全實景系列《香檳大厦 1:55 am 行人止步》重製版 (已完結): 第二十六章(下)：【終極的惡靈】

「您……認識雷萬鈞？」黃經理試探式嘅詢問，希望係眼前幾近腐爛嘅杜鳳琴身上，搵到答案：「您同雷萬鈞……係一對戀人？」
　　　
聽到雷萬鈞個名，杜鳳琴又靜了下來，喉頭卻發出嗯嗯般嘅小聲，所有激烈嘅動作都停止了。
　　
黃經理將佢對杜鳳琴嘅猜測逐點向佢求證：「但……困你喺呢個籠裏面嘅…都係雷萬鈞？」
　　
杜鳳琴垂下了頭，貼著箱面，一動也不動。「佢點解要鎖住您喺度？」黃經理再追問。
　　




後面嘅德哥一直留心黃經理嘅提問，除咗驚訝眼前嘅籠中人居然係一直聽到佢地描述嘅杜鳳琴之外，佢亦留意到旁邊有幾件行李，其中一件有點面善。
　　
「攝喺中間嘅喼同頭先走廊嘅喼好似一樣……」德哥暗忖。
　　
杜鳳琴聽到黃經理問嘅最後一條問題，突然又「活」過來，抬起頭瘋狂咁扭動自己軀體，甚至乎猛力搖動，鐵籠都隨之而郁動。
　　
喺杜鳳琴沒有眼珠嘅空洞眼框之中，有兩行血流出來，劃過蒼白兼腐爛嘅臉上。
　　
狀甚淒涼。
　　　　




鐵籠連木箱都被激動中嘅杜鳳琴搖出來，一點一點咁移前。
　　　
「杜鳳琴…杜鳳琴…您冷靜啲先…」黃經理叫都叫唔住，佢無諗到呢個問題會令杜鳳琴產生近乎癲狂嘅反應，從杜鳳琴嘅反應中，黃經理似乎問對了問題。
　　
慈善王雷萬鈞將歌星杜鳳琴鎖於杜鳳琴自宅內。時間不詳，原因不詳。
　　
由佢見到個鐵籠嘅鐵枝上印住「捷禾」二字起，呢個奇怪嘅想法悠然而生。
　　　
「捷禾」係雷萬鈞出身嘅煉鋼廠，雷萬鈞係煉鋼工人起家，能夠攞到鐵枝，懂得點焊技術一點也不出奇；雷萬鈞曾經同杜鳳琴拍過拖，而杜鳳琴又係獨居，雷萬鈞能夠出入杜鳳琴居所亦有可能；杜鳳琴係宜家嘅香檳大廈出現，意味住現實中嘅佢已經因為某種原因死了，係自殺？被殺？同雷萬鈞有關係？
　　




根據蘭姐佢地嘅說法，杜鳳琴由1962年12月開始失蹤，外界只係一直以為佢係失蹤，或者離開咗香港，但似乎杜鳳琴已經死咗嘅消息，應該一直無人知道。而雷萬鈞曾經同杜鳳琴拍拖，應該都喺佢出人頭地之前，否則點會無人知，似乎佢連自己嘅自傳入面，都隱沒咗呢一件往事。是否刻意忽略？
　　
將呢啲消息東拼西湊，黃經理得出呢個結論，不過佢並唔可以喺杜鳳琴口中得到親口證實。
　　
「黃生……黃生……我地要走喇！」德哥再次叫喚黃經理，並壓低聲線：「頭先會郁嗰隻喼…喺度啊！仲唔走我怕走唔切！」
　　
黃經理被德哥嘅說話轉移咗視線，環顧周圍，令人驚嚇嘅係，喺衣車旁放置了幾件行李，其中一個紅色喼正在緩緩地褪出來。
 
黃經理退後，同德哥一齊黐實後面嘅牆，唔知幾時，房嘅木門關上了，黃經理背住堵木門反手去拉一拉個木鎖。
　　
「鎖咗？唔係嘛！」黃經理慘叫了一聲。
　　
如是者，黃經理、德哥同半迷半醒嘅阿Ken被困喺間房內。杜鳳琴仍然不斷發瘋咁掙扎，而個紅色行李喼整隻已經移動了出來，停喺杜鳳琴個鐵籠旁邊。
