Evans今日返工果陣,專登打扮到成個管理階層,官仔骨骨咁。我喺同佢一齊喺停車場行上office嘅期間,見到來自其他公司嘅一班少女,中女,老女人喺見到Evans果陣都暈晒大浪。喺目擊到呢個情況,我忍唔住同Evans講:「做你跟班真係唔易,睇黎聽日我要帶定支地拖同個小心地滑嘅牌返工啦。」Evans一臉正經咁同我講:「你又想亂講啲咩呀。」我一貫嬉皮笑臉咁答佢:「挑,呢排天氣潮濕,我想幫下手抹下地唔得咩,而家係咪做下好心服務下大眾都要問過你先。」「陣間返到公司你記住要正經啲呀死仔,我地而家要打仗呀。」我依舊都係笑笑口咁答佢:「嘩而家叻仔啦,未正式上位就教我做嘢啦喎。放鬆啲啦,有我幫你出謀獻計你仲怕啲咩先?你不如諗定第日點樣裝修下個office先啦。」但無論我點樣去講笑收係Evans眼神始終都係顯露出佢缺乏信心,我大力拍一拍佢膊頭同佢講:「你想同我爭Daisy,都要畀佢知道你係有自信,而家你咁弱真係做唔到我對手架。你唔好以為喺呢方面我係用激將法呀,喺同你爭Daisy呢方面我真係唔會讓賽架。如果你再係咁頹,我同Daisy講你其實係腎虧架。」「我頹又關腎虧咩事?」「係無關係架,單純係我想抹黑你腎虧,你諗下喎咁後生已經係虧佬,佢仲點敢揀你呀。」Evans笑一笑,深呼吸左一下,之後拍返我膊頭同我講:「我會為左我嘅理想而努力架啦,我一定會盡力去改變呢個社會架。」「係啦,快啲入去努力表現自己啦,早兩日你喺我同Valarie嘈果陣出聲喝停其實係無錯架,不過你係爭啲自信,唔識得維持呢個正經形象姐。今日你自己執生啦,記住要表演到自己已經坐定粒六咁就得,至於Valarie你交畀我就得架啦。」「其實我真係唔想返工返到要咁工心計,下下都鬥過你死我活……」「唔好再咁婆媽啦,遊樂場已經關左門架啦,由而家起,可以實現到你理想嘅地方係喺戰場。」

 

當時我唔會咁天真覺得人會喺一夜之間突然轉變,不過最少我都想Evans個樣可以嚇得下Valarie,就算到佢真係上左位其他人都會服下佢呀嘛。Miki喺見到Evans似返個人之後,好明顯地係有啲釋懷。佢喺觀察左Evans一個朝早之後,忍唔住走黎問我:「你究竟同佢講左啲咩令佢肯生生性性呀?」「男人嘅嘢好易話為架姐,我見佢成日為左女人而煩惱,咪索性改變左佢嘅性取向囉,而家佢咩都聽晒我話架啦。至於我同佢係咩關係,我諗我講出黎你會妒忌。」Miki望一望如常工作嘅Daisy,再望一望我,佢再問:「我可以預見到你最後可能會一無所有,你覺得咁樣係值得咩?你又唔係我,你無必要喺呢件事上面冒咁大嘅險。其實你可以唔幫Evans,你自己去爭個位唔係最好咩?到時Daisy仲一定會投向你懷抱架……我真係唔明你諗緊乜呀。」我微笑住咁答眼前有啲激動嘅Miki:「我都唔明你既然一早咩都估到晒,你仲點解要行埋黎問我究竟同Evans講左啲咩。哦我知啦,你溝唔到Evans想黎溝我,係咪?不過我同你拍拖就免啦,做下炮友都仲有可以考慮下嘅……」但係Miki剩係講左句多謝之後,就行開左。呢個時候一直喺遠處望住我同Miki嘅阿油行左埋黎問我:「點解Miki今日又會開心返嘅?究竟發生過咩事黎,佢頭先同你講左啲咩黎呀?」我扮晒為難咁答阿油:「唔好問我啦,我應承左Miki我唔會話畀人知架。」阿油好鬼祟咁望一望周圍,喺確定無人望緊我同佢之後,佢喺銀包度拎左張五百蚊紙塞畀我話:「有五舊水畀你,睇怕你都肯講啦掛,唔好同我黎呢一套扮晒有原則啦。」

 

