第二日一返到學校,我立即捉住Silvia過隔離班
 
「OV!!!!!今日妳同唔同我地食飯呀!!!」
 
「嗯?」
 
「妳唔係想識我哥哥咩?佢話今日上黎搵我食飯喎」
 
「下…咁快?」
 


OV一聽見翹哥哥今日上黎食飯果時塊面真係好紅
 
「點者,一唔一齊食呀?」
 
「好…好呀…」
 
我走埋佢身邊細聲咁問佢
 
「妳鍾意佢D咩呀?」
 


「下……咁樣…..」
 
「話我知妳鍾意佢D咩啦,我想知道呢條書蟲有咩吸引到妳」
 
OV好怕羞咁答我
 
「佢……文靜囉…又有風度」
 
「有風度!?佢邊忽有呀!!俾D例子我先」
 


「嗯…..有幾次呢,我係百佳買野,件貨放到好高,我點都拎唔到,果時又冇人幫我,佢一見到就幫我拎囉」
 
「下!!就係咁咋?」
 
「仲有佢見到我都會微笑囉…」
 
「咁OV妳答我,妳係咪鍾意佢先」
 
「邊係喎….連朋友都未做…」
 
「我幫幫妳啦……」
 
「咁….佢有冇咩嗜好?例如聽歌果D」
 
「佢呀?佢唔聽歌架喎」


 
「咁佢有咩嗜好?」
 
我真係好用心咁諗,翹哥哥鍾意D咩呢?其實佢同浩揚哥哥好唔同,翹哥哥完全係一個文青咁靜,但又可以運動健將咁好動,點呢……終於俾我諗到啦,佢經常帶住部相機周圍影
 
「嗯……影相!!!」
 
Silvia加把口落黎「嘩….乜佢咁悶架?」
 
「唔…又唔係嘅,至少我同佢一齊玩果陣…我唔覺悶囉」
 
「唔?Charlotte妳成日同佢一齊玩?」
 
「細細個成日都同佢孖鋪…一齊沖涼囉」
 


「嘩….玉帛相見喎」
 
「喂呀!!!果陣仲細啦!!!去到四年級之後都冇一齊沖涼….只係孖鋪者…..」
 
「咁孖到幾時呀?」
 
「唔….小學畢業囉」
 
食Lunch之時,我地三個準時去到餐廳搵位
 
「拿OV,講明先呀,我真係唔知佢鍾意咩類型嘅女仔架」
 
「佢咁耐都冇拍過拖?」
 
「佢係聖類斯讀小學,果時已經係男校」


 
「但係佢又唔讀返聖類斯中學?」
 
「唔知呀,可能佢真係叻仔考到皇仁掛,不過佢好似知我揀返港真,所以佢話要去皇仁」
 
「係喎,Charlotte妳婆婆係英華校長,媽咪又係英華舊生加教師,妳唔去英華嘅?」
 
「嘩…一日到黑都對住佢地咩,媽咪讀中學果時已經係咁啦,當年爸爸去等媽咪放學,差d俾婆婆鬧死添呀」
 
「妳爸爸媽咪係中學就識架啦?好青春呀」
 
「拿,以我所知呢,媽咪F.1果陣識爸爸,當時爸爸F.4。之後媽咪F.3果陣爸爸突然攬實佢同佢表白,果陣開始媽咪就同爸爸拍拖,直到結婚,而家仍然係咁sweet,sweet到我都眼冤」
 
「嘩….真係好青春呀,咁妳媽咪有冇定情信物之類呀?」
 


「信物呀…唔….有條鍊係婆婆俾媽咪,之後媽咪俾左我」
 
「借黎睇睇啦好嘛」
 
「下….而家呀?」
 
「黎啦」
 
我打開頸頭鈕,拎出果一條頸鍊俾佢地睇

「嘩…..兩個心形喎,係咪鑽石黎架?」
 
「嗯,媽咪話呢條鍊差唔多40年啦,仍然係咁靚,當年師傅手工好好」
 
就係呢個時候,身邊有客人睇到我頸上條鍊就向我地解釋