　　
「咔嚓」一聲，隻紅色喼垂直地打開了，由於開口方向喺後面，黃經理佢地睇唔到喼內有乜嘢。




　　
雖然睇唔到喼內情況，但佢地都見到有啲嘢從個喼入面跌落地下。
　　
又係一堆黑色物體，鬆散地鋪在地上。
　　
德哥同黄經理緊張到停止呼吸，此刻，阿Ken似乎都知道有啲唔尋常，用力地打開一絲眼縫睇下發生乜嘢事。
　　
地上嘅黑色物體緩緩地堆疊起來，佢地更清楚睇到啲黑色嘢係由好多嘅布條，組成一幅大布，形狀就好似有嘢喺布入面撐起身，慢慢站起來。
　　
如此怪異嘅情景，黃經理同德哥都係第一次見。
　　
塊散亂嘅黑布一直撐起來，直到跟黃經理差唔多高先停止，隱約可以見到黑布裡面真係罩住咗一個人，或者係人嘅物體。
　　
與其話係黑布下面有一個人，應該咁講，似係一個人披住一塊大嘅黑色斗蓬。
　　




德哥感覺到身旁嘅阿Ken突然一陣震動，雙腳用力撐後，德哥冷不防手滑，阿Ken直跌到地上。喉頭間發出低沉嘅咽嗚聲。
　　
「鬼……鬼……」阿Ken勉強發出一個音節，但仍然清晰。
　　
阿Ken下意識地亂踢地面，希望可以向後退去，無奈後面已經係牆，無處可逃。
　　
黃經理立即踎下去扶起阿Ken，阿Ken嘅「鬼」字不絕於耳。
　　
即使唔駛阿Ken講出聲，黃經理都意識到眼前呢堆冒起嘅物體係乜嘢。佢同阿Ken喺閉路電視嘅錄影片段中見過。
　　
那個頸椎折斷的人。
　　
只係宜家更實在咁出現喺黃經理面前。黃經理緊抱住阿Ken，反手更用力去扭動個門鎖。
　　
突然，那個斗篷左右搖動了一下，一副蒼白且瘦骨嶙峋嘅面孔， 用一個怪異嘅姿勢「轉」了過來。




　　
德哥從來都未見過咁恐怖嘅人，蒼白嘅皮膚鼻尖而鈎，兩眼嘅眼珠大得出奇，皮膚卻是光滑無比，咀大但唇簿，似笑非笑咁，上下兩排牙齒又尖又長，歪歪斜斜，參差不齊。
　　　
嗰個人突然側住頭咁望住德哥佢地，伸出一隻白色，睇上去似就嚟枯萎嘅手，伸向杜鳳琴，五隻修長嘅手指連手掌按喺佢頭上。
　　
原本喺鐵籠掙扎中嘅杜鳳琴一下子就垂低了頭，靜止不動。　
　　
心急嘅黃經理仍然喺到扭住門鎖，門鎖一啲想打開嘅跡象都無。雖然心裡驚恐，但黃經理嘗試睇下有無其他方法解決宜家嘅困境。
　　
「對話。」黃經理心入面想到嘅念頭。
　　
雖然呢個諗法似乎係妙想天開，但既然無人知道點樣走，倒不如問下啲唔係人嘅「人」。
　　
黃經理大力吸了一口氣，忍著惡臭嘅味道，向住那個頸椎折斷了嘅人說：「朋友……我地無惡意架……我地只係想離開呢幢大廈，您可唔可……高抬貴手，放我地走呀。」
　　




那個人只係側住頭，繼續望住佢地。佢嘅眼珠實在太大，黃經理甚至唔知佢到底望緊邊個人。
　　
「我保證……我保證……我地靜靜咁離開，唔會阻到您地任何嘢……」黃經理唔清楚佢究竟聽唔聽得明，但講咗先。
　　