我不但無收到果五百蚊,我仲喺自己銀包度拎左張五百蚊畀阿油,我之後話:「唔好啦阿油,不如你收左我呢五百蚊之後唔好再問我啦。我真係應承左Miki唔會同人講呢件事架,你唔好要我難做啦好唔好。」阿油見我咁堅持,更加激發左佢嘅好奇心,佢好大力咁捉住我話:「所有關於Miki嘅事我都要知道呀,我唔理呀,你點都要同我講架啦,就算你要我即場跪喺度我都會跪,總之你快啲講畀我知啦。」呢個時候我望住心急嘅阿油,木無表情咁話:「好呀,你而家即刻跪呀。」阿油可能無諗過我會認真咁去聽佢嘅信口開河,佢即刻神色一變,佢望左我一陣,見我個樣咁認真,佢開始想縮沙,佢試探我咁問:「喂而家咁多人喺度,你叫我跪好奇怪架嘛,一陣啲人問起我都唔知點算好。仲有我跪都對你無乜好處姐……不如你都係收我五百蚊算啦。」「係你自己頭先話就算要跪都肯架,我係想試探你有無足夠嘅誠意令我要反口幫你,點知你諗住果五舊水就想買起我嘅人格?你都係死返個位度幻想住Miki黎打飛機算啦,你對Miki嘅決心原來都係止於此?你都係算吧啦,」阿油呢個時候猶豫左一陣之後,佢竟然真係想單腳跪低,但佢跪嘅速度好慢,好似一直想試探我幾時會叫佢停。但我又點會正中佢下懷,我喺望左佢幾十秒之後就擰轉頭做嘢無再理佢,阿油見我無望佢,佢都停低左無再跪。我背住佢咁同佢講:「阿油如果你以為做下話劇就可以套到我說話,你真係太天真啦。你連喺人前出醜嘅決心都無,我點信你可以保護到Miki先?」阿油忍唔住,再喺銀包度拎錢出黎,今次佢除左一張五百蚊之外仲攞多左幾張一百蚊出黎,佢好勞氣咁話:「一口價八舊水,呢度係我成個月飯錢黎架啦。咁你睇得出我決心幾大啦。」我喺佢手上接過果八舊水,停左一停喺度扮猶豫,之後,我嘆左一口氣咁將呢八百蚊收左落銀包,再喺自己銀包度拎左張五十蚊畀阿油。我同佢講:「呢五十蚊留返畀你食飯啦,我知你幾有決心架啦,我就將我所知嘅都講你知啦。」





 

「你咪好少聽Miki提佢屋企人,而且佢又自己搬左出黎住嘅?其實Miki嘅屋企人一直都喺美國生活,而且佢地都好反對Miki自己一個留喺香港度住。佢地早排又因為呢件事同Miki嘈過交黎,到最後Miki爸爸開出左一個條件。一係Miki就喺香港搵到個正經男仔去結婚,喺香港有左家庭之後佢地先會放心,但如果搵唔到的話Miki就要返美國。咁Miki媽媽仲誇張到搵左啲男人同佢相睇呀,由於其中一個同佢相睇嘅男仔係我小學同學,所以我先知道呢件事……」阿油聽到之後即刻好緊張咁捉住我問:「如果佢早排唔開心係因為被父母迫去相睇,咁而家佢開心返係咪因為佢父母唔再迫佢呀?」我扮晒面有難色咁答:「我唔多肯定呀,不過以我所知Miki同我果個小學同學好似幾投緣下,Miki頭先走埋黎都係同我講我個小學同學真係唔錯……」阿油聽到之後面色大變,後退左幾步之後話:「無理由架,我都成日跟住Miki架啦……不過呢排又的確係成日都跟甩佢唔知佢去左邊…….」「拿阿油,睇在果七百五份上,我話埋你知呀。我果個小學同學係ibanker黎,搵到錢之餘人品又唔錯,你要同佢爭真係要努力啲呀。你上次畀Miki發現你跟蹤完佢佢已經好唔開心,你前日仲要當眾搞到佢發脾氣…..你真係唔太樂觀呀,不過咁,如果你可以再加把勁搞掂Valarie啦喎……」阿油聽到我咁講之後,佢呆左咁企喺度,但我為左要忍笑所以擰轉身無再望佢,但喺佢行開果陣我聽到佢講左句:「我唔會輸架,為左Miki我要更加努力。」可憐一頭無緒嘅Miki應該又有排畀阿油哥煩。