宋千辰行到去梁玥嘉旁邊坐低,兩個人,一人坐一邊,靠住梳化嘅扶手

「我話呀⋯佢突然痴過嚟又同我地食飯做friend咁一定唔係單純咁想同我地做朋友。」李穎容喺心中嘆咗一口氣,「今日終於比我捉到佢嘅破綻啦!」

「咩破綻呀?」梁玥嘉望住電視無奈咁問道

「今日放學嘅時候佢係咁問起你嘅嘢⋯」李穎容講道,當梁玥嘉正想開口問楊楠恩問咩嘅時候,李穎容再次開口,「正確嚟講唔係問你嘅嘢,而係你同宋千辰嘅嘢⋯」

「問嚟做咩?」梁玥嘉望一望宋千辰,宋千辰感覺到來自梁玥嘉嘅視線便望向梁玥嘉,但梁玥嘉又若無其事咁移開咗視線



「哎呀~你聽我講埋先啦!」李穎容急不及待要話比梁玥嘉知放學嗰陣發生嘅事,「今日放學嗰陣⋯」



放學嘅時候,因為梁玥嘉同宋千辰一齊走,李穎容都習慣咗自己一個番屋企,但最近因為楊楠恩「埋堆」,所以楊楠恩就同李穎容一齊走

兩個人又未熟到話真係可以無話不談又或者唔講嘢都唔尷尬,所以必定有一方會先開口

「係呢,你平時都係自己走㗎?」楊楠恩先開口打破尷尬嘅狀況



「哦係呀,玥嘉平時都係同宋千辰一齊走,所以我平時係自己一個放學番去。」李穎容都冇特別覺得啲咩,自然地回答

「你同玥嘉咁friend,咁你同宋千辰熟唔熟?」楊楠恩忽然將話題轉移到梁玥嘉身上

「一般啦,都冇話熟唔熟,玥嘉同宋千辰就最熟~」李穎容心中雖然覺得奇怪,但都冇開口反問啲咩

「佢兩個好似好close咁,之前仲以為佢兩個有啲咩。」楊楠恩微微一笑講道

「佢兩個close都唔出奇,畢竟識咗一段日子,感情都有番咁上下。」李穎容不以為意咁聳肩,笑咗一笑



「但佢平時lunch又唔會同宋千辰一齊食飯。」楊楠恩講道

「咁大家有各自嘅朋友,佢兩個又唔會成日一齊嘅,最多係番學放學囉~」李穎容望向楊楠恩,只見楊楠恩微微耷低頭

「唔知玥嘉中意咩類型嘅男仔呢~」楊楠恩彷彿開玩笑一樣講道,「佢冇理由一世都同宋千辰一齊㗎嘛~」

「唔知喎~冇聽玥嘉講過佢有中意嘅男仔之類喎~玥嘉好少提佢中意啲咩類型。」李穎容喺心中回想,又真係冇聽梁玥嘉提起過中意咩男仔,「冇所謂啦~佢開心咪得,如果佢係中意宋千辰嘅話,又或者宋千辰係中意佢嘅話,我地都管唔到太多。」

「嗯⋯」楊楠恩若有所思地微微耷低頭,然後望向李穎容微笑道,「都係嘅~」

李穎容留意到楊楠恩嘅表情,心中覺得怪怪的

「係呢,楠恩你有冇中意嘅人?」李穎容咁樣一問,楊楠恩頓時就怔了一怔

「冇呀~」楊楠恩微笑道,「冇拍拖嘅打算住。」



李穎容見到楊楠恩嘅微笑,忽然間覺得有一種虛偽嘅感覺



「佢都話冇拍拖嘅打算啦~」梁玥嘉聽唔出楊楠恩有咩奇怪

「佢一直問起你同宋千辰嘅事,我話佢根本就係想知宋千辰嘅嘢。」李穎容睇得出楊楠恩嘅別有用心,「佢話冇中意嘅人啫,可能佢特登話冇呢~」

李穎容話中有話,梁玥嘉大概聽得明李穎容嘅意思

呢一刻梁玥嘉冇特別覺得楊楠恩有啲咩,亦冇咩戒心,但聽完李穎容咁講,佢又真係覺得楊楠恩平時好似特別親近自己

「係呢,你喺邊呀?宋千辰唔會係喺你隔離掛~」李穎容忽然心血來潮問咗一句



「佢真係喺我隔離,因為我喺佢屋企。」梁玥嘉笑起嚟講道,「你直覺咁準嘅~」

「我亂講㗎咋!」李穎容講道,「做咩有屋企唔番去人地屋企?」

「冇帶鎖匙,我今日以為自己拎咗,番到嘅時候先發現原來冇拎⋯」梁玥嘉無奈咁講道

「哎喲喲~」李穎容笑道,「會唔會日久生情~」

「關咩事⋯係會都己經⋯」梁玥嘉講咗一半,欲言又止,佢諗起最近嘅唔自然

「都已經咩呀?」李穎容都冇等梁玥嘉講完就追問

「如果會嘅話都會咗啦⋯」梁玥嘉明顯地細聲咗,一嚟唔想太大聲,宋千辰就喺隔離,二嚟係因為佢覺得咁樣答怪怪的,好似否定緊一啲事一樣

梁玥嘉同李穎容講多咗兩句之後就收咗線,宋千辰聽到梁玥嘉講嘅嘢,便望咗梁玥嘉一眼,梁玥嘉曲起雙腿坐,一副鬼鬼祟祟嘅模樣






IG Link: https://www.instagram.com/nd_cotttoncandy/?hl=zh-tw