到到你走果日,好多同學都有黎送你機,不過就得我有幸可以以幫你拎行李為由同你一齊由屋企出發。因為一出門就再無機會,我地係你房攬左好耐,然後你隻傻豬又係度喊,好彩無比你父母發覺。之後去到機場,我就只可以默默咁望著你離開… 果刻,我好唔捨得亦好不安,我好驚你係果邊適應唔到,好驚你比人恰,好驚你以後都會離我而去…
 
轉眼間到了離開香港那天,為了可以見你耐d,我同左屋企人講有個男同學話想義務黎幫我拎行李,因為我知唔係咁,我地係機場都只可以扮係普通同學,咩都做唔到… 果日你上左黎我就帶左你入房
 
「送比你架~ 以後衣隻公仔就代替我係果邊陪住你,你掛住我果陣就攬住佢啦~」一入房你立刻從袋裏那出了一隻公仔送給我。
 
「好得意呀! 多謝~ 不過一掛住你就攬佢我驚佢好快就比我攬爛…」
 
這時我望到父母不在房間附近,便立刻撲向你和公仔把你們一起攬實,然後又開始不爭氣地哭起來…。
 




「傻瓜… 我會盡量寫多D信同打下電話比你架~ 而且好快聖誔節你都會返黎啦~」你一邊抱著我,一邊拍著我的背脊安慰我。
 
「記住你講過嘅野呀!」我一邊喊一邊說。
 
「你都要呀!」
 
然後我們就這樣靜靜地抱著大家,直至聽見了你父母行近的腳步聲我們才急急鬆手扮執拾東西。
 
在去機場的路上,父親預先call了一架貨Van,我要求和你一起坐在前排,之後整段車程我們就一直背著他們在拖著,有點像偷情的感覺,但只有拖著你我的不安才能得到舒緩…
 




其實之後諗返,我估我父母可能一早已經估到你嘅真正身份,只是當時沒有揭破吧。
 
到到真係要登機,雖然我面向所有同學和屋企人,但我的視線,其實從來都只有你….
 
上到飛機,我又開始喊…我很害怕,害怕一個人去完全陌生的環境生活,害怕同你維繫唔到要分手,害怕好多好多嘅野…
 
不過或者真係無左就會特別珍惜,我地都比以前更珍惜對方,雖然會好掛住,有時係好難捱,但正因機會難得,讓我們更珍惜每次透過書信,ICQ,email,電話和對方溝通的機會,每次都確切能感受到對方對自己的著緊。隨著大家慢慢適應了這相處模式,那種不安的感覺亦開始漸漸消散。之後到到聖誔,事隔四個後我地終於可以再見…
 
落機出左境,我很快見到接我嘅人,然後跟佢返左我寄住的apartment。我的屋主係兩夫婦,佢地仲有個好得意的女兒,見到佢我不期然諗,如果第日同你嘅BB有佢咁得意咁就好喇…  兩夫婦好好人,知我人生路不熟同佢傾左好多計又周圍去,好快我就講左我地嘅故事佢聽,佢讚我地好sweet仲叫我地要加油添~ 至於學校好彩都有幾個同學係香港人,所以我都未至於完全孤單一個…
 




係衣度同香港好唔同,果陣internet仲未咁普及,我要間中先有機會係學校上網覆到你email,當時長途電話費又好貴,所以我都只可以好間中先打到比你傾一陣,再加上時差,我地好難有即時嘅溝通… 好掛住你果陣,我真係只可以攬住隻公仔喊同埋盡量將想同你講嘅野用email或者寫信講比你聽… 果陣你嘅信同email真係我賴以為生的精神食糧,每次收到我都會好開心,足以讓我果日全日帶著微笑… 捱下捱下,我開始慢慢適應,而到到聖誔我終於可以返黎見你…
 
為了能早點看見你,我跟父母說不用來接我機,當我一踏入境大堂,很快便找到你的位置,然後我放下了行李用我人生最快的速度撲向你處,肯好你運度底子好夠力才沒有被我撲下。熊抱著你,然後我尋著你的嘴唇直接吻了上去…
 
