只想和你愛一次: 27. 醉酒惹禍

那晚，Elven和一眾隊友出外飲酒慶祝，開心酒加上一班男人，自然是沒有節制狂隊那種，飲了幾round，大家便已經帶有幾分醉意。而不知為甚麼，到了某個時間酒吧飲酒總喜歡搭上一個真心話大冒險的環節，這次當然亦不例外。
 
轉了幾回合，酒樽轉到Elven身前。
 
「隊長係咪仲係對EX念念不忘?」Ricky八掛問道。
 
「坦白講仲未放得低，不過近排感覺好似無咁痛了…」Elven想了一會後答。
 
「follow up! 係咪有新歡?」輝仔聽到立刻舉手。
 




「似乎係…」Elven帶有少少尷尬地說。
 
「Wooooo~」一眾隊友立即起哄
 
「係咪隔黎hall個Rachel呀?」輝仔再追問。
 
「你又知嘅…」Elven有少少意外。
 
「你地哩半年晚晚傾偈，又成日曖曖昧昧咁，真係當我地盲㗎咩~」Ricky笑吟吟地說。
 




「唉…其實我覺得同佢真係好夾，同埋我好衰咁想利用佢忘記Ada，所以放任自己對佢有好感… 咁係咪好衰?」既然已經不再是秘密，Elven索性和他們分享自己心入面的煩惱。
 
「隊長，我地見証住你哩兩年過得有幾傷心同痛苦，自然好希望你可以早日放低個ex，搵到第二個開開心生活啦。 感情無話衰唔衰㗎，你最後真係鍾意佢對佢好咪得囉!」輝仔認真地說。
 
「但我印象中佢好似有男朋友㗎喎…」Ricky突然醒起問。
 
Elven:「係呀… 不過平時聽Rachel講佢地啲嘢，感覺佢地嘅關係好似又唔算太好，個男仔有時會發佢脾氣或者唔理佢㗎… 不過哩一刻我都係想放任自己鍾意第二個然後放低Ada啫，唔係想追佢…」
 
「其實你有無諗過Rachel對你都唔係無嘢? 講哩啲嘢你聽又同你咁friend，你話佢對你無好感我唔信囉…」輝仔提出疑問。
 




「我都唔知… 但佢又真係從未試過對我講過啲咩曖昧嘢，好似真係單純只係當我係好朋友咁，同埋有時佢都會講下佢同佢男朋友啲開心嘢我聽，所以感覺上我覺得佢真係只係當我係朋友。」Elven邊想邊說。
 
Ricky:「唔好估下估下喇，愛情係自私㗎，行動啦隊長!」
 
Elven:「但我唔想撓人長腳呀…」
 
Ricky:「咁如果佢男朋友係仆街呢? 對佢唔好呢?」
 
「雖然佢男朋友對佢好似係麻麻，但應該又未去到仆街嘅… 不過我覺得自己越陷越深，佢喺我心目中嘅位置越嚟越大，我都唔敢肯定將來自己會唔會忍唔住做咗啲咩…」Elven帶點擔憂地說。
 
「無論你咩決定都好，我地都撐你㗎! 就快兩年喇，係時候放低過去過新生活喇隊長…放過自己啦~」輝仔拍了一拍Elven的膊頭說。
 
「無錯! 嚟，我地繼續飲! 今晚任何人都唔可以醒住咁走!」Ricky舉起了杯酒擾攘道。
 
 




當他們離開酒吧時，沒有一個人能保持行一條直線，而在的士回hall途中，Elven拿起電話才看見Rahcel的SMS。
 
「師傅仔，恭喜晒呀!你真係好勁，偶像! 得閒就諗下想食咩同睇咩戲啦! Enjoy tonight~」
 
「多謝支持! 諗到實話你知!」Elven回覆。
 
「又同Rachel SMS! 快啲乘機表白啦隊長!」輝仔在旁邊見Elven同Rachel SMS就大叫，然後同車的隊友聽到後又再不斷地起哄。
 
酒精嚴重上腦，加上身邊隊友不斷的慫恿，Elven不久後又send 了一句
 
「徒弟仔，其實我發覺我鍾意咗你…點算?」