【純愛】想要成為你的一半: 第五十五章

「Uncle 我係認真 唔係玩玩下 我想娶你個女
雖然我地一齊左唔係好耐」

「好 夠坦白 我鍾意 如果阿女同意嘅 我地都無問題」

又估唔到Chloe爹哋會咁爽快。

「真係可以？」

「係 以我所知 你父母都ok 咁就無問題啦」



「多謝你地」

「不過如果你對我個女唔好 到時可能我會反對㗎」

「放心 我一定會對佢好好 唔會令佢唔開心」

「咁啊 我有啲說話要同風仔單獨講 風仔你跟我嚟書房」

「爹哋呀」Chloe好似唔係幾放心。



「乖女 你俾佢地傾吓啦 」Chloe媽咪細細力拉住佢。

「係囉 爹哋唔會食左你男朋友嘅」

「咁好啦」


我跟Chloe爹哋去到書房。



「其實有啲野係關於我個女 但我唔想佢聽到之後會唔開心 咁所以 你明啦」

「我明白」

「佢之前拍過幾次拖 都有啲唔係咁好嘅經歷 我諗你都知」

「我淨係知佢上一個男朋友好似有第三者」我點一點頭。

「無錯 其實佢每次拍拖都係遇到呢啲事
我地都好擔心佢會唔會對愛情無左信心 以後都唔敢再拍拖」

「不過而家睇嚟我地嘅擔心都係多餘 佢終於搵到個好男仔」
佢望住我笑。

「唔係啦 我都成日激嬲佢㗎 俾左好多麻煩佢」



「不過我好耐都無見過佢咁開心 同你拍拖之後
佢個人開朗左好多」

「係咩 估唔到我竟然會影響左佢咁多」

「係呀 所以我地好放心將個女交俾你」

「放心 我一定會對佢好好 俾到幸福佢」

「唔怕同你講 當年我同佢媽咪都係拍左一年拖就決定結婚
因為呢樣係講求兩個人有幾了解同遷就對方」

「係嘅 我知道點做 好多謝你同我講咁多」



「乜說話吖 我都盡返做爸爸嘅責任啫 我地出返去啦」


一出返去，Chloe就即刻走過嚟捉實我。

「點呀 爹地同你講左啲咩」

「無呀 講你啲衰野咋嘛 佢俾你細個啲相我睇
唔怕同你講 真係有啲驚嚇」我對Chloe爹哋眨一眨眼。

「哦 係呀 你細細個一啲都唔似女仔 咁鬼粗魯
好彩而家都嫁得出」Chloe爹哋加多把口。

連Chloe媽咪都忍唔到笑埋一份。



「喂呀 有無搞錯呀 你地夾埋蝦我」