這天是Interhall-Aquatics Meet,由於要一班業餘軍游贏U-Team是不可能的任務,所以Elven的C-Hall只能像原本世界一樣屈居第三,幸好在最後的接力賽亦一樣仍能保持奪得一面銅牌。
 
而有一點和上世不同的是Ada今天坐上了C-hall的觀眾席。看著Elven 在水上的英姿,Ada不期然想起中學時的水運會,那時的Elven差不多橫掃學校所有獎項,風頭一時無兩,因此不知俘虜了多少女同學的心,但那時的他卻唯獨看上了自己,想到這處Ada的嘴角亦不自覺微微向上揚。不過那麼多年前的事,感覺已經有點遙遠… 而今天的Elven只能在八強位置苦戰,他的心情亦明顯不是太好…
 
「唔緊要啦…你都盡左力咯,比賽啫,總係有輸有贏架啦~」Ada一場來到,比賽後Elven和她在西環吃晚飯。
 
「雖然係預左,不過始終花左年幾心機係入面,見到好多隊友最後都係拎唔到standard,點都有D失落同埋替佢地難過…」Elven苦笑著說道。
 
「我相信佢地點都有佢地嘅得著嘅~就算無standard,至少佢地游水應該都比以前快左好多!」Ada繼續鼓勵Elven。
 




「都係嘅,多謝你今日專程黎睇呀~」看著Ada一臉關心,Elven還是打起精神和Ada說話。
 
這晚Ada本身想留低過夜陪伴Elven ,不過Elven以太累和想自己靜靜為由勸服Ada回家。回到hall躺在床上,Elven又想起今日一幕又一幕的畫面,內心充滿著惋惜和不甘心。想著想著,電話突然震了一震,是Rachel的SMS。
 
「知你今晚實唔開心… 不過你自己都講過練一兩年水係無咩可能游得過人地練左十幾年嘅U-team,所以你今日做嘅achievement已經係好犀利!唔好忘記今日宣佈你地拎第三果陣全場嘅掌聲,我相信佢地係真心欣賞同敬佩你地果種精神~另外我想講你聽你今日游水真係好型呀! 雖然你未必係最快果個,但我感受到你係真係作為隊長帶住一條team,而其他隊只係個別選手組成的一個團體。唔開心埋今晚好喇,黎緊仲有兩條teams等你帶領架!」
 
「哈哈,多謝你! 放心啦,我其實都係為D隊友唔開心多過自己…始終好多努力左咁耐最後standard都拎唔到好似白廢晒之前d血汗咁… 不過比賽從來都係咁現實嘅…」Elven回覆。
 
「我相信佢地失望最主要係因為覺得辜負左你嘅努力同期望, 佢地自己最清楚你到底花左幾多時間係佢地身上… 如果你唔駛理佢地淨係理你自己,個人項目你可能都可以拎到三甲啦… 所以佢地都係同你一樣唔係為自己而係為對方唔開心。唔好咁執著啦,問下自己明知結果係咁你初初會唔會就唔去做? 仲會嘅咁咪即係代表你都覺得唔係完全無得著囉。除左結果,仲有好多嘅野值得去treasure,例如你同隊友的感情,共同經歷等等…」Rachel繼續安慰Elven。
 




「嘩… 你突然間咁識安慰人嘅? 聽完你講我真係無晒事咁喎!」確實Rachel的安慰對Elven起到了作用。這刻彷佛自己和Rachel好像調轉了大家慣常的角色。
 
「哈哈! 係你成日睇少我咋嘛~」其實Rachel也不知道自己為甚麼突然咁識講道理,有點感覺係另一個意識透過自己把口去講咁。
 
「真係以後都唔可以再睇少你呀下~anyway,多謝! 就快到你喇,你都要加油呀!」Elven變回正面Elven。
 
「我其實有D緊張…  因為本身year 3個PG會去exchange,所以我好大打機會係正選…」說起自己Rachel也變回原本的自己。
 
「打正選咪好囉! 唔通想打後備咩? 唔駛緊張喎,比D信心自己! 而且就算你對自己無信心都應該對我有信心啦,話晒比我秘密訓練左你差唔多一年!」Elven完全回復了自己的本色。
 




Rachel:「又好似係喎…哈哈…」
 
Elven:「比心機啦,果日想唔想我黎睇你呀?」
 
Rachel:「想呀!」
 
Elven:「不過我都要睇下得唔得閒先…」
 
Rachel:「...」
 


很多時候,信心和實力是互相掛勾。當你實力越高,信心自然越黎越大。在原本的世界,因為緊張的關係L-hall雖然對手不強,但在比賽一開始是處於劣勢,直至Elven出現Rachel打回水準才刺激了全隊士氣最後反勝。不過在今世,由於Rachel的實力得到大幅度提升,所以L-hall在一開始雖然仍有點緊張,但隨著一球又一球的得分,很快大家都投入了比賽並打出應有水準。Elven到場的時候,L-hall已經領先15-5。而當Rachel偶爾看見Elven出現在觀眾席時,臉上對他展露了一個甜甜的微笑,然後表現得更加落力和投入,彷佛要告訴Elven他這年的努力並沒有白廢。最後L-hall輕取對手60-25贏下第一仗,Rachel的表現絕對令人眼前一亮。
 
「今日勁喎! 越黎越有大將之風喇你~」這晚Elven MSN Rachel。




 
「因為有你衣個師傅嘛~」Rachel很快回覆。
 
「睇得出背後最重要個原因,資質果然唔錯,為師好開心~」Elven繼續Elven style。
 
Rachel:「哈哈,你真係好低能呀~」
 
「咁講返正經啦,你衣家實力其實無咩問題架喇,我都無咩可以再教你,只係擔心你精神同心理質素層面啫,假設打緊逆境波又或者面對係類似最後一射的壓力等等,你覺得自己可唔可以發揮返正常水準?」Elven突然轉回認真mode。
 
Rachel:「我估唔得...咁精神層面上可以點練? 係咪好似漫畫咁搵D比賽專登落後好多然後比壓力自己要追返?」
 
Elven:「你睇得漫畫太多喇...雖然我覺得都係有用,問題係係咪真係要搵咁重要嘅比賽黎較飛?追唔返就真係無架喇喎... 所以係有用但又好risky… 衣樣野其實我覺得係睇天生同經驗, 有D人真係天生大賽球員,但有D又真係好易緊張影響表現。不過隨住比賽經驗越多,影響應該越細嘅,始終中間實有D比賽係逆境或者面對壓力,每過一次都會升一個lv咁。所以衣方面會隨著經驗成長,當然自己信心都好重要啦。」
 
Rachel:「所以我仲有好多野要跟你學架,唔好唔要我呀...」
 




Elven:「首先我自己都唔係特別叻,其次我都未諗到點幫你...」
 
Rachel:「我唔理! 你點都要幫我呀師傅大人....」
 
「咁無論點我都唔會唔理你嘅....」Elven由心而發。
 
Rachel:「所以話你對我係最好架!」
 
Elven:「咁大頂高帽呀... 論對你好我實唔及Daniel啦~」
 
Rachel:「其實本身都想同你講,近排我地都有d問題... 不過今日唔想掃興喇,遲D有機會先講你聽啦~」
 
「哦... 好啦,你好好enjoy開心下先啦咁~」雖然Elven很想知發生甚麼事,但亦確實不想破壞Rachel原本美好的心情,所以並沒有追問。
 





不過要發生的問題終會發生,一星期後的一晚...