［愛情純愛］由嗰一個Kiss開始，我地唔再係青梅竹馬: 59. 真心話 vs 大冒險

「有呀有呀！」張子萊好快咁講道，帶着腼腆嘅表情想要盡快結束自己嘅回合

李穎容聽到張子萊講出自己有中意嘅人同時，一絲淺淺嘅笑容喺佢臉上輕輕帶過，佢用手將臉頰旁嘅頭髮繞到耳背

「邊個答完邊個轉，你轉啦。」李穎容講道，張子萊仲伸手推咗塗改帶一下，塗改帶再一次轉起嚟

塗改帶慢慢地停咗落嚟，指向宋千辰，宋千辰頓時不禁深呼吸

「點呀？真心話定大冒險呀？」張子萊笑咗兩聲問道



「我揀大冒險。」宋千辰作為勇者，先揀大冒險

張子萊拎起一盒放喺佢杯嘢飲隔離嘅Pocky，宋千辰一眼就睇穿佢，知佢想做啲咩

「Pocky game！」張子萊將Pocky嘅包裝拆開，遞比宋千辰，「揀人挽。」

「點揀呀⋯你挽我呀？」宋千辰接過Pocky，一臉無奈，喺心中道：「唔通直接揀嘉嘉呀⋯？」

「抽籤。」霍思傑喺袋入面拎咗一張冇用嘅紙出嚟，撕咗5張紙條，喺其中一張嘅尾部上用原子筆畫咗一個剔，「李穎容有仔，唔計佢。」



霍思傑抽走一紙空白紙條，將4張紙條捉住喺手中比大家抽；楊楠恩伸手拉出其中一條紙條，心中默默地唸着：「抽到我就好⋯抽到我就好⋯」

楊楠恩一下子將紙條拉咗出嚟，紙條上空白一片，乾淨到冇得再乾淨，楊楠恩嘅心裏頓時感到格外失望；楊楠恩之後就係張子萊

「Yes！」張子萊一抽一睇，頓時握緊了拳頭，一臉感激，所有人都望住佢諗緊係唔係佢時，張子萊開口道：「唔係我！得番你兩個啦～數三聲你地同時開啦！」

張子萊望一望梁玥嘉，然後又望一望霍思傑，拍一拍霍思傑嘅博頭；霍思傑右手捉住紙條嘅頂端，梁玥嘉亦如是，梁玥嘉嘅心臟跳得好快，鹿都要撞破心房衝出嚟

「1、2⋯」霍思傑同梁玥嘉一同數着，「3！」



兩人同時將紙條從手中抽出嚟，宋千辰都有啲緊張想知邊個同佢挽Pocky game

「係你啦梁玥嘉！」霍思傑興奮地將紙條掉到枱面，「快啲挽啦！你兩個咁熟，唔洗尷尬啦！」

梁玥嘉腼腆地將紙條放到枱上，的確喺紙條嘅末端畫咗一個剔

「梁玥嘉咬住，宋千辰做食嗰個。」張子萊完全係以食花生嘅語氣講道

「真係要挽呀？」梁玥嘉無奈地望住張子萊

「係呀！」張子萊迅速地拎咗一支pocky放到梁玥嘉嘅口中，宋千辰見到張子萊嘅舉動時雖然心中略有不滿，但表面上都要扮冇事，「最盡比你地食剩1cm。」

「快啲！快啲！快啲！」霍思傑等人都喺度起哄，梁玥嘉同宋千辰有啲尷尬地對視，「你地咁熟尷咩尬？」

宋千辰向梁玥嘉嘅方向坐近咗，宋千辰深呼吸，想要一鼓作氣勇敢地完成遊戲，但係佢嘅心跳快到一個點，完全就係演奏緊激昂嘅進行曲；梁玥嘉嘅手㩒住喺梳化上輕輕握着拳，上身微微向後靠



「真係要呀⋯？」宋千辰感覺到自己耳根都紅晒，臉頰發滾，不得不望向張子萊問道

「係呀！願賭服輸呀！」張子萊點頭，手上拎住包薯片，等待緊好戲上演

宋千辰聽到後唯有再一次深呼吸，望一望梁玥嘉，身上向前傾，想張開口咬落百力滋嘅頂端，但梁玥嘉下意識往後靠

「你唔好向後，我食唔到⋯」宋千辰望住梁玥嘉無奈地笑道

梁玥嘉臉頰泛紅，腼腆地笑了一笑，纖幼嘅手指將垂喺臉旁嘅秀髮輕輕繞到耳背；宋千辰開口咬下一口，頭慢慢地愈靠愈前，每咬一口就靠前一啲⋯梁玥嘉望住宋千辰愈靠愈近，緊張地將雙眼緊緊合上

一合起雙眼，身邊嘅一事一物比梁玥嘉嘅感覺變得更加清晰敏銳⋯聽到宋千辰嘅急速嘅呼吸聲、感覺到宋千辰嘅鼻息、聽到咬餅乾時餅乾、聞到⋯宋千辰身上獨有嘅味道⋯

心跳嘅聲音愈嚟愈響，每一下心跳聲都格外響亮，喺心房中傳嚟「咚咚」聲嘅回音，梁玥嘉稍微單起一隻眼望，見到宋千辰已經靠得好近好近



楊楠恩瞪大眼睛望住挽Pocky game嘅兩人，右手不禁用力地捉住自己左邊衫袖，輕輕咬唇⋯明明唔想望住兩人如此親近，但視線卻移唔開⋯

當兩人嘅鼻尖都快要碰上時，梁玥嘉緊閉上雙眼同時不禁止住呼吸，宋千辰一下子咬斷咗餅乾

「食完啦，下一個。」宋千辰嘅羞澀都可以從聲線裏聽得出，佢連正眼望梁玥嘉都唔敢

心跳仍然冇減慢，宋千辰直接唔望梁玥嘉，因為臉頰太紅、心跳太快、對住梁玥嘉太尷尬

「我去個廁所⋯陣間問題你幫我問。」宋千辰企起身同時對張子萊講道，然後推咗塗改帶一下後就行咗去廁所

喺宋千辰閂上廁所門嘅同時，塗改帶定落嚟，指住梁玥嘉，張子萊即刻就提問佢揀真心話定大冒險

「真心話。」梁玥嘉講道，雖然心中對於揀呢個選項有啲緊張，但佢都已經揀咗，唯有接受提問

「你對你嘅青梅竹馬有冇朋友以外嘅感情或者想法？」張子萊急不及待地問道






IG Link: https://www.instagram.com/nd_cotttocandy/?hl=zh-tw