只想和你愛一次: 11. 被遺忘的故事 (十一)
在餐廳，由於剛趕完功課，所以心情比較輕鬆。
「多謝你幫咗我咁多呀，thank you!」我舉起酒杯敬了Sam一杯。
「唔駛客氣啦，我都痴食痴住咗幾日㗎，所以哩鋪係 - 打和~」Sam笑著地同樣向我舉起了酒杯說。
「咁你又好似有啲道理~ 係喎，都唔記得問你點解哩個星期咁得閒嘅?又唔係sem break。」忙完後我好奇一問。
Sam:「無呀，啱啱攪掂咗個test同份assignment，見哩個星期啲堂唔太重要咪走晒佢抖下囉~」
「嘩，真係羨慕… 我抖一日後又要忙第二份喇，救命!」我叫救命道。
Sam:「鬼叫你讀啲咁藝術嘅科咩~」
我:「車，唔講哩啲喇~」
Sam:「係喎，哩幾日好似真係無見你同Elven溝通過，無事嘛?」
「我地都慣咗係咁lu，有時我忙，有時佢忙，所以有時都唔覺自己有男朋友...」酒精作用加上放下了心頭大石，我開始把平常不會主動說的話說了出來。
Sam:「咁long D加上大家都咁忙係有啲難攪嘅… 好彩你返得去都算密，唔係感情真係實會變淡…」
「但我無可能keep住永遠一年都返去三次咁多㗎… 而且之後呢? 就算畢咗業其實我都唔想返香港，呼吸慣咗自由嘅空氣，返去就好似返返鐵籠咁… 」我嘆息道。
Sam:「咁你有無同Elven傾過? 哩個問題都真係要溝通解決喎…」
我:「未呀，未有合適機會，或者等佢嚟英國嗰陣啦…」
Sam:「嗯… 加油呀! 只要大家仲鍾意大家，實有問題解決嘅~」
我:「但係呢，其實我好似已經慢慢習慣咗佢嘅不存在… 好似哩幾日咁忙咁，以前我訓前會掛住佢想聽下佢把聲，但依家已經好少會咁了…」
Sam:「或者環境逼住你進化要independent 啲啦… 咁可能令你舒服啲。」
「但係咁一齊仲有咩意思呢?」我不禁疑問。
Sam:「所以你地真係要好好傾下，要有個共同目標同盼望大家先會有繼續努力嘅動力，唔係好似你依家咁本身對前景已經咁迷茫，就更加唔知要為咩而去堅持喇…」
我:「或者你都講得啱，有啲嘢真係要解決咗先有得繼續落去…」
Sam:「搵個機會同佢好好傾下啦~」
第二天，Sam便離開找他的朋友了。而我，亦襯著偷得浮生半日閒，鼓起勇氣打了個電話給你，可惜響了一分鐘也沒人接聽。
「打過比我?」一小時候你SMS我。
「係呀，好似好耐無搵你傾過偈掛住你呀…」我帶點懦弱地回覆。
你:「Sorry呀，啱啱同同學傾完project，依家又要趕返hall幫手攪個joint hall function… 我遲啲打比你?」
「好呀，咁你先忙啦。」我像早已習慣了，並不算太失望地回應。
而到你真的打回給我已經是兩天後的事，那時我亦已經開始了和另一份功課的搏鬥，所以只能簡單講了幾句便收了線，之後我又把和你商量這件事放在一邊。
而Sam在回去後卻開始每天也會message我，他會告訴我他那天發生的事，又會問我功課進度，當我向他訴苦時他會支持我，講笑話氹我笑，不知不覺我們慢慢習慣了每天都有和對方message來往，互相支持打氣。
如是者過了數星期，這天我如常在做另一個model時，又收到Sam的message。
Sam:「Studio忙緊?」
我:「係呀…慘 > <」
Sam:「忙成點呀你? 仲差幾多?」
我:「Disaster… 可能又要捱兩晚通頂喇…」
Sam:「又捱? 你頂唔頂得順呀?」
我:「頂唔順都要頂㗎啦…」
Sam:「咁如果有幫手會唔會好啲?」
