【全劇終】《我喺街執咗個失憶嘅女仔返屋企》: 學生會補選篇：虛假的初中生靜待破殼之時（三）

我擰轉面，唐夕嵐果然就係哽咽聲來源。
 
佢耷低頭，不時用手背抹眼。
 
「…搞咩呀？」我問。
 
講完之後，佢全身開始發震，哽咽聲變成喊聲：
 
「…對唔住、對唔住、對唔住。」
 




我即刻走近佢，喺書包摷咗包紙巾：「喂！你唔好嚟呢啲呀！」
 
佢只係重覆：「對唔住、對唔住、對唔住、對唔住、對唔住…」喊聲愈嚟愈大。
 
「…你冇對我唔住呀，係我自己幫你頂架，況且句收皮真係我講先。」我遞張紙巾俾佢。
 
佢冇接過，淨係不斷擰頭。
 
「我求吓你快啲收聲，陣間校長聽到聲出嚟我就真係仆街架喇…」我用紙巾幫佢印走臉上嘅眼淚，但杯水車薪。
 




「…唔止頭先件事。」佢繼續擰頭，我要花啲氣力先聽得清楚佢講咩。
 
然後，佢突然打開自己書包嘅拉鍊，再將裏面嘅嘢倒晒出嚟。
 
並唔係我想像中嘅一本本教科書。
 
而係一張張上面畫滿咗嘢嘅畫紙。
 
「…和泉紗霧？」雖然畫功有點兒…，但都勉強認得出畫緊啲咩。
 




唐夕嵐依然未肯收聲：「…我頭先呃咗你，我話唔識佢係邊個。」
 
「我知呀。」
 
「…你知？」
 
「我都話我有睇你ig。」嗰80幾個post，仲有post下嘅一大堆hashtag，我唔覺得係假。
 
我將地下嘅畫紙逐張執返起：「乜原來你都鍾意畫畫架？」
 
佢不停用手背抹眼淚，但淚水依舊湧出：「…嗯，但畫得好差。」
 
我突然諗返起，之前喺樓梯唔小心撞跌佢啲畫紙嗰次。
 
當時刻印喺畫紙上嘅都係一個個手繪嘅和泉紗霧。




 
「…其實唔係好差啫，起碼認到你畫緊邊個。」
 
聽完呢句，佢好似又喊勁咗。（真係唔講好過講，唉…）
 
「喂喂，點解你會鍾意和泉紗霧嘅？」我嘗試分散佢注意力。
 
「…因為佢畫畫靚，我想變成佢咁。」
 
我笑：「佢宅女嚟架喎，你又想變成宅女？」
 
「…冇所謂。」佢索咗兩吓鼻。
 
「咁又唔得，你做咗宅女，去邊度賠返個傑出學生俾校長？仲有呀，邊個代表我地學校參加學界語言精英賽？」
 




「咁咪好囉！我都唔想參加！」佢帶住喊聲大叫。
 
「殊！！！」
 
點知佢唔聽我殊不突止，仲繼續講：「…我最憎就係學語言！咩文都憎！最好呢個世界所有語言徹底消失！」
 
啲人話一個人睇起嚟愈乖，爆起seed上嚟愈勁，望住唐夕嵐我忽然體會到呢句說話。
 
營業式笑容嘅底下，原來係一堆長久累積而成嘅壓力同怨氣。
 
「認同，尤其是英文啦，冇咗佢呢個世界嘅學生應該會開心好多。」
 
「我憎死我阿爸阿媽！係佢地迫我每日用十個鐘去學我唔鍾意嘅野！係佢地唔俾我畫畫！」由頭先開始，唐夕嵐喊聲好似細咗。
 
「認同，我阿爸阿媽長期喺外國唔返嚟，連我今年中幾都唔知。」




 
「仲有校長室入面嗰兩條友我都憎！淨係識得叫我幫學校參加比賽！」
 
「呢樣更加認同啦，講句收皮就話係粗口…仲有個濕鳩校長，成日喺早會鳩噏，嘥晒學生啲時間。」
 
唐夕嵐終於收咗聲，頭先嘅眼淚好似轉化成為憤怒：
 
「唔得！本來我應該都要有份記小過！」
 
呢一刻，我未知暴走中嘅唐夕嵐可以有幾失控。
 
如果知道嘅話，我絕對會阻止佢行返去校長室門前呢個舉動…
 
「喂，你想做咩呀？冷靜少少先…」我勸阻，可惜已經太遲。
 




佢推開校長室道門，用一個前所未有嘅聲量對裏面嘅人大嗌：
 
 
「收皮收皮收皮！所有大人全部同我收皮！！！」
 
 
我雙手掩面，已經想像唔出校長同訓導主任呢一刻會係乜野表情。
 
耳裏得返唐夕嵐因憤怒而產生嘅換氣聲。
 
「…夕、夕、夕嵐你？？？？」呢把聲，應該係校長。
 
之後，校長又留多我地半粒鐘（我明明係無辜…）叫我地解釋究竟發生咩事之類嘅過程…一概省略。