搵cc遇著女同事....返工又比你屌，放工又比你屌: 第十五章‧更勝老麥的幸福
D 不識人間險惡既大少爺，總係鍾意搞事。
我都估撚倒佢係煩膠一名ga la。打王總係有d嘍囉，煩膠身邊硬係有d 馬交friend。
我唔知你地點，但我自細心中就會依不同情況同情緒響起唔同既歌。
正當我好撚老瀟咁背住阿芝行出酒吧。耳邊響起華仔既《情深的一句》。
「面對當年情，真心說句，祈求完全原諒我當天的不對。」個音樂。
嘍囉同煩膠永遠都鍾意喺主角變緊身或者沉醉緊某一種mood時走出黎搞事，但又唔趁主角變身時打鳩佢。
所以被稱為煩膠都不無道理。
當我揹住阿芝行出去酒吧。
果個青年才俊已經拖左幾條柚出黎。
喂。。。大哥你自己仆街咋喎。。。你唔係怪我下嘛
青年才俊既嘍囉：「hey you!你整傷我個朋友喎。就咁走左去？」
我心諗，我已經算無賴ga la...你自己仆街仲黎煩我？
比著我係你就掘個窿埋撚左自己，以後都唔落老蘭。
我：「朋友。我無掂過佢，我係接我個妹走姐。如果因為佢頭先同我行大禮果樣野，我就幫佢唔倒啦。丫～唔記得左～ 平身丫～小jer子。下次咁多人唔洗ga la。」
點解我夠膽咁寸呢？之唔係有兩個阿蛇行緊埋黎囉。
嘍囉：「咁寸丫，o靚仔！」
我：「係囉，你個o靚仔咁撚寸，小心喎。」
兩個阿sir行左埋黎：「喂，咩事？你地圍o係度做咩？」
對住阿sir就唔可以講大話啦：「阿sir，我個朋友無啦啦暈左o係酒吧，見佢地圍住左我朋友，於是我就揹佢出黎。我懷疑有人落野杜我朋友囉。」
警察a：「係咩？係咪條女自己Hi大左咋？」
班友又承機同個警察講：「阿sir，頭先佢打我朋友丫。」
警察a：「有無d咁既事？」
警犬...真係一隻警犬，用多d 個腦，用少d個鼻。佢成五個人，我一個人打得晒？當我係宇宙最強既小甄麼？
警察b：「佢一個打你地五個？」
哩個就真係警察啦！起碼有腦。
我：「阿sir 你有sense！」我不禁直樹舞子！！
警察b：「返差館落份口供好唔好?」
一堆柒頭一聽返差館就驚，擺明個身有野啦。
個年青才俊就即刻變面：「阿sir，我唔小心跌親姐，無事無事。」
警察b：「咁邊度黎就邊度去啦～走啦，等派飯丫？」
佢地走左之後，我同個阿sir講：「嘩！阿sir，我好少見d人可以咁寸，你我一見如故，不如我地燒銀紙，叫雞做兄弟。」
警察b：「你又想返館坐下丫嘛？話你知，唔好o係度搞事丫！走啦！」
於是o係一位警察同一隻警犬既幫助下，我就咁揹左阿芝上的士。
可能見我揹住一個完醉既人，十個有九個士司都唔肯停車。千辛萬苦先有一個停，但喺交涉底下佢竟然暗示要比多兩舊。
喂你以為哩度係大陸丫？！
一舊都話姐，兩舊真係好過份囉。
我：「阿哥，江湖救急。百五好嗎？」
見佢有想走既意思，但此地不宜久留。
一野扔左阿芝上車，兩舊就兩舊！鬼唔望到你要人幫果時，人地又趁火打劫你！
上到車，我已經好乸累。
要將一個醉到不醒人士既人抬上的士都咪話唔辛苦。仲要揹左成兩個字先有車。又擔心果堆煩膠會返黎。
終於上左車，直飛阿芝屋企。
沿途佢都有d半醉半醒。
忽然，佢雙眼半開，望住我講：「大∼佬∼你∼∼真係∼黎左丫？」
我：「講句野都講唔清，你究竟飲左幾多酒丫？」
佢懶可愛咁嘟起個咀，慢慢伸出兩仔手指做出一個少少既手勢：「dd」
飲dd酒就搞到咁？
就係搖下搖下既情況之下，我地進行左一d類似第三類接觸既對話。
即係雞同鴨講。但隱隱約約聽到佢話返唔倒屋企...無...唔知乜乜乜，又大陸乜乜乜。但都差唔多到啦，李澤鉅啦！
終於，費盡九牛二虎之力，搬到佢去屋企門口。
始終就咁開人地屋企門都係唔好。但我按極鐘都無人應門。
算啦，開就開啦！
我：「妹釘，鎖匙喺邊丫？妹釘！鎖鑰丫。」
芝：「無丫無丫∼都話無帶囉∼」佢無神無氣∼醉分分咁講。
我：「咁打比屋企人啦！」
芝：「無人丫！」
哩一刻我終於串連埋左阿芝頭先喺的士上面講果堆外星語啦！
「無帶鎖鑰，屋企人返左鄉下，返唔倒屋企...」
神聖的蟹！（Wholly crap）!!!!
