一個香港留學生在美國的生活: 租屋（1）

Sundance響70年代初開業，係一間Family Owned老牌扒房，日日客滿，響呢一區好有名。我同Aaron坐低開酒點菜，跟著就一本正經咁同我講「你做Property Management，響呢頭附近有冇平屋租？如果我搵埋你夾份租，有冇得平啲？」「做咩？Lisa趕你出街？」「唔係，幫朋友搵屋，個賣雪榚妹呀，Phoebe，記唔記得？」「你唔係真係溝人呀？老婆啱啱先大肚！」「老婆大肚同溝女係兩回事。」「你因住玩出火！」「咁多年出過事未？冇吖嘛！」「咁你想點先？獨立屋就冇啦，就算有都唔會平，Apartment嘅話，你要租幾大幾多間房？地區呢？有冇Budget？」「最緊要平！老實同你講，係我打算出錢租地方畀佢住。」「你打算包二奶？你唔係儍撚咗呀？」「你就儍撚咗！我講真㗎，條女都OK！」「住得咁近，出事你死得啦！」「邊有咁易呀！老老實實，你有冇平價單位出租先？」「最平One Bedroom都要二千五啦，冇得再平啦！」「咁貴？一年咪三皮嘢！」「你要包養條女，係咁上下啦！」「等我考慮下先！」 

 

Sundance最出名係Prime Rib，我哋一人點咗個House Cut，一塊16安士，我帶咗支95年Opus，飲飽食醉，Aaron「不如去Phoebe度食雪糕？」「睇嚟你真係沉船喎！咁依家你同佢係乜嘢關係？」「朋友。」「扑過未先？」「更係冇啦！我哋只係普通朋友。」「普通朋友你幫人畀租？你痴咩線？」「唉，老實同你講啦，我係有想溝佢上床，不過唔成功，後來講講下講到佢要努力搵錢交租交學費，咁我咪話不如我養你，咁咪可以做我條女囉！Phoebe又ok喎，咁我咪搵你商量囉！」「睇嚟你唔只係天真，直頭係冇腦！你係咪錢多洗唔哂？你就嚟做老豆，仲玩到咁大！」「唓，大把人響大陸包二奶，有乜分別！」「你有錢想點玩就點玩，總之二千五最平，冇價講，更何況我仲有個Partner，你想平你自己同Joe傾！」「咁你去唔去食雪糕呀？」「我怕咗你，我陪你去！」 

 

同平時一樣，雪糕店外大排長龍，我陪Aaron排咗半個鐘先見到Phoebe 「Hello Aaron，又嚟食雪糕，你唔怕肥咩？咦，阿偉？好耐冇見！」「Hello Phoebe，好耐冇見！」我同Aaron買咗兩杯雪糕就坐響最入面張二人枱，望住Phoebe招呼絡繹不絕嘅客人Aaron「 我肯定呢班狗公全部都係因為Phoebe先嚟幫襯！」「你真係有病，你估個個都好似你咁咩！」「你估你自己唔係！你夠胆話我知你完全冇興趣？」「費事同你講，食完啦，你走未？我走啦！」「喂，唔好走住，傾多陣，其實你有冇興趣一齊夾錢？」「咁嘅嘢你都諗到，我服咗你啦！」我跟住起身準備走人，Aaron冇放棄，由雪糕舖一直跟到我攞車，「你有冇煩啲呀！我冇興趣！走啦，拜拜！」