一個香港留學生在美國的生活: Housewarming Party（4）

「好彩你幫我解圍，如果唔係我成晩要應付班女人。」我同Joe落去咗地牢下面個酒窖，我放咗大約七百幾支酒，Joe「Lisa都係緊張你冇女，你又唔洗咁認真，不過我睇Eva 對你有興趣喎。」「Eva唔啱我，做下朋友就冇所謂，做女朋友就唔啦。」「你冇興趣，不過我估其人有興趣。」「咦，我以為冇人知，原來你都發現到！哈！」「其實Fred都做得好明顯，係Linda儍下儍下先唔知。」「男未婚女未嫁，其實冇乜所謂，不過就難睇的。」「算啦，佢又唔係及你條女。」「我係怕Linda遲早都會發現，上兩次聚會我就見到佢係咁偷睇Lisa。」「人哋嘅事唔理得咁多。」 

 

Joe攞咗兩99年BV Reserve ，連埋之前開咗四支Champagne 同三支Chardonnay，其實大家都飲咗唔少。七月初日落時間差不多要到八點半，依家六點都未夠，個天仲好光，班女仔趁個太陽未落山氣溫又唔太熱，全部跳入水繼續玩。阿成第一個頂唔順話飲太多頭暈要入房瞓覺，Joe Aaron 我同David就打牌，Edward同Fred就去咗打機。 

 

Chef Steve同班Crew𢴇拾好做埋清潔，大約七點半左右離開。到咗入夜，Aaron第一個要返屋企「我同Lisa要走先，大肚婆要早啲休息。你哋繼續玩。」除咗阿成，David同Edward都醉醉地，攤響梳化度，Lisa一 話走，Eva都跟著走，Joe「其他人仲玩唔玩，Haley要瞓覺，我都要返屋企。」Maggie「咁我同David都走先，打攪咗你咁耐！多謝晒！」我「唔好客氣，下次再約啦！Linda，你同Fred係咪留多陣？唔夠腳打牌，不過可以游夜水。」Linda「唔好啦，我同Fred都返去，不過阿成仲瞓緊，小諾你要唔要叫醒佢？」小諾「由得佢瞓啦，反正阿偉有空客房，我等佢醒先走。」之後小諾就扶咗阿成入房，我就送其他人離開。 



 

送完客返入屋，得返小諾一個響廚房，「阿成點呀？」「我睇佢之前都冇咁醉，唔知點解叫極都唔醒仲有啲亂講野。」「肯定飲醉咗啦，佢係飲少少就冧，等佢休息，你哋可以响度瞓，反正聽日又唔洗返工。」小諾著住件白色長T，T入面係件紅色三點式泳衣，一對白滑長腿，赤腳企響廚房，「你響廚房做乜？」「我見你冰箱仲有急凍餃子，我咪煮幾隻食，你要唔要？」「都好喎，唔該晒！」「仲有五分鐘。」「咁我去浸下水先。」 

 

泳池傍有個可以坐六個人嘅按摩池，池水大約38度，我一個人浸住水抬頭望天，夏天夜空天朗氣清涼風陣陣，三藩市冇香港嘅空氣污染，可以清楚咁睇到天上嘅星星。過咗幾分鐘，小諾就攞咗碟水餃過嚟，小諾「煮咗半包十隻，夠唔夠食？」「一人五隻，夠啦，好香韮菜味！」「你個雪櫃淨係得韮菜餃，仲有其他咩！」小諾放低碟水餃響池邊，除咗件T，跟住坐埋入個按摩池。我同佢就面對面咁坐，「你間屋真係好舒服！」「你同阿成都睇緊屋啦！到時咪買間自己鍾意嘅！」「係啦，你睇個市點？應唔應該等下先？」「Joe就睇淡，覺得未見底，不過我就睇長線，你永遠唔知幾時見底，我睇啱就買，反正自己住又唔係炒，你哋份工穩陣供得起咪得囉！」「阿成就係揸唔定主意。」「你哋打算幾時結婚呀？」「起碼兩三年之後，冇咁快。」「你哋都住埋一齊，點解唔早啲結？」「阿成信風水命理，佢話三十歲前唔好結婚。」「哈哈！估唔到佢咁迷信！」就係咁，我同小諾一邊食水餃一邊傾下大家嘅生活，雖然唔係情侶，不過我感覺上好似情侶咁，感覺上有啲奇怪，我哋浸咗十分分鍾左右就各自返房瞓。 

 



我同小諾嘅關係就一直係咁，佢有同居男友不過又同我乜都講，又會單獨約食飯，就算到咗後來我同小美拍拖結婚，我哋兩個關係都係咁。