黃經理說完，嗰個人仍然無動靜。
　　
德哥聽到黃經理同眼前呢個人唔似人鬼唔似鬼嘅物體求情，覺得好匪夷所思，佢望到黃經理手上仍然握住支膠棒，腦海閃過一思畫面：「直接攞枝棒打過去，然後奪門而出。」
　　
正當德哥盤算完畢之際，一把低沉之極嘅聲線響起來：「你想……用枝棒打我？」。嗰個人嘅咀並沒有郁動，但聲音卻明明係由佢身上發出。
　　
嗰個人移動了少少頭部，正正的望住德哥，嚇到德哥郁都唔敢郁。
　
德哥無諗過佢嘅打算，居然會被那個人直接說穿。
　　
「唔係架唔係架，我地只係想走架咋，我保證我地真係唔會打擾您，您放我地走啦！」黃經理唔知道點解佢會咁講，但為咗可以離開，只能夠講啲好聽嘅說話。事實上，黃經理都唔知德哥盤算緊啲乜嘢，但唔知點解會畀嗰個人知道。
　　
「保證？」那個人仍然側住頭：「已逝之人談何保證？」
　　
黃經理聽到那個人咁講，心都實埋。聽到有其他「事物」來證明自己已經死去，實在係好難接受。
　　　
「你……你到底係……乜嘢？」黃經理啞口無言之下，提問道。
　　
「我係乜嘢，對你地嚟講根本唔重要。」嗰個人把頭側向另一邊：「從前嘅人會叫我做『邪』、『穢物』、『惡者』、『波旬』、『阿里曼』、『梅菲斯特』、『路西法』……」那聲音停了一停，再繼續：「或者，一個你地耳熟能詳嘅名字 - 『魔鬼』……」
　　
「魔鬼」二字，原本對黃經理來說實在係太無稽，對於無任何信仰嘅佢，死後嘅概念本應就係一張白紙，死了就係死了，只係一個生命體的消失，一種能量狀態嘅轉換，對黃經理來說，生死原是很科學嘅嘢。
　　
直到佢不明不白咁進入咗咁奇怪嘅香檳大廈後，經歷咗各種恐怖嘅事，甚至了解到自己原來已經死亡，成為咗一個佢從來都唔相信會有嘅「亡靈」，被困於俗稱「枉死城」嘅一個空間，碰上了來自不同年代嘅靈魂，如今喺呢度仲遇到自稱「魔鬼」嘅物體。黃經理不能不承認，原來死亡，並不會把一切都終結。
　　
黃經理深深吸了一口氣，然後慢慢咁呼吸，佢想用呼吸讓自己混亂嘅思緒冷靜下來。
　　
那個人伸出了另一邊手，好生硬咁郁動纖長蒼白嘅手指：「……其實更正確嚟講，我只係一個商人，而你地都只係協議生效嘅一部份……」佢原本嘅手，仍然按在杜鳳琴頭頂上。
　　
「無論如何。黄兆初，歡迎嚟到死後嘅世界。」那個人居然露出了詭異嘅笑容，並直接叫出了黃經理嘅名字。
　
黃經理心底嘅寒意比之前更甚，眼前嘅「魔鬼」似乎係呢個空間嘅主宰。但黃經理唔明佢地嘅死，同甚麼「協議生效嘅部份」有乜嘢關係。
　
「我唔明白你講緊啲乜嘢。」黃經理反駁說：「我知道……我已經……死咗。」黃經理講嘅時候異常地冷靜：「但……幻燈片中……並無佢嘅死亡報導，或者您……係咪可以……放過佢一次……呢？」
　
黃經理托一托起身邊迷糊嘅阿Ken，向那個人示意。
　
「又或者……我可以同佢交換嗎？」黃經理提出。
　
「哈哈哈哈……」那個人陰森地笑道：「交換？你憑乜嘢可以同佢交換啊？」
