一個香港留學生在美國的生活: Phoebe（2）

最近間麥記又係要返去IKEA個Mall，響美國只有少部分麥當勞係廿四小時營業，呢一間就收十點，我哋去到已經九點幾，一人點咗個套餐，搵咗張窗邊二人枱坐，「咁夜食咁大個包，你唔怕肥？」Phoebe叫咗個Double Cheese Quarter Pounder，我就只係叫咗個魚柳包，「肚餓吖嘛！何況我又冇咁早瞓，我仲要做功課。」「你都好勤力喎，又打工又返學。」「冇辦法啦！屋企冇咁多錢供我響美國讀書，如果唔係Aaron同你畀地方我住，我未必可以繼續留響度。」其實到依家我都唔係好清礎Aaron同Phoebe嘅Agreement，Aaron只係話會包佢住宿四年，要我搵個Apartment畀佢，因為佢冇車，要住近學校，一個one bedroom apartment 響Stanford附近都要二千五到三千一個月，如果冇oversea money，基本上都好難生存。「解決咗住，咁學費呢？」「可以申請Financial Aids同Scholarship。」「咁你都好叻啊！咁辛苦你屋企人都畀你一個女仔嚟美國。」「屋企人唔想我留響農村生活。」咁你有打算畢業之後搵工留低？」「有呀！畢業先算啦！」 

 

成餐飯都係傾下學校同工作，到開車走嘅時候，我終於忍唔住問「其實Aaron係點樣同你講畀間屋你住？」Phoebe望一望我，「Aaron話要我做你哋兩個地下女友，你哋幫我交租。」「地下女友？」「Aaron話佢已經有女朋友，你就冇。」「我又唔覺你今日似係我女朋友喎！」「搬咗屋先講拉！」。 

 

Palo Alto都有好區同比較差嘅區，響Stanford一邊嘅係貴區，平均屋價要數百萬，有啲Estate home 甚至叫價要二三千萬，絕對係豪宅區，而Phoebe舅父住嘅，係Freeway另一邊East Palo Alto，算係一個中低收入為主嘅舊區，治安差，啲屋都比較細同殘舊，感覺上同阿欣住嗰間爛屋差唔多。架車行咗三四個街口已經到咗Phoebe屋企，「今日多謝你幫忙，我到屋企啦，聽日見。」「咁好啦，聽日我同Aaron過嚟幫你搬埋其他嘢。」 



 

睇住Phoebe入咗屋，我先開車返屋企。啱啱停好部車入Garage，電話就響起「點呀？同Phoebe買咗啲乜嘢？」當然係Aaron打嚟，「我都知你實打畀我，呢啲咁粗重嘅嘢就叫我做，自己就唔出現。」「喂阿！我要陪Lisa，邊有你咁自由！」「你咁玩火，遲早出事！」「唔好講呢啲嘢，不如話我知今日發生咩事，你覺得Phoebe正唔正？」「咁Phoebe又唔差，身高腳長，個樣都幾靚女，啱你囉！」「如果唔啱，我都唔包佢啦！」「究竟你同佢個Deal係乜？」