🏫 👩🏼❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: CH.9.1 熱戀•日
---7月28號---
終於，我同阿玲黎到長洲。
一年四季，我最中意夏天。
隻船啱啱到岸時，已經係下午四點幾，個天萬里無雲，個海風平浪靜。
雖然仲係又曬又熱，但還好我地行嘅地方已經有樓遮蔭，加埋少少海風。
來自海洋嘅暖風，吹拂住一雙手，係一雙由我和阿玲拖成嘅手。
「喂，呢度有啲魚乾，不如睇下？」同阿玲拉起我隻手，指向我1點鐘嘅方向示意。
那檔小販，擺出咗好多魚乾製品，阿玲忍唔到手，最後都係買咗包魷魚乾。
「係咪真係咁好食？我又試一舊先。」我最後都係食埋一份。
我哋又繼續拖手仔行街，以極慢嘅步速，經過位於我哋左邊嘅兩間大排檔，係專食海鮮嘅大排檔。
路上嘅人流算唔少，但未至於迫爆；十個有六個都戴曬太陽帽同墨鏡，著曬沙灘風格嘅襯衫出嚟玩，唔⋯⋯有一種似嚟到西班牙嗰種feel？
一路直行，又經過一間恵康同埋7-11；而我哋嘅右邊，係個晴空萬里嘅大海，堆泊左一堆單車喺度。
我哋又路過一啲店鋪，漸漸地，聞到一陣陣嘅甜香未，係一陣熱香味。其實唔止甜香味，連魚蛋、三寶之類嘅鹹香味都聞到。
「多謝幫襯！」我哋最後幫襯咗一檔嘅雞蛋仔；長洲嘅地道小食，見好睇好食就買。
「小鼬，你打開個口呀。」阿玲徒手摵粒雞蛋仔出嚟，然後示意我開口。
Um一聲，一粒雞蛋仔溶在我口裡。
我輕輕伸出一隻手，用那像籣花手嘅動作，以中指輕輕點在阿玲嘅額頭上，對佢展示出如同呢粒雞蛋仔一樣甜嘅笑。
阿玲有點害羞得無語，但最後還是對我展現出同一樣的笑。
阿玲：好少見你笑，笑多啲嘛，你份人一唔笑，就俾我覺得好cool。
我地又繼續行下街先，都係行下唔同特色嘅店舖，有啲店鋪賣衫，有啲賣手工藝，亦都路過一啲茶記。
阿玲：一齊去果度呀！有煎釀三寶賣wor
我：好呀
(我笑之回應)
.
.
.
阿玲：小鼬，不如我哋租單車啦！
我：我都唔想行得咁辛苦
最後我哋一人一架單車，我哋又出返去靠住海邊嗰條大路。一邊踩，一邊留意住剛好喺海平線之上，那依然蔚藍嘅天空。
一架單車，可以去到好多地方，張保仔洞、五行石、小長城等等地方；不過今次黎，主要係想行呢度嘅大街小巷，食下野咁；何況太陽咁曬，冇乜人會去d山旯旮地方。
我踏上單車，享受住兩種風。
一種係海風，而另一種——就係單車郁動時，身體同空氣磨擦產生而成嘅風。
我好享受呢兩種涼爽嘅風，直接麻醉左熱嘅感覺。
阿玲：小鼬，你唔熱架咩？
（阿玲就喺後面）
我：踩快d就唔熱架喇！
最終，踩到嚟東灣沙灘，已經係夕陽無限好嘅時候。
我哋搵咗個石級坐低，石級下是個沙灘。
「嘩⋯⋯啪。」
「嘩⋯⋯啪。」
「嘩⋯⋯啪。」
浪花溫柔且有節奏地拍打住岸邊，就好似幫小朋友推鞦韆一樣溫柔，一去一回的響著。
霓虹嘅日落之下，雖然東灣沙灘位置係東邊，冇日落睇；但已經突顯出呢度天色嘅蔚藍美。
我隻手疊喺阿玲隻手上面，談起未來嘅共同願景，如同討論眼前呢一片宏大嘅景觀，願景時宏大的嘛。
