經過糖水鋪果時我地對望左一眼,兩個人好有默契一齊走入去,坐低係我地平時坐嘅位上
 
哥哥繼續食佢嘅凍綠豆沙,而我就食返士多啤梨西米露
 
「思思呀」
 
「唔??」
 
「唔…旅行日之後果日妳有冇約人呀?」
 


「冇呀,你想約我去街?」
 
「去唔去迪士尼?好似好耐未同妳去過」
 
「唔….你想玩全日?」
 
「玩埋Halloween之夜囉」
 
「都好呀,咁海洋公園呢?」
 


「妳想放學玩夜場?」
 
「唔…OV同肥鴿話一齊去嘛,你去唔去?」
 
「其實呢…Winnie想搵我陪佢去架」
 
又係Winnie!!!!
 
「咁你陪佢去囉」我又再次鼓成泡腮咁樣
 


「我拒絕左佢啦」
 
“我拒絕左佢”呢幾個字傳入我耳仔,經過耳骨、震動中耳內耳,化成震波傳入去我大腦之中
 
「人地咁靚女,你拒絕人地做咩喎」
 
「下…咁我暫時都冇打算同佢發展落去,而家做朋友幾好呀」
 
「咁…你叫契媽幫你斬纜囉」我係佢面前做出斬纜手勢
 
「如果要媽咪出面嘅話,可能連朋友都冇得做喎,可能慢慢暗示佢知啦」
 
「係喎…如果呢…Winnie向你表白咁點呀?」
 
「咁我而冇諗過喎」


 
「如果真係呢?」
 
「咪話我有女朋友囉」
 
「你無啦啦係邊到變個女朋友出黎呀」
 
「我眼前咪有一個囉」
 
我用手指指一指自己
 
「我…我?」
 
「係呀」
 


「我…我同你邊忽似呀」
 
點解你唔直接問我,可唔可以做你女朋友呢?
 
「唔似咩?」
 
「唔似!!!」
 
「咁…唯有再諗辦法啦」
 
邊到會仲有人信d咁舊嘅橋段架!!而家咩年代呀?其實你直接拖起我咪得囉!!我又唔會拒絕你
我地兩個都咁瞭解對方啦
 
不過Winnie並冇我地想像咁,向翹哥哥表白,但係佢黎搵哥哥嘅次數的確係上升左,甚至星期六佢都會專登搭地鐵黎西區溫書
 


我地幾個係班房內,傾緊邊個負責買野食之類,我地班5A,係會同OV佢地5C班一齊去石澳(方便OV同Vincent呀)
 
「唔….班Queen屎仔又係去石澳,會唔會唔夠爐燒野食架」
 
「唔……我地班要4個,OV妳到要4個,加埋老師要1個…唔….」
 
「佢地會唔會唔燒野食,只係去玩架」
 
「以我所知,一定唔會囉」OV已經用電話問緊Vincent佢地班嘅計劃
 
為左有足夠燒烤爐,我地決定咁做
 
「黎啦,哥哥呀,你地成班大男仔攬埋一舊燒啦」
 
「喂喂,我地成班攬埋一舊就唔係燒野食咁簡單架啦」


 
「但係我地怕唔夠爐呀」
 
「妳地真光要幾多個呀?」
 
「唔…..你預…..8個啦,我地今日分左10人一組,兩班加埋60人」
 
「唉…我幫妳地搵定爐啦」
 
「搵定?」
 
「妳地係學校集合嘛,不過我地成班男仔自己入去,我可以幫妳地霸定爐先」
 
「真係?咁多謝你先啦」
 
「有咩獎勵?」
 
「你都要獎勵架咩?」
 
「要架?」
 
“啜!”我錫左佢塊面一下
 
「獎勵左啦」