一個香港留學生在美國的生活: Phoebe (1)
同Joe食完晏返公司做埋啲手尾,Nikki通常放一點,今日返到公司仲見到佢,「仲未走?過晒鐘啦喎!」「係呀,今日等朋友接放工。」「男朋友?」「哈哈,算係啦!」Nikki響學校好受歡迎,成日有唔同男仔搵佢。入返Office冇耐電話又響,今次係一個陌生號碼「Hello?」「阿偉?我係Phoebe。」「Hi,Phoebe!」我估唔到係Phoebe,我又冇佢電話,之前又冇聯絡,「唔好意思,係Aaron叫我打畀你,佢話你下晝可以車我去買傢俬。」原來又係Aaron條友出賣我!「我放工之後都應該可以,你想去邊度買?」「我屋企附近最近係IKEA,你可以嚟接我嗎?我冇車。」「可以,咁你畀你地上我,我大約六點左右去接你?」「你仲記唔記得我返工間雪糕舖?我響嗰度等?」「好,等陣見。」
要六點趕到去Palo Alto,最遲四點半一定要離開Office,好彩Joe架Van泊響Office,我直接揸走,慳返唔少時間。Joe架七人Van係有咗Haley之後先買,呢類Family Car最啱有小朋友嘅家庭用,我呢啲單身狗係第一次揸,Joe買嘅係Honda Odyssey,響美國十分之流行,本來車入面裝咗個小朋友Car seat,不過Joe知道我要搬嘢,早就拆走咗,架車雖然大,不過揸起嚟就好輕身,感覺唔多穩陣。
一如既往,禮拜五由三藩市去南灣非常之塞車,我用差唔多兩個鐘先落到Palo Alto,六點鐘接咗Phoebe直接去IKEA睇傢俬。Palo Alto響上年暑假先開張,係Bay Area第一間,所以好受歡迎,其本上每日都係人山人海。我同Phoebe都係第一次去IKEA Shopping,IKEA買嘅都係啲平價唔多耐用家居用品,唔多啱我,不過Phoebe就買得興高采烈,好快就買哂新居需要嘅床櫃枱凳,最貴係張大床,差唔多四百,其他嘅傢俬都係一百幾十,埋單千五左右,除咗張床太大要多畀幾十蚊送貨,其他都係要自己切,一盒盒,全部放哂響架Van度。
「不如先放低啲嘢去Apartment度先?放響車好易畀人偷。」「都好,你一個人搬咁多嘢入屋,要唔要Call Aaron幫手?」「佢哋話咗今晚唔得閒,如果唔係都唔會叫你call我啦!」「哈哈,咁又係,唔該哂!」Phoebe過多幾個禮拜就會正式入讀Stanford,個Apartment就響Stanford附近,踩單就可以返到學校同返到雪糕舖,非常之方便。由IKEA開車返Apartment只係十分重要鐘,搬哂啲箱入屋已經差唔多九點,「不如食飯先,我再車你返你舅父屋企?」「都好,不過咁夜仲有邊度開?」「附近仲有麥當勞,你介唔介意?」「好呀!快啲食完,我仲要返屋企𢴇嘢。」