「o靚妹,睇黎你係果邊好食好住喎,重左咁多,我就黎抱唔起你喇…」過了一會被我吻到略帶喘氣的你說道。
 
「仲好講,最衰都係你! 係果邊我一掛住你就搵野食呀! 第日我變左肥婆你都要負責任呀~」我一掌拍落你心口然後說道。
 
「係係係,係我衰,辛苦你喇~放心,就算你變成肥姐咁我都要~」你把嘴貼近我耳邊說道。
 
「算你啦~」
 
重新站回地上,我走回我的行李處,然後拿出了一條頸巾幫你纜上。
 
「冬天喇,衣條頸巾我係果邊專登織比你架,希望可以代我比到溫暖你…」




 
「無你嘅冬天,我永遠都唔會暖架… 所以無論幾忙你每年的聖誔都要返黎陪我呀~」你又抱著我說道。
 
「傻瓜…」
 
「你快D應承我先啦~」
 
「好我應承你~」
 
本身其實我係完全唔纜頸巾,但因為你我改變左衣個習慣… 不過今年,睇黎我只可以回復返自己的習慣,然後將佢收埋係衣櫃… 而你曾經應承過我每個聖誔都會返黎陪我,今個聖誔亦都會係第一個例外…
 
每次你返黎果一兩個星期,我地都過得好甜蜜好幸福,因為我地都知道要用衣兩星期儲滿能量,先可以捱過之後見唔到嘅日子,我地要加倍努力將失去嘅時光追回來… 我知你其實係果邊有時會好忙,但為左我你都會盡力提早完成所有功課和活動,然後除左中七考AL 果年的復活假外,你真係每年聖誕,復活節同暑假都會返黎陪我,我地亦都創造左好多美好嘅回憶… 班會宿營,日落之夜,山頂之夜,波衫事件等等… 唔知你仲記唔記得?你送波衫比我果次,雖然送錯左攪到我成日笑你,但其實我收到係好感動架… 我知你為佢要節衣縮食左好耐先買得起,而且果份心思,我真係確切感受到。就算我可能永遠唔會著,但我都一定會保留一世…

 
 
係你中六果年的生日,我苦惱左好耐送咩生日禮物比你好。突然靈機一觸醒起你鍾意車路士,特別係佢其中一個球員,好似唔知叫咩莊臣,於是我就諗到不如買件有佢名的波衫比你。一上佢嘅官網睇,印晒名同D徽章原來要千幾蚊… 不過為左你,節衣宿食幾個月都要啦~ 為左避免出錯,我偷偷問左同自己另一個同自己比較熟的中同Rex。




 
「Rex,你記唔記得Elven係鍾意車仔邊個球員? 好似叫咩Johnson架」
 
「其實我唔睇波架,不過上網好易搵啫~ Johnson? 搵到喇,應該係2號Glen Johnson呀~」
 
「唔該晒你呀!」
 
於是我係官網好快搵到Glen Johnson衣個名,然後落左order,再經Rex打算在你生日正日當天給你。
 
你生日當天,我收到你電話
 
「多謝你份禮物呀! 不過下次唔好買咁貴嘅野喇,傻架咩…」
 
「最緊要你鍾意啫,我最多當順便減肥囉~ 咁鍾唔鍾意呀?」
 




「鍾意… 不過… 點解你會印Johnson衣個名嘅?」
 
「唔係你好鍾意果個球員咩? 我問左Rex架喎…」
 
「Rex? 佢完全唔睇波唔識D人架喎… 你點解會揀佢黎問?」
 
「我唔知呀… 諗住有衣個名實無錯…」
 
「你記住喇,我鍾意果個係22號的古莊臣(Gudjohnsen) , 唔係2號的格連莊臣呀~」
 
「攪錯呀Rex! 老點我! Sorry呀… 唔知有無得換呢…」
 
「唔緊要啦,只要係你送嘅我都鍾意~」
 
事後我再問人,知道左原來格連莊臣係踢後衞,而且的確係比較少人鍾意,令我之後3個月都無再睬過阿Rex…