「你地啲男人真係好衰呀!阿Yan好可憐…」事情發生後Ada花了很多時間陪伴阿Yan所以變相少了很多時間和Elven一起,直至過了差不多一個月阿Yan情況好轉二人才多回時間見面,不過一見面Ada就向Elven發動攻擊。
 
「咁又唔係個個男人係咁嘅,有啲女人都一樣好衰成日比帽男朋友戴㗎…」Elven為天下男仕平反。
 
「男同女受嘅傷害又點同呢…」但Ada不同意。
 
「有咩唔同?不過睇返成件事,我相信嗰個阿東其實一早有第二個啦… 吊住阿Yan咁耐應該都真係純粹為咗想食佢,最後見咁耐都唔得為咗唔再晒時間就索性落重本一擊即中…」Elven分析道。
 
「你仲話你地啲男人唔衰? 最賤係得唔到就走去落藥! 唔係阿Yan唔肯真係想叫佢去報警拉咗個粉腸呀!」Ada破口大罵。
 


Elven:「咁阿Yan都有佢concern唔想攪大件事嘅… 反而我覺得你真係要好好睇住佢留意佢行為同思想上有無咩變化…」
 
「咩意思?」Ada不太明白。
 
「始終佢比最信任嘅人出賣咗,以後可能都唔會再信任愛情,因而可能有會啲思想或行為上嘅改變都唔定…」Elven繼續分析。
 
Ada:「會有咩改變?」
 
Elven:「唔知㗎…可能會變lesbian,可能會變成一個唔再相信愛情嘅player,當然亦可能咩變化都無, 所以好好留意下佢啦。」
 


「嗯… 我暫時觀察又好似無乜特別,見佢都開始同返男仔傾偈有講有笑,希望無事啦,點解哩啲嘢你知得咁清楚㗎?」Ada好奇。
 
「有時睇下啲網上小說講的…」Elven帶點不好意思說道。
 
Ada: 「…」
 
覺得Elven是豬UP多,Ada很快便沒有把Elven的說話放在心上。
 
 
時間又慢慢流轉,過了數星期後Jacky又直入Elven房間大叫


 
「Team captain,有嘢搵你幫手呀!」
 
Elven: 「有咩幫到你呀大佬?」
 
Jacky: 「我諗住action喇, 小弟出唔出到pool就睇你喇!」
 
「終於肯行動喇? 幾驚你攤到涷晒呀。」Elven:笑著說。
 
計劃和原本世界一樣,Elven的任務就是把鮮花在適當時間送到適當地方,當然Elven亦像原本世界一樣把Jacky的計劃告訴了Rachel。
 
計劃當天,Elven和Rachel在hall樓下碰面。
 
「送比你呀!」Elven一樣下意式將手中的鮮花遞給Rachel,打算作弄一下她。
 


Rachel愕然了一下,然後臉帶點紅說道:「哩紮花都唔係比我嘅,下次唔該你有誠意啲送紮真嘅比我囉~」
 
「哈哈,你都幾唔知醜㗎喎,好呀,如果有日Daniel唔介意我送花比你咁我送紥真嘅比你囉~」Elven笑著說。
 
「佢? 佢咁耐都未送過花比我喎… 唔好講佢喇,我地快啲行啦,一陣遲咗就大鑊喇~」提起Daniel,Rachel面色變得有點暗淡,但很快又回復正常。
 
二人把花放好後又躲到前一世界同一座building觀看事態發展,不久便看見Jacky 和Annie 到達並坐在椅子上。又過了一會Jacky突然從椅後拿了束花出來表白,同一時間Rachel再次因緊張捉實了Elven的手,不過不同於另一世界,這次Elven把自己的手亦輕輕放到Rachel的手背上,示意她不用緊張。
 
手背的觸感讓Rachel意識到自己的失態,理智上她知道應該要把自己的手收回,但感性上她又有點留戀Elven手心傳來的溫度,還在猶豫間Jacky已經吻上了Annie的嘴唇,搶回了Rachel的focus。
 
