我倆的緣份，於半世紀前已經開始: 兩家的淵源

「當年…..老契爺入左英華做女校男生…識左妳婆婆同老契媽，然後…老契媽搶走左老契爺….但係佢個心仍然係妳婆婆到…就係佢臨過身果陣，送左呢條鍊俾婆婆，婆婆戴左陣就俾左我」
 
「之後呢?」
 
「之後到老契媽過身，妳契爺為左幫佢媽媽完成遺願，就發力讀書入英華女校，做女校男生升大學」
 
「咁媽咪妳當年唔捉實契爺?」
 
「雪凝姐姐…呀…契媽….佢同契爺係三年級果時…己經鍾意對方，佢地升中學失去聯絡五年，兩個依然鍾意對方。妳媽咪我係契爺身邊好多年，甚至唔講佢知雪凝契媽下落…..最後佢地兩個都係學校相遇，然後….」
 


「得啦媽咪，我明哂，然後爸爸先放膽追妳」
 
「嗯」
 
「然後爸爸就跌落呢個深淵…..」
 
「咩深淵呀?」
 
「冇….」
 


「慧思，媽咪唔知呢個係命運定係咩，妳老實答媽咪」
 
「係…」
 
「妳有冇諗過、考慮過要嫁俾兩個哥哥其中一個?」
 
「媽咪呀….妳無啦啦咁問我…..我一直都係當翹哥哥係親生哥哥咁睇…..不過今日…」
 
「今日咩?」
 


「我介紹隔離班同學佢識者….不過當我地兩個條鍊合併果時…我都唔知點講啦….」
 
「傻妹」媽咪摸一摸我個頭
 
「妳大個女啦，媽咪唔會阻妳識男仔，知唔知?」
 
「嗯….知道啦」
 
「乖啦」
 
「媽咪…妳真係覺得…呢個係命運?最後兩條鍊落係我同翹哥哥身上」
 
「可能啦….亦可能代表妳會同媽咪仲有婆婆咁樣…」
 
「媽咪呀!!我對兩個哥哥都….」


 
「妳細個唔係話要嫁俾翹哥哥架咩?」
 
「果陣我地仲係玩泥沙時代，邊可以當真呢」
 
「慧思….妳契爺…係四年級，話要娶雪凝契媽，果陣佢地兩個10歲未夠」
 
「邊有可能….」
 
「到佢地F.7畢業，契爺就係畢業典禮上向契媽求婚，果陣佢地兩個20歲都未夠」
 
「然後呢?」
 
「之後佢地一齊讀大學，正想行婚禮之際，契爺俾航空公司請左做見習機師，所以佢去澳洲受訓，到完成訓練，就立即返黎娶妳契媽，果時佢地兩個23歲左右。到妳家姐出世，佢地都未夠27歲」
 


「媽咪….咁妳知道家姐都係叫詩敏果陣….妳個心點諗」
 
「點諗?因為我知道…妳契爺最愛果個係我，妳契媽都知，所以佢就將佢最錫最愛嘅寶貝女，改做我個名」
 
「但係爸爸….」
 
「有好多事妳唔可以同爸爸講，唔可以俾爸爸知，媽咪唔想佢地幾兄弟關係因為媽咪而改變」
 
「嗯…我知啦」
 
「早D瞓啦，我地聽晚去婆婆到啦」
 
第二朝一起身，其實都唔早架啦，我成10點半先起身。打個電腦睇下平台，原來翹哥哥一早起左身，走左去影相
 
我真係好佩服佢啦，為左一張相可以咁早起身



不過佢每個星期六都好早起身啦，又要去練劍擊，因為哥哥都係皇仁劍擊學會會員
 
再睇一睇其他同學嘅Page，大家都係剛起身，或者冇Update
 
起身走去刷牙洗面後，我係書房聽到一首好舊嘅歌，應該係媽咪細個時嘅歌
 
「婚紗中背影雙雙遠去……我讓舊情伴婚紗遠去……」
 
媽咪坐係到聽住呢首歌，我第一次見媽咪咁樣諗野，通常媽咪同婆婆一樣，決定一樣野係好快，但係今日嘅媽咪充滿心事咁樣。一定係為左頸鍊嘅事，正當我想入去果時就聽到媽咪唱歌
 
「青春彷彿因我愛你開始……再回頭，你不許…如曾經很登對……能從頭開始….跪在教堂說願意…」
 
我第一次聽媽咪唱呢d慘情歌，我立即返房search幾句歌詞
 


一撳個search，彈出黎嘅result嚇左我一跳….「婚紗背後」、「小城大事」兩首都係當年好慘情嘅歌
 
呢兩首歌就代表婆婆同媽咪?
 
如果…..到我呢代又再係同一結果會點?唔會嘅…我唔會鍾意翹哥哥嘅….
 
不過自己望一望個盒仔
 
都係唔好亂諗野啦!!!!