[愛情] 心連心 (粵語): 10. 第十九日 (結局)

返到香港，隔日就約咗子恩出嚟。 

喺餐廳，佢見住我好開心咁食緊雞翼：「你真係唔驚食肥㗎？唔好唔記得原本係我㗎噃。」 

我笑笑口咁講笑：「妳肯要我咪得囉。」其實有少少暗示。 

佢望住我，突然冇出聲。 

我捉住佢隻手：「我咪講過我由台灣返嚟有嘢同妳講嘅。」 





佢雙眼裡面充滿信心：「我知你想講咩。」 

佢講：「自從同你交換咗身體之後，我生活喺你嘅圈子，經過咗哩二十日，我遇到唔少事。」 

我俾佢講，佢繼續：「我開始鍾意上哩個身體，但係我唔知係咪因為係同你換身體嘅關係，我係無時無刻都掛住你。其實我有試過去留意身邊其他女仔，我都係當佢哋係朋友，係唔會諗同佢哋有再進一步嘅嘢。同埋，你去咗台灣其間，我發咗個夢，你係喊緊，我攬住咗你，我同你講，我會承擔你嘅一切。我覺得我哋嘅命運相連咗嘅同時，我都控制唔到自己，我鍾意咗你。」 

我知道，個夢我以為係都係我一個人，原來佢都有夢到。 

唔通，就如佢所講，我哋兩個已經連埋咗？ 





佢問：「你喺台灣冇發生咩事？」

我心諗，係咪可以同佢講，我遇到佢前男友嘅事。 

都係唔講，我都係將哩樣嘢活埋：「冇呀，我同啫喱佢哋不知玩到幾癲。」 

佢笑：「佢哋不嬲都係玩起上嚟都癲癲地㗎啦。」 

我笑埋一份：「佢哋真係好好，我好鍾意佢哋。」 





子恩話：「你要好好珍惜佢哋。」 

我點頭：「當然啦。」 

我一直冇回應佢鍾意我嘅事，我始終要同佢講：「係呢，你話鍾意我，你有冇諗過我會點諗㗎？」 

佢其實隻手一直拖住我隻手：「你講啦。」 

我開始講：「喺哩段時間裡面，其實我都同妳一樣經歷咗唔少事，我都開始鍾意上哩個身體。雖然換返身體係比較好，但係我開始鍾意上妳嘅世界，我唔介意就算換唔到返嚟，我會接承你嘅一切。」 

我雙手捉住佢隻手：「我都鍾意咗妳。」 

佢笑得好溫柔：「我知道，我一直等緊你哩句。」 

我竟然變得容易喊，唔知點解我流出眼淚。 





佢用手抺走我嘅眼淚：「傻豬，開心嘢嚟㗎嘛，喊咩呀？」 

我笑：「係囉，我真係傻。」 

我心諗，由換咗身體之後，其實我哋一開始已經註定咗嘅我哋個命運，只係我哋哩個時間先理解到我哋係身心連埋咗一齊，而唔係換。 

我哋食埋個飯，出咗餐廳，我望住佢，佢伸出手拖住我。 

好溫暖，我個心好似同佢連埋咗一齊。 

我哋兩個人冇講任何嘢，一直行到戲院。 

係，就係哩間戲院，令開始咗我第二個生活。 





每次同子恩出嚟，係無論點都會哩度睇戲，咩戲都好，係因為唔知會唔會換番返原本嘅身體。 

咁啱上映嘅係一套愛情戲，有冇咁啱呀，啱啱先同子恩一齊，就嚟睇。 

佢望一望我，我笑一笑，拉住佢隻手去買飛。 

套戲描寫男女主角經歷好多事情之後，雖然最後係一齊左，但係編劇係都唔俾佢哋最好嘅結果，要差唔經歷埋生離死別先完，係都要人喊，係要觀眾睇到喊嘅。 

子恩佢？佢同我一齊喊囉。 

睇完戲，我哋拖住手走出戲院，突如期來眼前閃咗一下。 

當我哋可以再睇返嘢嘅時候，我發覺咗身邊嘅係子恩，係女仔嘅子恩。 

佢望一望我，佢係突然之間喊咗出嚟。 





我冇講任何嘢，攬住佢。 

佢喊住講：「點解你要承受我咁多嘢？」 

睇嚟佢知道咗喺台灣發生嘅嘢。 

佢好快咁控制返情緒：「你真係，傻豬嚟嘅，發生咁大件事，自己一個承受晒，仲唔同我講。」 

我繼續攬住佢：「我想保護妳，唔想俾妳再受傷。」 

佢一直望住我：「我值得咩？」 

我唔想放開佢：「值得，因為，妳即係我，我即係妳。」 





我哋相擁咗一陣，終於佢停咗冇喊：「太好啦，我哋竟然可以換返身體番嚟。」 

我話：「其實我都莫明奇妙，我哋每次都有睇戲啫。」 

呀，我估到少少。 

佢舉起我哋拖住嘅手：「哩次唔同。」 

係，一定係，因為我哋個心連埋咗一齊。 

我哋互望咗一下，頭靠頭，互相感受對方。 

我哋好自然，嘴脣相碰，去感受對方嘅愛意。 



[全文完]