過了一會當二人唇分,Elven和Rachel亦回神過來,不過當Rachel想鬆手的時候,Elven卻捉實了Rachel的手不讓她鬆開。
 
「話我聽你同Daniel係咪有咩事發生咗?」Elven望著Rachel問道。
 
「無咩呀…」Rachel有點言不由衷。


 
「真係? 你記唔記得你應承過我啲咩㗎?」Elven再問。
 
「記得呀,不過真係無咩特別嘢喎…」Rachel再答。
 
「咁好啦,你記得就得喇…」同時間Elven放開了Rachel的手。
 
「Yeah~ Mission completed! Give me five~」Rachel立即轉移話題並伸出了手想和Elven擊掌。
 
「由我地出手嗰一刻,哩個結局就早已預定㗎啦~」Elven佷有型地說出了一句台詞,然後輕輕拍了一拍Rachel的手完成擊掌。
 
「無錯,呵呵~」
 
「我地去食個快糖水慶祝然後返去聽故仔咯~」
 


 
 
這晚Rachel聽完Annie分享她的故事後,臨睡前躺在床上想起早一晚和Susan晚飯時的情境。
 
「嘩,依家每次見你都好似比之前更容光煥發咁,愛情嘅魔力真係大~」Rachel見到Susan後讚嘆道。
 
Susan:「車,初初你同Daniel一齊嗰陣咪又係咁,我嗰陣夠羨慕咯~不過近排你好似有啲失色喎…」
 
「唔好講佢住喇,叫嘢食先啦~」Rachel巧妙地迴避。
 
但閒談了一會,Susan再次問道
 
「點呀,你同Daniel係咪有咩問題發生呀?」
 
Rachel:「又唔係有咩問題嘅…」


 
Susan:「你咁嘅語氣即係有啲嘢唔妥啦,講比姐姐聽等姐姐幫下你~」
 
「唔… 咁你話我聽你同Simon依家去到咩階段先?」Rachel突然話題一轉。
 
「下?都係普通攬攬錫錫咋…雖然我以前成日發姣咁,但你知我都唔係咁隨便㗎,而且 同佢一齊都係幾個月咋嘛…」Susan帶點愕然答。
 
「咁你有無諗過幾時會更進一步?」Rachel續問。
 
「又無特別諗喎…順其自然啦,都要啱feel同埋覺得自己ready先得嘅~做咩咁問? 莫非Daniel有要求?」Susan好奇。
 
「又唔係… 不過近幾次錫錫下佢突然伸隻手入我件衫入面都比我stop咗,我見佢臉上有啲失望啫… 同埋自從佢入咗大學後我覺得大家少嘢講咗,同初初一齊感覺有啲唔同咗…」Rachel帶點尷尬地說。
 
「咁哩個應該係兩個問題嚟喎… 一個係親熱程度,一個係真係你地相處問題。你地一齊都超過一年啦,你覺得自己仲未ok?」Susan問。
 
Rachel:「唔想咁快呀…同埋近排大家距離好似遠咗咁就更加唔想…」
 
「第一個問題我估問題不大嘅,雖然Daniel可能想要,但我又覺得佢唔會因為哩樣嘢而介意或者對你變差,反而第二個問題嚴重性大啲,有無同佢傾過?」Susan分析道。
 
Rachel:「未呀,暫時又唔係話同以前分別好大,不過有啲咁嘅感覺啫... 同埋心底裏其實我係信佢唔會對我唔住,但唔知點解潛意式好似又有個感覺叫我唔好咁信佢要睇緊啲佢…」
 
「又嚟? 你近排咁多特別感覺嘅… 你會唔會有妄想症呀?」Susan摸了一摸Rachel額頭說道。
 
「痴線!」Rachel抗議。
 
Susan:「講笑啫~ 不過有時女人啲直覺好準㗎…  雖然我都覺得Daniel唔會,但你自己小心啲啦。」
 
這時Rachel又想起Elven剛剛捉著自己手問關於Daniel和自己問題時的情境。
 
 
(對唔住,應承過你嘅嘢做唔到… 不過哩啲問題又點好意思同你講呢…)