我:「???」
Sam:「你開一開門啦~」
我帶著疑惑開了門，然後看見Sam一手拿著電話，一手拿著兩袋外賣。
「Surprise~」Sam兩手各自舉著一袋外賣笑道。
「點解你會嚟嘅?」我真的帶著surprise問道。
Sam:「知你實忙緊，又會唔記得食飯，咪索性買比你食順便支持下你囉~」
「多謝… 你又唔駛上堂?」我問。
Sam:「要呀，明天走一日堂啫~」
我:「又嚟探開朋友?」
Sam:「係呀，你囉~」
「傻㗎你…」對於Sam的熱心舉動我不知怎樣回應。
Sam:「快啲食咗嘢先啦，之後再幫你手~」
那時已經是晚上九時多，於是我便放下手上工作和Sam先吃晚餐，那時我還沒有多想，不過心裏確實有點溫暖和感動。
「同Elven傾咗未呀?」吃到半路，Sam突然問道。
「未呀，嘗試過不過大家未夾到時間，之後又忙就放埋咗一邊喇。」我帶點無奈說。
Sam:「嗯… 真係咁忙咩?」
我:「有啲嘢成為咗習慣就係咁㗎喇，又或者可能我自己都搵緊藉口去逃避啦...」
Sam:「但拖下拖下就好可能無㗎喇喎…」
「或者分手可能都係一個出路，長痛不如短痛…」我呻道。確實由那時開始，分手這選項終於開始出現在我腦海中。
Sam:「咁嚴重? 不過哩啲問題都係要你自己慢慢諗清楚啦… 雖然你唔驚無人要~ 但最緊要唔好比自己後悔。」
「我都係亂up下啫… 食完未呀? 食完開工喇喎!」不想再說我便講道。
Sam:「食完喇，let’s go!」
那晚我們一直做到零晨三點多後由於太累所以還是決定要回家休息一會。也不知是不是天意，回家途中在一個比較陰暗寂靜的後街上，本身唯一的街燈在我們行行下的時候突然熄滅了，突如其來的漆黑環境讓我嚇了一嚇，潛意式捉住了旁邊的Sam。
「唔駛驚，你捉實我我地慢慢行過去，好快有返燈㗎喇。」他一隻手搭著我捉著他的手，另一隻手搭去我另一邊膊頭，半擁抱式和我慢慢走過那段路。
因為害怕，所以我沒想甚麼就和他這樣走著，而慢慢走到另一條街的時候，我們終於重見光明。不過當我想縮手的時候，Sam卻把我捉實，然後突然再把我整個人抱進他的懷內，那刻我因害想掙扎但卻被他抱得死死的，完全反抗不了。
「Ada，對唔住，我真係唔想再忍喇…其實由中學開始我已經鍾意你…」
那時這句話震撼了我，因為我確實從沒向這方面想過，亦讓我停止了掙扎。
「不過你一直同Elven一齊，而Elven又係我老友，我一直只可以將哩份感情收喺心底… 但近排我見你捱得咁辛苦，而佢又好似對你不聞不問咁，令我開始覺得你值得一個更好嘅人去愛你，而我覺得嗰個人可以係我…哩幾個星期我真係每日都好掛住你…」
面對Sam深情的告白及擁抱，我沒想過那刻我竟然有心動的感覺。或者在我最需要人support的時候，他的出現、關心和支持讓他不知不覺間慢慢走進了我的心裏並留有了點點的位置。
結果我就這樣靜靜地讓他抱著，直至過了一段時間，我意識到不能再這樣，才終於把他推開了。
「對唔住…多謝你鍾意咗我咁耐，但我同你無可能㗎… 就算我同Elven最後分手，我都無可能同你一齊咁傷害佢…」我帶點難堪地回應。
「我明白… 我都係啱啱一時忍唔住，我地可唔可以當無事發生過繼續做返好朋友?」那時Sam的表情是帶著點失望和後悔。
「淨係做好朋友當然無問題啦…」我不想亦沒有勇氣失去這位好朋友。
經過這表白後，我沒有再讓他和我一起睡在床上，所以這晚他只是睡回地上，然後第二天便離開了。只是有些感情發生了，就很難可以就咁當粉筆字把它抹走…