我：就黎一齊升f.4喇，到時要準備DSE，好難再好似而家咁一齊啦。
阿玲：到時可以一齊去圖書館自修嘛，我地要一齊入U。
講完呢句，阿玲嘅眼神凝望著好遠好遠嘅海平線，彷彿將呢個願景寄托到呢條海平線之上；而呢個願景，就好似由我哋而家坐緊嘅呢個石級，去到嗰條海平線咁宏遠。
我：希望啦。
然後我哋又dead air左幾秒。
我：其實你一個女仔咁樣出黎過夜，屋企人唔阻止你㗎咩？
阿玲：梗係會啦，我屋企人雖然唔介意中學生拍拖，但⋯⋯
阿玲：但你同我始終都係出面cafe識嘅，我怕家人會反對我識你，唯有暫時唔講住。
夕陽和黃昏嘅另一個寓意——就係憂愁。
又真係幾應景，我哋又討論起一啲煩惱嘅話題。
呢幾個月同阿玲相識，我了解到佢家庭背景。原來佢同我一樣都係單親家庭，自小跟阿媽。
始終我地唔係真正嘅成年人，既然我同阿玲本身喺學校以外嘅地方識，唔好話你阿媽，我阿媽都係。
要完全釋除家人對我地嘅擔心，恐怕唔係一朝一夕嘅事。未完全公開之前，同家人慢慢溝通期間，總避不了要做地下黨。
何況，如果新校長禁止學生拍拖嘅事屬實，咁就真係要做地下黨了。我相信就算我轉到校；以我所知嘅阿玲母親，咁短時間內好難用「為左拍拖」的理由說服佢再轉校。
阿玲：呢3日之所以出到黎，係因為有個好師姐幫我同家人講大話；佢同我家人講『樂琪同我一齊去長洲』。
阿玲：同埋你都應該知新校長嘅事啦。
我：你都知道左新校長嘅事？
阿玲：樂琪好醒目，佢收到風然後同我講。
然後，阿玲就同我分享佢同樂琪嘅相遇，以及其關係。
有這樣的知己真好，沒錯，我都曾經有過一段關係，係好似阿玲同樂琪而家咁。
可惜，他已不在了。「他」，卻仍在我心底裡，永遠停留在心間；過去也是，現在也是，未來也必如是。
阿玲：我希望暫時唔好同講，求下你。
阿玲以懇求嘅態度捉住我隻手，我也握住佢隻手，臉帶安慰：我應承你唔講，我地一齊突破難關。
老實講，我同你一樣，喺情況唔明朗之下，唔想隨便公開戀情，暫時呢件事只可俾David同樂琪知。
阿玲：有機會嘅話我想畫低呢一幅黃昏美景。
佢毅然起身，愁到盡頭，大家愉快嘅心情又返返嚟。
我：不如我喺度地影相呀。
我一手扶住阿玲條腰，不顧沙子入鞋，二人嘅腳踩入沙地裡，再走到臨海前。
「嘩⋯⋯啪！」迎接我哋嘅係，清脆嘅浪泊聲，同埋有少少強嘅海風，霓虹嘅天空幾乎佔據曬我哋嘅視角，簡直海闊天空。
「嚟，準備喇！」阿玲一手攬住我，另一手hold住枝自拍神器；而我一手攬返佢，另一手垂低；鏡頭對住個海景。
「喀嚓！」鏡頭裡面，我同阿玲都面對面，身子同臉都有少少側向鏡頭，一齊微笑。
呢個「喀嚓」，捉住咗呢一刻，我同阿玲最甜蜜嘅時光。
之後，我地好似上左癮咁，雙手緊緊地攬實對方，停不了，停不了下來。
我也主動kiss佢額頭。
由攬到實一實，到kiss落佢到嗰一刻，真係起咗頭，就唔會有完結；情情愛愛嘅事，真係同罌粟一樣，會令人上癮。
肢體緊緊地接觸在一起嘅呢個moment，我俾阿玲嘅體溫焗到好熱，但係呢種熱又好特別，令我愛不釋手。
這是「熱」戀，還是熱戀?