「今晚想食咩呀?」第二天上堂時Elven發了個SMS給Rachel。
 
「你請你話事啦, 而且你熟哩頭先知有咩好嘢食㗎嘛~」隔了不到十分鐘便收到Rachel的回覆。
 
「咁7點你hall樓下等?」
 
「好~」
 
 
七點


 
正當Elven在L-Hall門口等著,他才突然醒起好像自從上次教會見到Rachel和Daniel拖手後便再沒有見過她,直至昨晚才再在巴士站和她遠遠相見,想著想著Rachel的樣貌便出現在他眼前。
 
個多月沒見,Rachel好像變得更明豔動人,大概是因為得到愛情的滋潤吧。
 
「Hi,好耐無見~」Rachel率先打招呼。
 
「都唔係好耐啫。」Elven遞高手回應道。
 
Rachel:「個幾月喇,好似係識咗你咁耐以嚟最長嘅一次...」


 
「哈,都話你掛住我㗎啦~」Elven笑著說。
 
「係喇係喇,好掛住你,得未? 快啲帶我去食好嘢啦~」Rachel沒Elven好氣道。
 
Elven:「Okok,let’s go~」
 
兩人開始慢慢走落西環。
 
「今日點呀,第一日返學,有咩感覺呀?」很快Elven便問。


 
「都幾新鮮呀,第一次唔係喺班房而係喺咁大個lecture theatre上堂。好彩之前O-Camp都識咗部份同學仔,未至於一個人太悶~ 不過大科都幾多人一齊上堂,所以仍然有好多人都係唔認識。」Rachel帶點興奮說道。
 
「咁多唔多靚仔同學呀?」Elven試探性地問。
 
「咁又無留意喎…」Rachel當然油鹽不進。
 
「哈哈,扮咩嘢呀,放心我唔會話比Daniel聽㗎喎~」Elven繼續發功。
 
「唔關事囉…」Rachel繼續懶理。
 
「都難怪嘅,本身Daniel都已經咁高質,好難有比佢更好嘅~ 咁同佢一齊點呀,佢對你應該好好啦?」Elven改變話題道。
 
Rachel:「都幾好呀,不過做咗好朋友咁耐突然關係轉變咗,其實仲係有啲唔習慣… 有時又覺得好似同以前無咩分別咁。」
 


Elven:「正正因為認識咗咁耐大家都好了解大家,所以理論上應該少咗好多相處問題呀,唔係應該做唔到咁耐好朋友~除非有啲隱藏性格要真係一齊先知啦... 」
 
Rachel:「唔知呀,大家都第一次拍拖,比較唔到~」
 
「不過我覺得你係果啲一決定咗同嗰個人一齊就會完全比人食住嗰啲,衰啲講,受到咩委屈都係自己默默承受完全唔會諗分手嗰啲…」Elven突然隨心說出自己的直覺。
 
「嗯…又唔可以完全咁講嘅,不過我估係真係要去到一個我好忍受唔到嘅位囉…」Rachel想了想後答道。
 
聽到這裏,Elven突然停了下來。
 
「做咩突然停低?」Rachel發覺Elven停低後轉身面向他問道。
 
Elven望著Rachel,隔了一會突然雙手放上Rachel的膊頭上然後很認真開口說道:
 
「你可唔可以應承我一樣嘢?」


 
「咩?」Rachel不明白Elven為甚麼突然變得一臉認真。
 
「應承我如果有一日Daniel對你唔好或者令你受咗咩委屈,你一定要同我講,唔好自己收埋一個人受,可唔可以?」
 
望著Elven深情的眼睛,這刻Rachel發覺自己的心臟突然跳得很快很緊張。
 
「點解?」好不容易Rachel艱難地問出這兩個字。
 
「因為我一定要確保你係過得開心同幸福。」沒經任何思考Elven強而有力地答道。
 
「車, 你又唔係我邊個…而且就算我唔開心你又可以做啲咩啫…」Elven深情的說話讓Rachel滿臉通紅低下頭細聲說道。
 
「我…會係你最強後盾,永遠都會喺你背後默默保護你唔比你受到任何傷害嘅…好朋友。」
 


雖然不知為甚麼聽到最後三個字Rachel感覺到有點失望,但從Elven的眼神和語氣,Rachel感受到他是認真而不是說笑,她感受到對方是真的很著緊和在乎自己。
 
「點解你要對我咁好?」Rachel鼓起勇氣抬起頭望著Elven問道。
 
「因為…」這時Elven放開了搭在Rachel膊頭上的手擰轉了頭繼續向前行,但在走了兩步後他又突然擰回過來回復回之前原本的眼神笑笑口地對Rachel繼續說道:
 
