打機射喪屍係會報應㗎…(改咗名): 地下城一日遊

「呃…佢啲衫呢？」啊康指住我問 。佢換咗套新衫，唉！佢就好啦！
「係嘅，麥先生。」義蠬䮓行出房門，好快就行返入嚟。手上仲拎住一塊布。
「我啲衫呢？」我問佢。
「已經跟規矩燒毀曬，呢塊布係你嘅。」義蠬䮓答返我。
「有冇搞錯……啊！好痛呀！」義蠬䮓嘅部下突然用皮鞭打落我到，然後將皮鞭交俾啊康。「麥先生，呢條鞭俾你。以後呢個嘢有咩反抗行為都可以好好管教。」
「呃… 唔使喇唔該。」啊康拒絕咗。
「有需要！有需要！我哋嘅奴隸主冇一件半件刑具都唔好意思話自己有奴隸㗎！」另一個部下對啊康講。
「呃…咁…好啦…」啊康免為其難收咗條鞭。
冇辦法，我只可以著住嗰塊遮羞布(仲有唔遮後面)，我依家著到好似《魔戒》入面嗰個咕嚕咁樣。真係好鬼羞恥。
義蠬䮓又用條麻繩挷住我對手，然後交俾啊康。跟住帶我哋去一棟雙層大樓，喺大門前有一個螞蟻人接待我哋。




嗰個螞蟻人同義蠬䮓唔同，身上著住嘅係橙黃色、白色細條紋裇衫而唔係銅色盔甲。舉止同語氣都散發住一種悠閒嘅氣息，見落冇咁恐怖。不過…佢身邊有兩隻蟲怪，好似蜘蛛咁，不過得四隻腳，腹部變成一條舉起嘅蟲尾巴，末端仲有一條大刺。大概有一隻牛咁大，體色呈深棕色。其中較大一隻尾巴仲用繩挷住一個有輪嘅大型狗籠。
「Hi！麥先生，我叫馬蛤𧊲，係你嘅導遊。咦！你件衫唔錯喎！」
然後佢就攞咗一份嘢俾啊康「呢份係我哋地下城嘅旅遊指南。」
「呃…你後面嗰隻咩嚟㗎？」啊康指住嗰隻蟲怪。
「呢一隻係四足蛛，我哋常見嘅交通工具之一。」
「好嘅，我哋第一個要去嘅地方係邊度？」
「蟲獸牧場，我哋立即發出啦！」馬蛤𧊲騎上一隻四足蛛「你都快啲騎啦！」
「呢度得兩隻，咁佢呢？」啊康間。
「吓？咪後面個籠囉，有咩問題？」馬蛤𧊲露出困惑嘅表情，幾乎並唔覺得有咩問題。
「吓？！唔係呀？好似隻狗咁屈喺個籠！？」我抗議




「已經好優持㗎喇！平時呢個距離下級奴隸都係用腳行㗎！去到十幾層先用籠㗎，而且呢隻籠平時3~5個人用㗎！唔信你睇！」馬蛤𧊲指向右邊街道，一個螞蟻人用條長繩挷住廿幾個奴隸，佢哋身上都同我一樣全身都淨係得塊布，不過身上有大大小小嘅傷痕。甚至有一兩個連嗰塊布都冇，全身赤裸。「喂！螴生！今次咩貨呀？」
「18個下級、兩個上級、兩隻畜，8個農奴、10個建築工、兩個裁縫，全部二手貨！」螴生回應。
「嗰個係螴生，奴隸商人。想買多幾個奴隸揾佢啦！好喇，唔講喇，依家即刻出發！」馬蛤𧊲對啊康講。
我完全唔敢想像人類係喺呢度點樣生活㗎！