我倆的緣份，於半世紀前已經開始: 做紅娘

當我地返入校門我就拍左Silvia一下
 
「作死妳咩!!!頭先咁玩法」
 
「唏，怕咩丫」
 
「好多同學係到架」
 
「妳又唔係同佢拍拖….不過呢…妳同佢真係青梅竹馬咁簡單咩」
 


「咁….當然啦…唔係妳仲想點呀」
 
返到課室，又未到上堂，大家又繼續圍埋一齊八掛下，今日，就到我俾一大班同學圍住
 
「Charlotte!!!!妳拍緊拖呀?」
 
「下!!!我邊得黎有男朋友呀?」
 
「頭先係餐廳果個喎，唔係妳男朋友咩?」
 


「痴線啦!!佢成碌木咁樣，點會係我男朋友呀」
 
「咁佢邊個黎架」
 
「佢係我契爺個細仔，係皇仁到讀，頭先我叫佢上黎請我食飯，係咁多」
 
「咁樣呀….真係唔係妳男朋友?」
 
「係呀!!妳地邊個睇中佢呀?」
 


「唔係我地，只係隔離班好似有人睇中佢者」
 
「嘩，乜咁快手呀?」
 
「隔離班Ophelia好似話成日係樓下食飯撞到佢，成日想識人但係又怕羞嘛」
 
「咁想我點先?」
 
「如果妳唔介意嘅話…」
 
「想我做紅娘呀?」
 
「真聰明!!可唔可以呀?」
 
「點解OV唔自己過黎問我?」


 
「佢怕果個真係妳男朋友囉」
 
「我諗諗方法啦，諗諗方法啦」
 
要點樣先可以令翹哥哥識到OV呢?真係一個大問題，翹哥哥同揚哥哥唔同，佢係偏向文靜果類人，但係佢又會去跑步踢波。究竟我要點落手呀!!!!好煩呀!!!
 
就係果日放學，我行落去公園仔果時，翹哥哥已經係到等緊我
 
「喂!等左好耐?」
 
「都係五分鐘左右之嘛，Silvia呢?」
 
「嘩!!咁快睇中佢呀?」
 


「多口問問者」
 
我係電話拎左OV張相出黎俾哥哥睇
 
「喂，你認唔認得我呢個同學?」
 
係地鐵上，哥哥不停run佢個腦，而我就係佢身邊等佢答案
 
「點呀?認唔認得呀?」
 
「有少少印象，我好似經常食飯撞到佢」
 
「想唔想識佢呀?佢係隔離班架喎」
 
我落地咁sell緊OV俾哥哥，不過佢好似冇咩興趣咁


 
「喂，靚女黎喎，真係唔想識人地?」
 
哥哥睇清楚OV張相再望一望我，佢好似係到對比緊，搞到我有D唔好意思
 
「喂….你搞咩呀?」
 
「妳係咪最近無聊?定係兼職做媒人?想介紹同學俾我識」
 
「咁你想唔想識人先得架」
 
「唔想」
 
嘩……佢態度真係好冷淡，死啦，如果做唔做同學交帶落嘅事，我咪好冇面，所以我決定出絕招，眼淚!!
 


「你…你真係咁討厭佢咩?你又未識佢…..可能你地相處到呢…」
 
「點解妳一定要推佢俾我呢?」
 
「咁我見你讀男校….咪幫你搵女朋友囉….估唔到你….」
 
我用力咇d眼淚出黎，為左營造更好效果，要有少少鼻水
 
“嗦….嗦…..嗦….”終於佢好似發現我「喊」緊啦
 
「做咩呀妳?」
 
「人地好心幫你….等契爺契媽唔好絕後者….你都唔領情」
 
講完我就擰埋一邊唔望佢，佢好心拎紙巾俾我抹眼淚我都唔領情
 
睇黎我嘅眼淚戰術成功左，翹哥哥終於心軟啦
 
「好啦好啦，怕左妳啦，聽日同妳食飯，妳帶佢黎啦」
 
「真係?」
 
「係呀!!妳唔好再喊啦」