一個香港留學生在美國的生活: Housewarming Party（3）

七月初加州天氣就係風和日麗陽光普照，屋嘅大廳同後花園中間係一大片落地玻璃門，可以摺疊推入牆，咁就可以打通大廳同後園，感覺上非常之寬敞，室內可以睇哂成個後園同泳池，外邊陽光亦可入到大廳。大廳向南，下晝太陽係從右手邊落山，陽光係唔會直接照射入屋。到左四點左右，氣溫稍為下降，Aaron第一個除衫跳落水，之後Dave阿成同Fred都先後落水，班女仔就換哂三點式泳衣響泳池邊曬太陽，不過焦點都集中響Lisa身上，已經六個幾月，除咗又圓又大嘅肚，就係一對波都好漲，幾個女仔就圍埋一齊講生仔經，細聲講大聲笑。 

 

Joe「Aaron你準備好做老豆未？湊B唔容易呀！」Aaron「已經搵到坐月保姆，Lisa父母同我阿爸阿媽都會過嚟幫手，應該ok。」阿成「都未知係仔定女。」Aaron「係女。」我「仔女都好，似Lisa基因一定好！哈哈！」Aaron「我好差咩！睇吓你自己，仲係一支公，生都冇得你生，生蛇就有你份！」David「Lisa個朋友叫乜名？好似係單身。」Aaron「Eva，阿偉同人打牌仲要連食Eva幾舖大嘅！你對人冇興趣都唔洗出手咁重啊！」我「又關我事！佢出銃唔通我唔食？Eva牌品好，換咗你，早就反枱啦！」Joe「阿偉對人冇興趣就算啦，唔好做得太明顯，免得大家尷尷尬尬，飲杯先啦，啲appetizer差唔多Ready。」我開咗幾支champagne，Steve送上三款唔同嘅頭盤加一個Seafood Tower。 

 

阿成「嘩，咁大盤魚子醬！」我「Joe帶嚟嘅，個入口商係佢老豆個客，正宗Beluga，唔係美國Local Cheap Cheap Caviar。」Aaron「我咁大個仔都係第一次食！正」我「個Seafood Tower仲正！Oyster同Clams全部法國入口，龍蝦係Maine Lobster。」Aaron「咁食法實三高爆血管！係呢，又話Amy同小美會嚟？」Joe「Amy出咗Trip，小美好似病咗。」Aaron「少咗兩個靚女，阿偉繼續做單身狗。」我「你就狗！我依家一個人都唔知幾正！」阿成「好似好耐冇見過小美，次次聚會都唔見佢。」David「咁要問下Maggie，佢同小美熟好多。」Maggie「你哋講緊邊個呀？喂，你哋幾個男人響泳池邊噏乜？仲唔過嚟？好多嘢食呀！」 




由於太多人，所以今晚係Buffet Style，Chef Steve 準備咗Salad，Lamb Rack，Beef Bourguignon，仲有Baked Onion Chicken。我哋就響後園食下飲下游下水，我由頭到尾都冇乜同Eva傾謁，其實都幾尷尬，Lisa就有意冇意之間不停咁搵話題同我同Eva講，做到咁明顯，真係盲嘅都知道發生咩事，阿Joe「好啦，阿偉唔好傾住，過嚟陪我去攞兩支紅酒。」