　
「我……我放棄離開呢度，換回佢返陽間嘅機會。」黃經理用懇切嘅眼光望住那個人。
　
「何解你咁天真以為你有機會離開呢度……」那個人笑得更大聲：「你應該記得，凡死於非命者，死後皆往枉死城，直到原本陽壽皆盡才能離開，而自殺者則墜枉死城，永無離開之日……」
　
「 你應該記得吧，你媽媽已經同你講過了，黃兆初。」那個人銳利嘅目光掃向黃經理。
　
「你搞錯咗啦……黃生佢地……都係畀人害死架，所有報導我都睇過不下十次，黃生的確係畀個看更害……」德哥嘗試幫口，佢望一望黃經理，卻發現黃經理，眉頭緊鎖，沉沉地低下頭。
　
「黃生？」德哥叫了一叫黃經理。
　
「自殺。」曾幾何時，黃經理以為已經可以忘記咗件事……
　　
就喺黃經理媽媽嘅喪禮後第二日，佢被包租公發現昏迷係房間內，手上仍然握住枝紅酒樽，旁邊有大量藥樽。包租公大驚之下報警。黃經理被送入醫院，醫生幫佢緊急洗胃以及做血液透析先成功將佢喺鬼門關邊緣救回來。佢喺醫院住咗差不兩個月，無通知過任何人，就只有包租公每日去探佢。
　　
呢一段黑歷史，只有佢自己、包租公同埋醫院知。黃經理出院之後，包租公好好人，繼續畀佢租住，而且仲好關心佢。包租公膝下猶虛，慢慢地將黃經理當咗做自己個仔咁。亦都因為包租公嘅照顧，黃經理先走得出喪母之痛。
　
「曾經自殺嘅人，憑甚麼用自己污穢而墜落嘅靈魂與人交換。」那個人說話中嘅每一個字，就好似一下一下嘅巴掌咁摑落黃經理面上。
　　　
「想救人？你唔配。」那個人一字一頓咁講。
　　　
「咁……你困住我地喺度……想點樣呀？」德哥戰戰兢兢咁問，手中膠棍仍然緊握在手。
　　
「困住你地喺度嗰個，唔係我……」那個人頓了一頓：「而係杜鳳琴。」佢抓住杜鳳琴嘅頭抽起來，兩個深陷嘅眼窩直對住黃經理佢地。
　
嗰個人繼續說：「再者，將你地靈魂帶入嚟嘅人，都唔係我。」
　
「我需要靈魂，只要有人提供到靈魂，佢就可以得到佢想要嘅嘢……」那個人又放鬆了係杜鳳琴頭頂嘅手，不斷地撫摸著她的頭髮，一邊述說著：「呢樣就係協議。」
　
「魔鬼契約。」黃經理喃喃地吐咗四個字出嚟。
　
的確，黃經理心頭閃起了一個曾經聽過嘅名詞。
　
呢個名詞係一篇古老嘅文學作品上面出現過，黃經理以前係大學上外語課時，就正正讀過呢篇大作，來自德國文學家歌德嘅《浮士德》。篇文學作品係講述一位叫浮士德嘅博士，嫌自己嘅學術研究令到自己生活枯燥，結果用自己嘅靈魂跟魔鬼換取情慾、快樂、痛苦、悲哀嘅經歷，體驗人生七情六欲。浮士德跟魔鬼嘅交換協議，就係一個「魔鬼契約」。
　
黃經理疑惑。佢一直都以為呢一個只係文學裏面出現嘅創作。但原來現實中，真係有實實在在嘅魔鬼契約出現。那個人提到靈魂交換協議，就如同文學鉅著中浮士德跟魔鬼嘅契約一樣。
　
黃經理同時都感到好混亂，從來都唔相信鬼神嘅佢，死後嘅世界原來並非如黃經理想像般乜嘢都冇，反而係塵世中聽過嘅所有認知，交集在一起。
