一個香港留學生在美國的生活: 租屋（2）

Aaron有樣好處就係鍥而不捨嘅精神，只不過唔係用響讀書同工作上。之後成個禮拜，佢不停咁打電話畀我，又或者一得閑就開成個鐘車上三藩市搵我，禮拜五晚放工嘅時候，電話又響起「我上緊嚟三藩市，你冇約吖嘛，冇就一齊食飯，去邊好呢？」「點解Lisa唔管下你呢？一日到黑都係唔響屋企。」「Lisa飛咗呀！下禮拜三先返，我今晚可以響你度瞓！」今個Weekend Amy男朋友去咗LA，我早就約咗Amy一齊過，又點可能畀Aaron響我屋企過夜！「你自己冇屋企咩？唔得！」「嗱！肯定有女，自己風流快就唔理兄弟死活！係咁呀！」「咁你想點呀？」「幫我攪掂Phoebe！不如你夾一份，一齊包起佢！返正我唔可能日日都陪住佢，一人一半時間咪啱囉！」「好啦好啦，等我諗下先！總之今個Weekend你唔再煩我！」我終於頂唔順條友日哦夜哦，死纏爛打，「咁今晚係咪食飯？我請！」「唔得閒！你食自己！」「哈哈！咁你諗諗點樣安排Phoebe，我等你消息！咁我依家去搵Phoebe先！」 

 

Aaron 收咗線，我開始認真考慮佢嘅提議，我同Joe響Palo Alto係有Apartment，有兩個單位仲搵緊租客，如果我同Joe講要留一個自用應該冇問題，不過如果真係包條女，都要睇吓乜嘢價錢，住屋有價，生活費就可以好貴。 

 

禮拜五晚放咗工直接去Berkeley同Amy食飯，之後去咗Napa一個細酒莊住咗一個Weekend，到禮拜日晚先返屋企，一入到屋就見到三個電話留言，全部都係Aaron嘅，本來我故意關手機唔聽佢電話，點知佢打到屋企留言！話口未完，手機又響起，「點呀，考慮成點呀？我同Phoebe講咗，佢話只要有地方可以免費住，佢唔介意多埋你一齊。」「我都未應承，你咁快同佢講！」「我咁了解你，你話考慮下，咪就係得囉！」「我可以搵個單租畀你，租金一人一半，不過要唔要畀埋生活費啊學費？」「佢話唔洗，佢都想自己打工搵學費。」「咁都唔算好貴，咁你同Phoebe安排，我同Joe交代一下，我留個單位畀你。」 



 

結果就係響04年暑假開始咗我同Aaron合租咗一個Palo Alto 一房Apartment包起咗個讀Stanford嘅大陸妹，直到08，即係我結婚前，佢畢業回流返大陸，呢段關係先結束。