只想和你愛一次: 14. 穿煲了

「我有好多野暪你㗎喎， 唔知你講邊樣呢~」Elven裝作冷靜開玩笑說道。
 
「!!!  遲啲先審問你其他， 講返正經嘢先! 到底Jacky係咪想追我表妹?」Rachel不讓話題被轉移。
 
「點解咁講?」Elven心想不是那麼快便穿了煲吧? 但手裏仍保持鎮定問道。
 
Rachel: 「佢今日送咗份禮物比我表妹。」
 
「!!! 係咩嚟㗎?」
 




(死仔， 做咗野都唔話我知!) Elven心入面一邊鬧手裏一邊問。
 
Rachel: 「前排Annie練波扭到下隻手， 今日Jacky送咗個護腕比佢，然後我突然醒起你之前間中好似都會襯機問吓Annie 啲野， 突然靈機一觸!」
 
「突然咁醒目嘅…」猶疑了一會， Elven知道很難再隱瞞下去，而且讓Rachel知道，對整件事可能反而會有意想不到的幫助， 所以最終決定坦白。
 
「真係㗎!? 我真係好醒呀! HAHAHAHA」Rachel得到確定後就急不及待地認叻。
 
「係喇， 至醒係你喇~  咁Annie點諗? 佢對Jacky有無感覺呀?」Elven覺得既然都穿煲了， 不妨直接點單刀直入。
 




Rachel:「佢應該都feel到Jacky 對佢有啲嘢， 但又未知自己想點。 佢今日係咁問我What should I do? What should I do? 笑死我呀!」
 
「咁睇嚟Jacky都唔係無機會喎~」至少Annie沒有反感，Elven暗地裏替Jacky開心。
 
Rachel:「Too soon to say la~ 咁Jacky係咪好男仔嚟㗎?」
 
「佢係一個好人嚟嘅，不過佢未拍過拖， 中學又讀男校， 所以未必好識同女仔相處，我地幫佢改咗個花名叫電車Jacky~」Elven答道。
 
Rachel:「Annie 其實都未拍過拖㗎，唔知佢地最後會點呢? 攪到我都即刻有啲緊張添!」
 




Elven: 「比啲時間佢地， 加上有我地暗中幫手， 正常應該無問題嘅! 」
 
(只要Jacky唔突然做啲柒野嘅話...)Elven心裏再補了句。
 
 
Rachel:「合作愉快  🤝🏻」
Elven: 「合作愉快  🤝🏻」
 
Rachel:「!!!」
 
「我突然又諗起， 你嗰陣add我MSN 係咪都係為咗幫Jacky 收風!?」
 
 「秘密， 有啲嘢講咗出嚟就唔完美㗎喇~」Elven沒有直接承認。
 
Rachel:「哼， 原來你係利用我! 不過講你知呀， 其實你未add我前， 我一早己經對你唔陌生㗎喇，唔係都唔會咁放心同你咁快咁熟傾咁多偈~」




 
「點解?」到Elven好奇。
 
Rachel 「秘密! 有啲嘢講咗出嚟就唔完美㗎喇~」
 
Elven: 「車!學我嘅...」
 
Rachel 「哩啲叫以己之道還治其人之身!又或者係以子之矛攻子之盾! 哈哈~」
 
Elven: 「知你中文好叻喇...」
 
就這樣， Elven和Rachel之間從此又多了一個共同話題。