我倆的緣份，於半世紀前已經開始: 代替姨姨的表演

「各位…英華同學，大家都知道，我地有兩位老師係彈鋼琴上呢，就好叻嘅，咁佢地呢，又係我地校長手下嘅得意門生，即係我地大師姐啦」
 
「咁兩位老師又有咩特別呢?難道佢地真係著返套校服出黎?」
 
「我相信佢地應該著唔落啦掛…..一個生左三個小朋友，另一個又生左個女」
 
「喂，妳地唔俾兩位老師日減夜減架?」
 
「係囉，連男仔都覺得女仔生完會努力減肥，妳地唔可以咁睇妳地自己老師架喎」
 


「唔…不過呢，當年佢地係表演3人6手鋼琴喎，但係得兩位老師，點表演呢?」
 
「不如先睇睇當年佢地嘅片段先啦」
 
screen中播出左媽咪同兩個契媽表演嘅片段
 
三個孖辮妹係到彈琴，真係好夾好齊
 
「各位，係咪好犀利呢，不過中間呢位師姐呢林雪凝老師嘅妹妹，林雪晴，佢係一位物理治療師，咁佢實在太忙，抽唔到時間出黎，咁呢，我地其中一位老師就搵左個幫手嘅，不過好奇怪，佢唔係我地英華嘅同學」
 


「下?點解呀?」
 
「呢層我都唔太清楚，不如我地睇完表演先問問啦」
 
「好啦!!有請佢地出場啦好嘛?」
 
「佢地應該一個個出黎彈一段先嘅」
 
「呀…Clodulf….你媽咪…係咪又係賭神音樂呀?」
 


哥哥係台下嗌出黎
 
「你咪呀!!一陣佢今晚嬲得滯唔煮飯就大鑊」
 
首先契媽行出去，彈左一小段出黎
 
然後媽咪走出去夾準契媽，變成4手聯彈，果一刻已經全場掌聲不絕
 
然後，就到我啦……
 
我一出場果時，俾全場嘅驚喜可以係最大，已經間接話俾人知道，我同英華兩位老師係有關係
 
我地三個好熟咁彈出左，鐘(李斯特)
 
不過其實跟上佢地兩個真係好難，而且呢首只係熱身…..係熱身咋!!!


 
第二首要黎啦!!!
 
唔係太難嘅土耳其進行曲者…..真係唔太難，不過係跟到出汗咁之嘛
 
但係媽咪同契媽仲可以唔出汗咁彈
 
佢地兩個究竟係咩人黎架
 
所以我係空檔時望一望台下，發現哥哥已經唔見左，喂!!呢個咩男朋友黎架
 
係第二首歌完左之後，全場掌聲不絕
 
我都差d攰到死咁滯，差d虛脫
 


「兩位老師洗唔洗休息下呀?呀……Charlotte，妳好似就虛脫啦喎」
 
我示意唔洗，不過媽咪就幫我抹一抹汗…契媽好識做咁讓一讓俾大家見下媽咪溫柔嘅一面
 
然後….係後台有枝水遞左出黎俾我地
 
原來….係哥哥走左去拎水
 
估唔到….佢又真係幾細心喎
 
我係飲水果時，媽咪再幫我整一整個頭
 
「夠甜啦?第三首啦喎」
 
「嗯」