Elven回到香港後的第一個星期日,他如常返了教會。氣氛一切如舊,直至活動完結後他第一次看見了他們拖手。
 
霎時間Elven感到自己的內心有種椎心之痛,面色變得極其難看。其實就算在原本的世界,Elven也沒有親身見過Daniel和Rachel的親密行為,所以這個視覺衝擊對他十分之大。
 
「你無事嘛?」察覺到Elven的異樣,Susan問了句。
 
而這說話亦吸引到走在前面的Daniel和Rachel回頭。
 
「你面色好差喎...係咪唔舒服?」Daniel問道。
 




「突然間有D唔舒服...我唔同你地食野喇,可能返hall抖抖先...」Elven有點中氣不足地說道。
 
Susan:「咁一係我送你返去啦,你面色真係有D蒼白...」
 
Elven:「唔駛啦,我自己ok架喇...」
 
Susan:「唔緊要喎,橫掂我一陣都要過海,順路啫~」
 
Elven:「咁好啦...唔該晒」
 




「唔駛客氣,橫掂無左你我都唔想做電燈膽~」Susan望了一眼Daniel 和Rachel取笑道。
 
「點會呀...」還沒習慣的Rachel和Daniel立刻有點面紅。
 
Susan:「好啦,咁我送佢返去,遲D再見啦,拜拜~」
 
 
小巴上
 
「Elven,老老實實,你係咪見到Rachel到Daniel一齊先唔舒服呀?」不得不讚賞Susan對某些事情是特別細心。




 
「點會呀...痴線架咩...」Elven否認。
 
Susan:「唔好扮野喎,衣幾個月唔好以為我乜都睇唔到,放心啦,我唔會同人講架...」
 
「你睇到D咩呀?」Elven並不意會自己有意無意間的行為和表情所以很好奇。
 
「睇到你由第一日識Rachel已經成日偷望佢,睇到你有時會對佢特別好同超溫柔,睇到佢對你黎講係特別嘅存在~」Susan把早屈在心的觀察連珠炮發。
 
「有無咁誇張...」被當眾揭穿Elven有點靦腆不好意思。
 
「可能你自己都唔覺,但真係有囉... 點呀,真係仲要暪我?」Susan追問。
 
「唉... 你可唔可以應承我會保守秘密,之後我講嘅野邊個都唔可以講? 包括Rachel同Ada...」或者Elven亦需要一個傾訴對像去講出現在自己的古怪現像。
 




「好~」
 
「其實唔知點解由我第一眼見Rachel開始,我就有種好特別好熟悉的感覺,好似我之前已經識左佢好耐咁,而且仲好似有一種好特別的感情... 而隨著大家越來越熟絡,同佢相處果種舒服同自然,更加係之前從未同第二個人試過... 所以你講得岩,對佢我係真係有種特別的感覺,解釋唔到點解...」
 
Susan聽完後很驚訝,甚至她真的開始相信這世上是有前世今生,Rachel有這感覺可以是巧合,但若果連Elven也有相同感覺,那唯一能解釋得就只有他們二人真的有某種關連存在,不過這實在太匪夷所思...
 
「所以你鍾意佢?」Susan問道。
 
「唔係... 只係有種特別好感啫。係鍾意我就唔會幫Daniel手啦,而且我仲好鍾意Ada架。不過我都唔知點解見到佢地一齊個心就好似好唔舒服咁... 有時我覺得我好似有另一個人格... 有D負面感情係由佢而黎...」Elven還想起那次在英國對Ada所做的失常行為。
 
「你越講越恐怖咁... 駛唔駛睇下醫生?」若果是早兩星期Rachel還沒有和Daniel一齊,Susan或許會把Rachel的感受和心意告訴Elven,作個猛烈助攻,但現在既然Rachel已經有Daniel,Ada又因為Elven而回來香港,那她實在不應該再節外生枝。而且她相信若果命運真的要把兩人連在一齊,那將來必定會有某個契機出現,而她現在只需食住花生靜待那刻的來臨便可。
 
「哈哈,我講下笑啫~」Elven自己也覺得有點可怕,所以決定說笑帶過,以免造成不安。
 
「咦,你衣家面色好返好多好似無晒事喇喎?」Susan發現Elven已完全回復正常。




 
Elven:「嗯,感覺無晒事喇~」
 
「果然係眼不見就無事~」Susan調笑Elven道。
 
「唔好再講我喇,不如講下你啦~ 衣家有幾多追求者呀?」Elven決定轉移話題。
 
「唔話你聽~」Susan怎會好意思把這些事告訴自己夢中情人。
 
「其實我一直好好奇,以你條件點解會一直無拍拖? 係咪你要求太高呀?」Elven乘勢問道。
 
「你覺得我條件好好?」Elven的說話讓Susan有少少開心。
 
「好呀,靚女性格又爽朗~ 應該好多男仔鍾意衣type架喎。」Elven坦白說出自己對Susan的觀感。
 




「咁點解果陣你又鍾意Ada唔鍾意我?」Susan問出咁多年來一直想問的問題。
 
「呀...因為我第一眼係見到Ada先囉...」Elven終於明白甚麼是搬石頭砸自己的腳...
 
「即係如果你係見到我先就會追我?」Susan不放過機會繼續追問。
 
「無發生我又點答你呢...」Elven真的不知該如何作答。
 
「算啦,係你眼中得Ada同Rachel,點會有我呀...」Susan細細聲自嘲道。
 
「唔好諗咁多啦,我可以肯定你對好多男仔都有吸引力,你睇果陣阿Paul幾迷戀你呀~」Elven再努力轉移視線。
 
(係囉...如果果陣唔係因為你接受左阿Paul,唔知衣家會點呢?) Susan心裏又默默在想。
 
 




回到hall後,Elven繼續思考著為何自己有那樣古怪的感覺。
 
(會唔會以後唔再返教會好D呢? 次次見到佢地都唔舒服,遲早穿煲架喎... 嗯,為左唔好比自己諗咁多野,或者我都應該要搵D寄託,下定決心為hall同自己做返D想做好耐嘅野喇...)
 
Elven開始思考如何籌備和組建在原本世界曾經是他一切的三隊球隊。作為一間男hall,沒有Sports Teams實在太不像話。他很想為hall建立更多屬於自己的文化和價值。
 

“召人
 
游水隊
籃球隊
足球隊
 
作為男人,有手有腳的你仲諗D咩?
快D加入一齊稱霸Inter-Hall啦!”
 

很快,一張Poster便被貼在hall門口的報告欄上。