「係我促成咗你同Daniel㗎嘛,佢如果對你唔好我當然要負責任啦~」
 
霎時間Rachel感覺到Elven變回了一分鐘前調皮的Elven,內心驟然有點失落,但同時間又感覺到一絲暖意和歡喜。
 
「你係至好講呀~ 記住你今日講過嘅嘢!」說完Rachel加快腳步走回到Elven旁邊和他繼續一齊行。
 
這時因天已黑,在街燈下,Rachel看見地上屬於Elven和自己的兩個倒影,因兩人這時貼得有點近,所以兩個倒影就像很親密的樣子倚靠在一起。Rachel突然很想記低這畫面,於是拿出電話對著兩個倒影偷偷拍了一張照片。
 
 


不知不覺,終於來到西環海傍附近一間西式餐廳。
 
「咁有無idea喺大學或者hall 會join 啲咩呀?」各自點了餐後Elven問道。
 
Rachel:「都未呀,仲觀望緊,hall應該實會搵team join下,但其他就未知了。大學係咪應該都要搵庄上吓?」
 
Elven:「大學五件事,你都已經做咗三件,唔駛急嘅,慢慢再睇下點先都未遲~ 諗清楚自己哩幾年想要啲咩先係最重要呀。」
 
Rachel:「嗯...咁你呢?搵到最想要嘅嘢未?攪team攪成點呀?」
 
Elven:「都算ok嘅,係人數仲差啲,睇埋嚟緊啲 freshmen多唔多人入啦。可能會同hall committee傾要所有hallmate強制搵啲嘢參加,始終住得喺度應該每個人都要肯付出大家bonding先會強。」
 
Rachel:「加油呀! 我諗我都可能會join hall嘅籃球隊,想做返下運動同埋睇電視哩啲 sport teams成日好似好熱血咁~」
 
「你有打籃球?」Elven有點驚訝。
 
Rachel:「睇唔出呢? 我以前係校隊嚟㗎! 不過中五會考開始停咗就無再打咋嘛~」
 
Elven:「真係失覺晒! 咁第日我地可以砌磋下喎!」
 
「好呀,驚你呀?」Rachel笑著說。
 
Elven:「唔驚就好,至怕你驚!」
 
Rachel:「低能! 係喎,咁你同Ada又點? 返咗嚟後感情係咪更進一步?」
 
Elven:「ok la,其實除咗佢返嚟後一開始嗰個星期之後都唔太見得多,前排真係太多嘢忙喇...」
 
Rachel:「咁你今日做咩得閒搵我唔搵佢?」
 
「知你掛住我嘛咪見你先囉...」Elven裝作一臉委屈。
 
「你去死啦! 掛你個死人頭!」Rachel表面責罵,但實質笑得很開心。
 
Elven:「講笑啫,知你心入面無我位置㗎喇...佢今日約咗佢roommate去買嘢呀~」
 
「又唔係完全無嘅,唔好咁睇低自己,都有咁多㗎~」Rachel舉起了手,姆指和食指拉開了不足半cm的距離。
 
Elven沒好氣只能笑而不語。
 
「咁你見過佢roommate未?」很快Rachel又問道。
 
「見過一次,係一個好靚嘅女仔」Elven一邊回想一邊答道。
 
「有幾靚?」Rachel好奇。
 
「如果你係咁多分」Elven的手指和食指拉開了3cm左右的距離。
 
「咁佢就係咁多分~」接著Elven索性用兩隻手拉開了一整米的距離。
 
「黃天佑!」Rachel不忿氣裝作生氣。
 
「哈哈,講笑講笑,你唔只咁少分,應該係咁先啱~」這次Elven兩隻手指拉開了5cm的距離...
 
晚飯就在二人打打鬧鬧輕鬆的氣氛下完結。
 
 
當晚回到hall沖完涼後,Elven發覺Rachel send 了一張相片給他,相中是兩個人的倒影。
 
「哩張相係我今晚襯你唔為意果陣偷影㗎,你要好好保存,因為佢要負責提醒你今晚應承過我啲咩㗎~ 」
 
望著相中的兩個影和這個message,Elven的心感覺到一陣甜絲絲的感覺。
 
「我當然會記得,你都要記得今晚應承過我啲咩呀~」