我：「咁點丫？！」
但阿芝又無左反應。
唉！頂你個死妹釘！出街唔帶鎖鑰你都夠膽死去酒吧！你真係諗住去人地度比人搞為求宿一宵丫？！
正當我諗緊點算時，忽然聽到後樓梯有腳步聲，保安阿叔喺後樓梯行左出黎：「依，馬生，做乜你地唔入去丫？」
頭先都係保安阿叔開門入黎比我，所以佢知我係邊個。
你知d上左年紀既人特別八卦。我唔想之後阿芝比人唱到四圍都知。
於是塞左兩舊水比阿叔：「阿叔，佢始終係女仔，麻煩你今日當見唔到，千萬唔好同其他人講丫，特別係佢屋企人。拜託。」
點知阿叔義正詞嚴咁講：「你賄賂我丫？阿叔唔受哩套既！」
我：「有骨氣，小弟敬佩！咁麻煩你啦！」
點知阿叔話鋒一轉：「老人家年大啦，有時真係會無咩記性亂咁講野。」
我心諗，屌你老母！咁即係唔夠數啦！就好似多隆話：「你比錢我即係侮辱我！係就侮辱多我幾次！」
但春袋比人揸住，只有笑笑口咁再加多一舊比阿叔：「阿叔，多謝你成日照顧佢地一家，攞去飲茶啦！」
阿叔：「無功不受祿，收返佢啦馬生。」
但佢口裡說不，身體卻很誠實！隻手根本無遞返d錢過黎囉！
仲唔夠？！信唔信我比多一蚊你丫拿？
我：「當係你幫我睇下咁夜有無人開鎖啦！」
阿叔：「好，我宜家幫你打電話。」
過左十零分鐘，阿叔走返上黎話搵倒個相熟既，不過要千二蚊先肯開！如果唔係就要聽日啦。
千二蚊？！你咪撚去搶？以為我係水魚丫？
於是，我一野揹起阿芝入左lift，好似教主O係主會屌完人咁走左去。
千艱萬難，終於返到我屋企樓下。
做男人，唔好講咁多，頂埋佢！
返到去，輕輕咁放左阿芝落梳化。我終於都忍唔住，靠住個梳化休息一下。
過左一陣，無啦啦有隻手係咁掃我個頭。一望原來係阿芝。
我：「醒左啦？好d未？」
芝：「大佬，你好多汗丫。」惡既、寸既、嬲既、冷莫既、正經既阿芝我都見過，但我真係未見過溫柔既阿芝。
當佢咁溫柔咁摸下摸下我個頭，我就覺得好似一個親人o係我身邊咁，好寧靜、好舒服。
哩一種安心既感覺，唔係個個人都有。亦都唔係個個媽媽都可以比到個仔既。
或者，哩種係一種墮落。一種安於唔屬於自己既平靜既墮落。
芝：「大佬, 我可唔可以叫你Do min Jin Si呀？」
我：「都咩屎話？」
芝：「Do min jin Si~~」
諗諗下…好似哩排有個好紅既外星人係咁上下名…搞乜丫…
我：「你點會知我既真實身份嫁？喂~喂~~」
佢都未等我答晒，一下咁攬住我。
芝：「Do min jin Si~~」
我感覺到，哩個擁抱唔係咁單純。
芝：「我好辛苦丫，『都Manager~』可唔可以話我知，點解咁難估你諗緊咩？」
同一個外星人對話真係好Q辛苦，我完全唔知點答，但又唔想放開哩份溫暖。
不知不覺咁樣，我就瞓著左。哩一覺，我瞓得好好。
夢裡面，無Snowy、無百佳兒童JAMES、無老闆...只有一份濃濃既溫暖，就好似O係媽媽懷抱之中一樣。
我同佢無做愛、無溫存。只有一個唔知夾雜住幾多分既雜念既擁抱。
再之後？沒有了。我瞓著左。
第二朝，我起身，發覺自己瞓左O係梳化度。仲聞倒好香既食物味。
阿芝把聲O係梳化後面傳過黎：「大佬，食早餐啦~」
嘩！我屋企幾時多左個鐘點女傭ga?
起身入廁所洗一洗臉，出到黎，一檯既英式早餐已經煮好。熱烘烘，香噴噴。
一起身有早餐食，仲加送一份甜美既笑容。哩一樣野可能對你地黎講係好普通又好on9既事。
但對於一個獨居男士黎講，除左偶爾返阿媽度瞓之外，就只有老麥有哩個服務。大前題係你要以老麥為家。
我幾乎有一種想流眼淚既衝動。或者，有一份咁既生活，真係一種幸福。
阿芝可能見我呆左，於是扁起可愛既小嘴話：「做咩丫....係咪我整得好差丫？定係你唔O岩食？」
我：「唔...唔係...只係...太幸福，一時接受唔倒...。」
點知阿芝甜甜咁一笑...話：「係咩~ 咁日日整比你食好唔好丫？」
吓....咩意思丫...求婚丫?
芝：「等你唔洗更年期成日皮氣暴燥，等我地受少D 氣都好丫。哈~~」
我：「妹釘...你...」
芝：「哎呀~ 入面我仲煮緊粉，你快d食啦！」於是，佢又走返入廚房。