一場遊戲激到月伶成肚氣,一完場就匆忙退出隊伍。連海螢同曦銘都以食飯為由offline,隊伍中只剩低穎怡同浩俊兩人。

貿貿然抄人牌感覺太咄咄逼人,過於主動只會令對方有所退卻。穎怡思索片刻,決定今日都係提早收隊為妙。

「咦?佢哋唔玩啦?」浩俊明知故問,裝傻扮懵嘅語氣間隱藏住想整蠱穎怡嘅心思。

別有用心嘅魚餌灑落水上,浩俊滿心期待地等待對方上釣。

「嗯—」穎怡抬起頭望去指向八點嘅鐘,個肚適時地「咕嚕咕嚕」響起嚟,語氣略為遲疑:「我都要…」



「你都要走啦?」甜美嗓音間帶住滿滿不捨,將打算離開嘅穎怡綁喺原地。浩俊模仿起女仔時唯妙唯肖,有時甚至會令曦銘混淆起嚟。

我都未開始認識你—浩俊微微失望起嚟,明明撒嬌係女人嘅天生強項,點解對方反而出乎意料地反應平平?

「唔係嘅,可以傾多一陣。」獵物主動送上門唔通仲拱手讓人?穎怡毫不猶疑地捉緊接近對方嘅大好機會,月伶今晚一定會感激自己咁做到嘢。

大魚果然一口咬住魚餌,單純得惹人發笑。兩個人各懷鬼胎地試探對方,一字一句間充滿致命陷阱,一唔小心就會將計謀暴露無遺。

「啱啱你咪話你同曦銘係同學嘅?」穎怡刻意頓咗頓:「其實我都係理大嘅,咁計嘅話你應該係我師姐。」



所有關係由建立共同話題起開始,適當地透露個人資訊可以更輕易地得到對方嘅信任,穎怡經歷過太多類似嘅對話,語氣自然得毫無破綻。

「係咩?咁你讀咩㗎?」無論喺現實定喺網絡世界中,浩俊早已習慣各種各樣搭訕方法,唯一唔同嘅只有對象嘅性別。佢對穎怡嘅心思不以為然,隨口問返轉頭。

「翻譯。」穎怡開始厭倦無意義嘅寒暄,話鋒一轉:「咁你同曦銘識咗幾耐?」

飢餓令人變得焦躁不安,穎怡單刀直入嘅問題令浩俊呆咗呆,恍如受到突襲般措手不及。

「識咗好耐啦。」浩俊嘗試將朋友嘅事輕輕帶過,曦銘同浩俊之間嘅友誼長達十年,關係早已好得可以從一舉一動中睇得出背後嘅心思。



「平時各有各玩,最近先一齊打機。」浩俊補充道,內心早就知道曦銘對月伶嘅難捨難離,亦不忍令月伶有所誤會。只不過面前嘅人卻有趣得令佢不禁好奇起嚟,想揭開對方淡淡語氣背後嘅真正想法。

「哦~」即使得到想要嘅答案,穎怡嘅防備心仍然毫不減退,小心翼翼地問道:「咁即係你同曦銘係青梅竹馬?」

月伶知道真相嗰陣,應該會嬲到爆炸。穎怡揞住額頭,擔心起一陣應該點開口。

奇怪。曦銘幾時連男人都吸引到?穎怡問題嘅焦點同浩俊所預想嘅有所出入。

定係其實醉翁之意不在酒?

「點解你好似對我同曦銘之間嘅關係特別好奇嘅?」浩俊不懷好意地笑起嚟,傳到穎怡耳邊別有一番風味,感覺就好似被另外一個女仔挑釁返轉頭咁。

問題一針見血地正中穎怡下懷,彷彿自己被睇穿咗咁尷尬。穎怡一時間無言以對,思緒亂得諗唔出一個藉口去解釋。

「點解我哋淨係玩咗一舖你就問咁多嘢嘅?」浩俊見對方沈默不語,決定乘勝追擊。突然間整蠱對方嘅欲望變淡,取而代之嘅係想搞清楚對方嘅企圖。



浩俊變得愈來愈咄咄逼人,令穎怡大亂陣腳,食指喺螢幕面前微微顛動,腦入面嘅摩打就快轉到出煙。

條魚已經發現上釣嘅事實,竭力掙扎求生。

「食飯啦喂!」穎怡阿媽嘅叫聲由房門外傳入嚟,打斷穎怡嘅思考。

「我……我要食飯,走先。」穎怡慌張地講道,連忙退出隊伍就落荒而逃。

「點解可以咁柒㗎…」穎怡臨出房門前自言自語道,周遭靜止嘅空氣重新流動起嚟。

阿桃:睇嚟你對我好有興趣喎
阿桃​:你真係好可愛


眼見桃味糖send出嚟嘅最後一行字,穎怡嘅心跳重重漏咗一拍,大腦「嗡」一聲直接停止運作。佢驚慌失措咁即刻熄咗隻game,手腳無力咁灘坐喺咗張凳度。



是次交戰結果:浩俊 1 穎怡 0
已有 0 人追稿