有利嘅。」Evans聽完之後神色痛苦咁問我:「即係你而家係專程黎話我知,呢個世界所有嘢都係以利行先?就算人興人之間嘅關係都係要以利益做基礎?我對你好失望,我以為我地會係同路人……」我冷笑左一聲,之後好嚴肅咁同佢講:「你望一望你周圍,呢個你生活緊嘅地區,你一出世就已經係住最好食最好著最好,你一直得返黎嘅生活都係由呢個以利為先嘅社會建構出黎。你應該比任何人都明白,呢個就係真實社會嘅殘酷之處。」Evans好大聲咁反駁我話:「係呀,我係含住金鎖匙出世呀,不過唔代表我認同呢種價值觀,邊個生我出黎我無得揀,但我有權選擇自己點過之後嘅生活。」「你之所以可以有權揀自己點樣過生活,係因為你有家底唔憂柴唔憂米,你知你就算走左去做示完威,返到屋企都仲有飽飯食呀嘛。你有無諗過你父母嘅感受先,你又有無諗過有咩方法可以唔逆你父母意,但又可以去改變世界呀?」「我唔想做果啲日日揸坐法拉利去花天酒地,得閒喺慈善拍賣度買幾幅畫就覺得自己幫左世界果類人。」





 

「好簡單咋嘛,你見到呢個世界有好多不公平嘅事,而呢啲不公平嘅事又係由果班肚滿腸肥嘅人,即係你啲uncle auntie去做成嘅話,點解你唔努力咁去力爭上遊。到你做左同佢地同等地位嘅時候,再去以你自身去影響人地。到時你自己都有返咁上下身份地位,你講嘅嘢只會更加有影響力同說服力。你唔係傻仔黎,你無理由無諗過呢條路,不過因為呢條路難行,而且中間太多誘惑,你對自己信心怕自己墜落呀嘛。」Evans聽完之後無出聲,佢諗左好耐,而我亦都喺佢身邊沉默不語睇下佢有咩回應,良久之後佢話:「我一個人無可能會夠Valarie鬥,我仲要你幫手,仲有既然你都咁講,我唔會放棄Daisy架,may the best man win啦。」其實,如果有選擇,我真係想Evans可以一直做個天真,與世無爭嘅有錢仔,不過人生在世,本就係有好多無可奈何嘅選擇。