條女有鳩而我冇賓周: 5

曦銘：你唔好搞驚驚啊下，我平時都同佢打開rank架

曦銘：唔想佢俾你搞到退game

但係…如果係人哋主動搵我呢？喺螢幕另一邊，一個身高米八嘅男仔興致勃勃咁打量電腦螢幕，為新朋友嘅到來而雀躍不已。

浩俊滑鼠旁嘅電話顯示曦銘嘅Whatsapp，對方語氣間透露出對浩俊嘅不信任同擔憂。

浩俊漫不經心地掃咗一眼，將專注力放喺遊戲入面— 今日大概係受到運氣女神嘅眷顧慮，唔單止偶遇到多年前有過一面之緣嘅人，更加有新嘅玩具…浩俊彎起眉目，眼底藏住浩瀚星海。



曦銘：唔好睇完當覆咗

曦銘嘅最後通牒並沒有驅使浩俊去回覆對方，一向厭倦覆機嘅浩俊理所當然地將電話反轉放喺枱上，選擇物理式隔擋一切Whatsapp。

「點解要add我嘅？」低沉聲線中帶有幾分慵懶，經變聲器處理後嬌嗲得輕柔婉轉，無時無刻撩撥心弦。

浩俊都係一隻網絡人妖，不為騙財騙色，只為博己一笑。曦銘曾經狠狠批評過浩俊網上同現實世界中嘅性格相差太大，浩俊卻不以為然，左耳入右耳出。

整蠱人遠比現實生活中任何娛樂更為大快人心，只要可以望到其他人被自己激到扎扎跳，浩俊就會發自內心地笑出聲，亦會諗起幾年前嘅事— 而今日機緣巧合下重遇當時嘅主角，浩俊心情愉快得可以飄起嚟，做網絡人妖嘅事，佢可以不厭其煩地持續多幾廿年。



「因為我對你有興趣。」曦銘擔憂成真，只不過主動開口嘅係嗰位被稱呼為驚驚嘅玩家，浩俊聽得嘴角上揚，睇嚟對方又係一個下體痕癢嘅四肢動物。

作為浩俊多年來嘅好兄弟，曦銘自然深知對方內心所打嘅小算盤，但佢唔會允許浩俊影響到自己喺月伶心目中嘅形象— 絕對唔可以俾月伶知道驚驚媾嘅人妖係自己嘅朋友。

對曦銘而言，月伶係硃砂痣、係意難忘，係望而卻步嘅美好。當留意到月伶眼中再也藏唔住滿滿情意時，曦銘早已控制唔住對月伶嘅好感，只不過滿腔溫柔只能藏於每一句噓寒問暖間，恍如被泥土埋藏嘅原石般，只要月伶主動探究，曦銘嘅心意就會原形畢露。

「你咁狼死嘅？有冇諗過人哋會怕醜㗎？」浩俊正打算開口時就被打斷，曦銘決定阻擋驚驚嘅攻勢，只要對方同浩俊行得愈近，距離自己形象崩塌嘅日子都更加近。

然而，曦銘複雜嘅心情去到月伶耳中就變咗味，一下子就誤會曦銘有意護花，瞬間醋意大發。



「都係曦銘了解我，我會怕醜架。」浩俊刻意放輕聲線，嬌聲膩語傳入其他人耳機中，無意中點燃月伶嘅熊熊妒火。

月伶恨不得捏碎滑鼠，無盡醋意一時蒙蔽雙眼，渾身細胞都對阿桃嘅存在作抗議。到底曦銘係由幾時開始識到關係咁好嘅異性？點解自己會唔知？

定係其實曦銘所認識嘅女仔遠比想像中更多？月伶忍唔住鑽起牛角尖，內心難受不已，但只能強行忍住。

「係咩？但點解聽落唔似係怕醜嘅？」驚驚輕佻嘅聲線傳到浩俊耳中，就好似一隻小貓用爪輕輕搲咗下心臟咁。

如果係情竇初開嘅少女，必然會心動不已，不過驚驚嘅對手係經驗老成嘅高手。浩俊只能擰擰頭，笑容中帶住一絲可憐對手嘅輕蔑。

一場普普通通嘅遊戲，唔單止造成兩隻網絡人妖首次交鋒，更成為曦銘花式自殺嘅現場。

月伶：記得幫手問佢同曦銘之間嘅關係
月伶：仲有佢同曦銘識咗幾耐
月伶：仲有最好抄埋牌，我要睇吓呢條女咩料



月伶嘅吩咐一口氣喺屏幕上彈出嚟，穎怡皺起眉頭，稍微感到為難。

窗外雨勢喺不知不覺間停止，層層烏雲蓋住月光，恍如醞釀一場陰謀。

「呢隻英我唔識玩啊～」浩俊率先開口，傳入其他人耳邊嘅女聲語氣輕得令人心軟，惹人憐愛。

穎怡皺起眉頭，對方示弱無疑係提供一個搭訕嘅機會，但係又會咁順攤嘅？

算啦，有食唔食，罪大惡極。穎怡掃咗眼電話，打消上一秒嘅疑心。

「你可以跟住我。」穎怡同曦銘異口同聲，浩俊不禁輕笑起嚟，為曦銘嘅處境默哀一秒— 佢唔怕月伶會誤會咩？

曦銘一心諗住夾喺穎怡同浩俊之間，盡力阻擋兩人嘅交流。然而多此一舉，月伶此時此刻嬲到咬牙切齒，恨不得將浩俊大卸八塊。



激死啦！！！月伶敢怒不敢言，只能將面前電話揼去床褥上，但奮力發洩嘅結果猶如一拳打入棉花般無力。

到底你係何方神聖？月伶緊緊握住拳頭，強行忍住想穿過螢幕將對方剝皮拆骨嘅衝動。