一個香港留學生在美國的生活: 大床

過咗Final Inspection就差唔多可以搬入去住，當然仲有啲室內裝修呀，landscaping呀要做，最重要係買埋全屋傢俬電器，除咗個Grand Piano，我冇打算響三藩市間屋搬舊傢俬去Palo Alto，主要係舊屋會留返做Vacation Home，平時有機會都會住一兩日，阿爸阿媽過嚟又可以住下，而且新屋裝修偏向歐陸風格，同三藩市間Condo有明顯分別。 

 

呢間屋佔地大約半畝，即係二萬尺多啲，其中大部份係前後園，間屋本身係兩層六千五尺，屋傍有個四車Garage，另外有個細地庫大約八百尺，係個Entertainment Room加Wine Cellar，不過響City入圖則車房同地庫係唔計嘅，實際面積就係地面兩層。除咗最大嘅主人房外，另外仲有五間房，一間做書房，一間健身房，另外三間就係客房，全部房響二樓，樓下係一個Dining Room加Open Kitchen，一個Family Room 另一個係連住後園嘅客廳。客廳同後園由一塊落地玻璃幕牆分隔，可以向兩邊推開，大廳同後園就可以連成一片，行出後園，左邊係Wooden Patio，中間有個燒Gas嘅火爐，一套室外嘅餐枱同梳化，一個室外廚房同燒烤爐，而後園右邊就係泳池，個Grand piano就放響大廳嘅左手邊。整個客廳大約千一二尺左右，連後園，可以輕鬆招呼二三十人Party。 

 

我自己間主人套房係全屋最大嗰間房，連浴室差唔多千二尺，睡房外有個兩百尺左右嘅陽台，上面裝咗個按摩浴池，由於塊地夠大，四週圍又有高大杉樹環繞，所以環境非常隱密，寧靜清幽。二樓嘅間格係主人套房響右手邊，其他五間房響另一邊，今日就係送大床同部分傢俬嘅日子，我一個人攪唔掂，就叫咗Aaron幫手，點知條友臨時放飛機，好彩阿成同小諾有時間過嚟，阿成「你間新屋好大好正喎！」「多謝阿Joe幫手，我根本乜都唔識，全靠佢我先起得成！」「如果我第日要買屋改建，都可以搵你哋幫手？」「當然可以啦！」「其實我都搵隙緊屋買，準備過幾年結婚用。」「係就快手啦，依家入市係好時機。」阿成家境都唔錯，佢屋企人響加拿大都做房地產，亦都有做建築，而佢自己本身又係Software Engineer，單單自己嘅股票同份人工已經可以買樓。 



 

「阿偉，工人問你個電視櫃要點放？」小諾響二樓大叫，於是我同阿成講「我上去睇睇，呢度就麻煩你幫我響樓下睇住，等陣仲有廚房爐頭會送嚟。」返上二樓，兩個工人響主人房入面切緊床，另外兩個工人就搬緊電視櫃，小諾就企響度睇住工人做嘢，「麻煩晒你，小諾！」「唔洗客氣，反正禮拜六冇嘢做，過嚟參下你間豪宅順便偷下師點樣起點樣裝修，第日到我同阿成買屋都起碼知頭知路吖！」「到時有需要可以搵我同阿Joe。」「一定啦，點會同你哋客氣！」切床嘅工人好快已經切好，最後放埋張床褥上去，張California King Bed就攪掂，另外兩個工人都安裝好過電視櫃，去咗另一間房切其他傢俬。小諾一個飛身撲上床大字型咁瞓響度「阿偉，你一個人洗唔洗咁大張床呀！好正呀！瞓咗唔想起身！」「你叫阿成買囉！」「佢會話咁大張床瞓唔哂，嘥錢嘥地方！」「哈！咁又係喎！佢又冇講錯！」「我老公就冇你咁識享受人生！」