　
另一邊，德哥亦感到震驚，佢從來冇聽過乜嘢魔鬼協議 ，但宜家佢意識到自己嘅死亡，原來只係人地一宗交易，心入面既驚且怒。
　　
「我同人無仇無怨，到底係乜嘢人嘅交易？非得要令我死！」德哥心中嘅火慢慢燒出來，佢想起那年那晚嘅裝修，亦係佢死亡之日，佢永遠都記得那個看更陰沉嘅臉孔。
　
「就係個死看更同你做交易嘅？」德哥追問那個人，拳頭從來未有好似宜家咁握得咁緊。
　
「呢個你地無需要知。」那個人退後了一步，杜鳳琴嘅木箱子同時一齊褪後，就好似喺冰面上滑過咁，寂靜無聲。
　
「唔係個看更，真正同你交易嘅人係雷萬鈞！」黃經理係混亂嘅思緒中恢復過來。
　
黃經理望住籠中嘅杜鳳琴，突然一下子就明白晒成件事。
　
「雷萬鈞能夠成為富豪，並唔係偶然。」黃經理徐徐地解釋：「魔鬼契約中，作為人類嘅一方，必須要出賣自己靈魂，先可以得到魔鬼嘅協助……」
　
「好明顯，雷萬鈞係你嘅協議中獲得嘅嘢係名利同財富。」黃經理指著那個人說。
　
那個人沒有出聲，把頭側向另一邊。
　
「而你想得到嘅，就係佢嘅靈魂。」黃經理繼續講。
　
「講得幾好，請繼續。」那個人又張隻白骨咁嘅手，撫摸住杜鳳琴嘅頭髮，佢每掃一下，杜鳳琴都不由自主咁抽搐一下，就好似被電擊般。
　
「為咗財富，雷萬鈞甘願出賣自己靈魂……」黃經理望了一望杜鳳琴，再望向德哥，德哥一面難以置信嘅神色。
　
那個人嘅咀角翹起來，就好似嘲笑著黃經理嘅推理似的。
　
「唔係……唔係唔係唔係！雷萬鈞根本就唔係出賣自己靈魂！由頭到尾佢都係出賣其他人嘅靈魂畀你！」黃經理剎那間感覺到天旋地轉，佢想到了。
　
「哈哈哈哈……你總算諗到了。」嗰個人笑得更大聲，詭異嘅笑容裂得更開。
　
「雷萬鈞為咗得到名利同財富，交上嘅靈魂就係杜鳳琴！」黃經理講完之後連自己驚訝，雖然之前佢已經估到係雷萬鈞困住杜鳳琴係個籠到，但佢諗唔明動機係乜，由其係睇返出面大廳嘅相。佢地二人就好似天造地設嘅一對，根本就唔似會害死杜鳳琴嘅人，而且仲要係近乎虐殺嘅程度。
　
杜鳳琴聽到黃經理叫喊嘅內容，用力地掙紥了一下，然後又被那個人按住。
　
「呢個……就係杜鳳琴失蹤嘅原因？」德哥想確認佢無理解錯。
　
「雷萬鈞無讀過書，而且只係做銲工出身，佢憑乜嘢可以短時間內做到一間鋼鐵廠嘅總經理。」黃經理按佢嘅認識來分析：「蘭姐佢地講過，杜鳳琴係1962年嘅12月開始失蹤，而雷萬鈞1963年就成為咗捷禾鋼鐵廠嘅總經理，時間未免太過巧合吧！」
　
「要發達都唔需要殺咗自己女朋友咁賤格，殺人係犯法架！殺咗人令自己上位，佢個心安樂咩？」德哥覺得成件事恐怖，佢冇諗過富甲一方嘅富豪，原來都係用呢啲咁邪門嘅手段，令自己成功。
　
「對於當時人嘅協議，只涉及到我跟佢所約定之內容，至於佢如何達成協議內容，以及其他人間相關嘅因果及風險，並不在協議之內，當時人須要自行承擔。」那個人仍然無直接回答當時人是否就是雷萬鈞：「……保密亦包括係協議之內。」
