一個香港留學生在美國的生活: 搬琴

小諾今日著住T Shirt短褲，攤響我張大床，露咗個小腹出嚟，加上對又白又滑嘅長腿，睇到我扯哂旗，如果唔係阿成響樓下，我可能忍唔住就飛撲埋去將佢就地正法！小諾一個翻身落床「去其他房睇埋啲工人裝傢俬先，快啲裝完可以早啲去食飯！」唔洗兩個鐘，另外幾間房嘅傢俬都已經裝好，連健身房嗰幾套器材都送埋嚟，「唔該晒你兩個呀！我一個人真係忙唔過嚟！」阿成「唔洗咁客氣，你仲有乜嘢未送到？」「聽日送埋兩套梳化，後園嘅枱櫈，仲有個琴，應該差唔多。」小諾「你仲有個琴？」「係呀，響三藩市個Condo搬過嚟，放響大廳嗰度。」「嘩！原你識彈琴。」「玩玩下咁啦！哈哈！」阿成「我聽日嚟唔到喎，我有舊同學嚟咗，約一齊睇波。」小諾「我得喎！我過嚟啦！」「唔好意思呀！我一個人可以攪得掂！」「反正阿成出咗街我又冇嘢做，我過嚟啦，老公你話好唔好？」，阿成「咁你過嚟幫手第住都好，間屋真係好大。」 

 

禮拜日一早，我響三藩市屋企先等搬琴公司將個Grand Piano運走，個琴係6’2 Full Size，普通搬屋公司跟本唔識搬，我搵嘅呢間公司係專業搬運鋼琴，整個Service包埋Tune琴，非常專業，不過都攪咗成個鐘先運走個琴。工人走咗之後，我就自己開車落返去Palo Alto新屋，今晚我已經可以響新屋度瞓，雖然仲有好多嘢未齊，不過勉勉強強都可以住人。返到Palo Alto已經十一點，小諾架車停響Driveway，「咁耐㗎！」「我話十一點吖嘛！依家咪十一點囉，搬屋工人都未到！」話口未完，行口就有架大Truck轉入嚟，睇個公司名係送Backyard Furniture，我打開Garage門，泊咗我哋兩架車入車庫，工人將傢俬一件件搬晒入屋裝嵌，唔洗半個鐘已經攪掂，而啱啱好呢個時候個琴都送到。 

 

搬琴花嘅時間就耐好多，單單搬個琴入屋裝腳已經用咗個幾鐘，之後又要Tune琴，到咗差唔多一點先攪掂，工人一走，小諾就好興𡚒「喂，識你咁耐都未聽過你彈琴喎！你學咗幾耐？我響香港同加拿大都有學琴，不過已經好耐冇彈。」「你可以試吓彈呀！」「我好多年冇彈，唔記得啦！咦，唔見你有琴譜？」「響車房啲箱入面，你要唔要搵本譜你睇住彈？」「下次先啦，肚餓呀！成點鐘，去邊度食好？」「嗯，不如食水餃？」「北方水餃？好喎！」「咁我開車啦！要唔要叫埋阿成？」「唔洗啦！佢要六點先返，之後我同佢約咗朋友食飯。」