那些年，我最愛的兩個女孩子: 65

「阿哥」
 
「唔?咩事呀敏敏?」
 
「你…信唔信緣份?」
 
「信嘅」
 
「即係你會相信，所有事都已經一早係整定，我地冇辦法改變?」
 




「有可能嘅，不過人一定可以改變自己命運」
 
「嗯…」
 
呢個傻妹無啦啦會問埋呢d問題，真係完全唔似佢。或者我所諗嘅事係真，雪凝係英華女校到讀書，而詩敏就憑我書檯張相，認出左雪凝呢個對手，詩敏知道我心中個女仔係邊個，所以佢為左自己，決定阻止我同雪凝相認。如果係咁呢個傻妹真係好傻好傻。
 
人可唔可以改變自己嘅命運?我真係唔知。我只係知道時間同機會錯過左就冇得返轉頭，如果有時光機的話，我會返去小學果時，叫爸爸媽媽做身體檢查，盡快醫好個病，咁樣我地就可以一家四口開心生活。
 
望一望屋企嘅相，我地一家只係去過一次日本旅行，之後我同家姐就同爸爸媽媽天人相隔
 




諗到咁樣，我又有眼淚流出黎，而今次終於俾詩敏發現到
 
「阿哥…你掛住契爺契媽?」
 
「冇…冇事…傻妹仲唔瞓?」
 
詩敏坐起身伸出雙手幫我抹去眼淚
 
「阿哥…如果你覺得真係好辛苦嘅話，你可以放棄架，契媽都唔想你咁辛苦，你呢兩年改變左好多，已經生生性性，身邊又有阿熙同怕羞仔一班朋友，你改變左好多架啦，你休息下啦」
 




「詩敏，我點都要幫媽媽實現佢願望，我唯一可以做嘅就係呢樣」
 
「你…你唔覺得辛苦咩?」
 
「就係我之前冇好好孝順屋企，所以我而家先要補返」
 
「點解…唔俾我幫你地?」
 
「詩敏…妳已經幫左我好多，而且…我地兩父子仲欠妳兩母女…呀…妳明我講咩啦」
 
「就係咁?就係因為我俾左你…所以你唔想我幫你」
 
「妳已經幫我好多，妳係我身邊陪伴我，已經係最大嘅幫助」
 
詩敏雙手捧起我塊面，再錫落黎，唔知點解佢咁大力，可以將我推低




 
「阿哥…我愛你…我冇後悔過，就算將來你遇上麵包姐姐要揀佢，我都唔會嬲，唔會怨你」
 
「點解呀…點解」
 
「就好似媽咪當年同契爺咁樣，契爺心中最愛果個，係媽咪。所以我知道你心中最愛果個，一定係我」
 
「詩敏…」
 
「殊…」
 
詩敏之後熄左書檯燈…..