　
「如果杜鳳琴已經被雷萬鈞害死……」黃經理繼續想：「交易理應完成，點解去到2016年仍然有人被刻意殺害？」佢記得相關佢嘅死亡報導，香檳大廈連還兇殺案被發現嘅被害人數，最少有34人。
　
「最少34人死亡……」黃經理碎碎唸著：「34個靈魂……為何要係香檳大廈…… 其他因意外死嘅靈魂呢……財仔毛毛佢地都唔係被蓄意殺害…… 點解佢哋又會被困喺香檳大廈……」
　
「我需要靈魂，只要有人提供到靈魂，佢就可以得到佢想要嘅嘢……」黃經理重複著那個人剛剛嘅說話。
　
「 如果……呢個協議唔止係單一次……而係一段時期，或者講……係雷萬鈞嘅一生……只要佢不斷提供到靈魂畀魔鬼，個協議就應該會繼續生效？」
　
「雷萬鈞已經係一個富豪，唔可能再親自殺人……一定係有人幫佢做呢個勾當……甚至唔止一人……個看更阿伯係佢嘅劊子手可能性好大……」黃經理想得出神。
　
「你再多想又有何用呢？終歸改變不了你地死了嘅事實。」那個人似乎又再讀取黃經理嘅想法。
　
「你錯了，無人想自己死得不明不白架……」黃經理說：「係，我係自殺過，喺你角度或者我係甘願放棄生命，唔抵可憐。」
　
「但當我喺醫院再次睜開眼嘅時候，我知道自己死唔去，我就明白到既然上天唔畀我死住，一定係有啲原因。」黃經理吸了一口氣：「我睜開眼見到銘叔叔懇切咁望住我，令到我醒覺。」
　
「康復之後，我第一件去做嘅事係睇精神科醫生，我知道我要正視抑鬱症呢個情況，唔可以再畀佢拖跨我。銘叔叔好好人，每一次我覆診都陪我去，又陪我傾好多嘢。一年半後，我好感恩無再受精神病困擾。」
　
「之後我好努力返工，夜晚進修，最後終於畀我攞到個輔導學位，搵到一份可以幫人解決問、解開心結嘅工作……」黃經理一口講到嚟度，停了下來。
　
「我好積極去幫人，倒頭來真係死咗仍然要困喺枉死城。唔通我做咁多嘢都抵消唔到我自殺過一次嘅罪？」黃經理說得激動，兩行眼淚濕透了臉旁。
　
「我宜家都唔要求我自己……還陽，我只係想換返我同事出返去啫，你要留我喺度幾耐無問題，我只係想阿Ken佢可以離開，咁都唔得？」黃經理叫喊著。
　
那個人沉默了半响，然後說：「抱歉，呢度嘅定律，並唔係我管轄範圍之內嘅事，自殺者永墮枉死城一事並無法改變， 因此你並無交換嘅條件！」
　
激動過後，黃經理感到頭暈轉向，覺得有氣無力般：「你……要咁多靈魂嚟做乜嘢呀？」
　
「係啦，你要同雷萬鈞交易，要我地嘅靈魂做乜呀？」德哥插把咀埋嚟問。
　
「無意義嘅問題！」那個人揮了一揮右手嘅黑色袖，再次放返係杜鳳琴嘅頭上，再次側住一邊頭望住佢地。
　
又停了半响，那個人嘅聲音再次響起： 「其實你地嘅死，同你地條問題一樣，都係無意義！」那個人回應。
　
德哥眉宇間堆了起來，一時三刻聽唔明白佢到底講乜嘢。
　
但黃經理繼續追問：「你意思係話，我地嘅靈魂對你嚟講係無意義？你根本就唔需要我地靈魂？」
　
「我同雷萬鈞嘅交易，係要佢奉上靈魂，但我可沒有拿走半個生命來換取靈魂，所有嘢都係雷萬鈞自己決定。」那個人解釋。
　
「人類嘅邪惡，就係會為咗滿足一己私慾而不擇手段，做出難以想像嘅事。」那個人頓了一頓，繼續說：「 越貪得無厭者，越奉獻更多靈魂， 其本身靈魂則會越墮落。」
　
剎那間，黃經理終於都恍然大悟。
　
「其實雷萬鈞先係你最終目標，所以你一直引誘佢走向墮落嘅深淵，而你令佢走向墮落嘅方法就係…誘使佢不斷殺人，奉獻亡魂？」黃經理冷靜地說出來。
　
「你放縱了一個殺人魔頭！」德哥對住那個人咆哮著：「你知唔知因為佢，害死咗幾多無辜嘅人呀？」
　
「我只知道生死有命，每個人有幾長命已經係定數。」那個人淡淡地說著：「其實我都要多謝你地，無你地嘅死亡，呢件事都唔會完成到。」
　
「我搵咗好耐先搵到個好似雷萬鈞咁冷漠嘅靈魂，唔好好引誘佢，又點令佢成為墮落嘅黑靈魂。」那個人繼續說：「我輸過一次，我知道今次我一定唔會再輸。」
　
「輸？」德哥唔明白。
　
「魔鬼同上帝打賭人類嘅本性，浮士德選擇向魔鬼出賣了自己靈魂，以換取佢想要嘅嘢，但最後浮士德嘅靈魂仍然係被上帝提走。」黃經理記得原本嘅故事係咁記載。
　
「浮士德根本算不上係可造之材，佢嘅靈魂太軟弱，墮落不來。」那個人對浮士德嗤之以鼻：「 對比起浮士德，雷萬鈞表達嘅手法精彩得多了……」
　
那個人邊說邊拍著杜鳳琴個頭。
　
「但我估唔到杜鳳琴對於雷萬鈞出賣佢嘅怨恨係咁强烈，强烈到令呢度都改變了。」那個人繼續說：「呢個就係你地被困喺度嘅原因。」
　
「你話係杜鳳琴困住我地嘅靈魂喺度？」黃經理一臉詫異。
　
「杜鳳琴嘅怨念，扭曲咗原來嘅香檳大廈，甚至影響部分同樣有怨念嘅亡魂，令呢度變成一個陰間煉獄，所有亡魂有入無出。」那個人微笑著說：「……被摯愛嘅人背叛，施以極刑虐殺，中止了如日方中嘅事業，杜鳳琴有咁強烈嘅怨恨，的確能理解。」
　
「人性……」那個人停了一停，嘆道：「果然醜惡。」
　
如果黃經理冇聽錯，那個人居然嘆息了一聲。
　
「醜惡得過你？就係因為你同佢呢啲無聊嘅打賭，我地就咁畀你間接累死！」怒火中燒嘅德哥忍無可忍，一手搶過黃經理手上枝膠棒，對住那個人順手甩出，膠棒直飛過去，「呯」的一聲打在那個人身上。
　
太突如其來嘅一擊，似乎連那個人都估不了德哥嘅舉動，即使知道都閃避不來。
　
德哥不單止飛出膠棍，甚至衝上前欲撲向那個人身上。而正當德哥衝前了一步之際，一聲撕心裂肺嘅尖叫聲響起來，聲音之大嚇剎了德哥嘅衝動。
　
發出叫聲嘅唔係其他人，正正就係困入面嘅杜鳳琴。
　
「停手啊！」黃經理見到杜鳳琴面容嚴重扭曲，彷彿受到極痛苦嘅煎熬，那個人按在杜鳳琴頭上嘅手，手指全都掐入杜鳳琴頭髮底下，好明顯，那個人正在用力揑著杜鳳琴頭蓋骨。
　
剎那間，黃經理感覺到房間起了微細嘅變化，德哥似乎都感覺到有古怪，退後了一步企返去黃經理旁邊。
　
房間四面牆嘅牆身油漆開始剝落，並滲出紅色嘅液體，空氣中除了已經習慣咗嘅臭味外，仲多咗一陣血腥味。
　　
「弊！」黃經理心知不妙，佢抽起阿Ken腰間褲頭，直接轉新向木門起腳踢。
　
牆身漆油剝落哂，唔止漆油，甚至連內裡石屎都一塊塊咁碎落，露出生銹嘅鋼筋。
　
木門踢兩踢就被黃經理踢開，黃經理匆忙地扶住阿Ken退出房間，發現短走廊同大廳嘅牆身同樣都在剝落退色，眼見之處所有地方只有一堵堵鋼筋做嘅分隔，儼如一個個監倉嘅鐵圍欄般。
　
而黃經理剛剛退出嚟嘅細房間，亦開始成了其中一個監倉樣，隔住鐵圍欄望入去，那個人側著頭對住黃經理笑著，而杜鳳琴仍然喺度痛苦咁叫著。
　
黃經理知道呢個異變隨之而嚟有乜嘢出現，佢經歷過兩次，每一次都被追趕得走夾唔唞。德哥卻並唔知道發生乜嘢事，仍然左顧右盼咁望住四周嘅變化。
　
「德哥！黃生！」一把女聲係不遠處叫著。
　
黃經理聽到有人叫佢地，循聲而望，毛毛、Fiona同曉兒就係無幾遠嘅地方。
　
黃經理同德哥拖住阿Ken快速走過，但發現只能隔住鐵圍欄望到Fiona佢地。
　
「發生乜事啊？點解變晒咁架？」毛毛一面驚慌失措，而Fiona則一手抱住曉兒，一手捉住鐵圍欄望住黃經理。
　
原本單位內，左右兩邊都能通往大廳嘅走廊，喺異變之後，右邊走廊多了一道鐵圍欄隔住了，毛毛同Fiona佢地就只能夠隔住圍欄同黃經理對話。而Fiona佢地身處嘅短走廊另一端，卻開通了。
　
「聽住！」黃經理爭取僅餘嘅時間同毛毛佢地講：「只要有路就走，唔好停留。」黃經理喘著氣：「返去錢虹裡面，唔好出嚟，等到我地返嚟！」
　
「咁你地呢？你地點呀？」Fiona急切地問，顯然覺得非常擔心。
　
「我同德哥先送阿Ken走，之後就返嚟搵您。」黃經理回道。
　
「唔好！有機會走到嘅你地就走啦，唔好返轉頭呀！」Fiona雖然不捨，但態度堅決。
　
旁邊嘅毛毛都毅然點頭：「您地走到出去再搵人嚟救我地啦！」
　
此時，一道類似生銹鐵閘嘅拉閘聲刺耳地傳出來。一眾人立時靜止下來。
　
「噹噹……噹噹……噹噹……」
　
繼拉閘聲之後，一下一下鏗鏘嘅敲擊聲喺空洞嘅「監倉」之間傳出。
　
黃經理望實Fiona身後被延長了走廊，忽明忽暗嘅走廊之中，黃經理睇唔清係咪有嘢出行緊出嚟。
　
噹噹聲一下又一下咁發出，就好似金屬敲打著金屬嘅聲音。
 
「兆初！」Fiona凝神咁望住黃經理後面，突然叫道：「喺你後面啊！！」
　　
德哥同黃經理扶住阿Ken猛然向後轉身，深深吸了一口氣。
　　
一個身型高大且肥胖，頭戴燒焊鐵面罩，一件染滿血嘅圍裙，左手拿住一把大牛肉刀嘅怪人，正從另一邊嘅走廊步出，地上滲滿血水。
　　
隨住個豬肉佬行出嚟，鋒利嘅大刀正一下一下咁掃過旁邊嘅鐵欄上，清脆如金鐘貫耳
　　
噹……噹……噹……噹……
 
(待續)