她趴在我的背上,

頭則貼著我的頭,

近得連她的呼吸聲我都聽得一清二楚,


 雙手「橋」著我的頸,

我則用雙手提著她的兩隻腳,




 然後便開始起行,踏上歸家之路。 

「你係咪真係得㗎?我唔輕㗎喎。」啊童害怕得雙臂緊緊箍著我的頸。

 「鬆...鬆開啲隻手,我就嚟窒息啦。」我困難地說。

 「唔好意思。」啊童尷尬地道歉。

 「你信我啦,話晒我假假地都係羽毛球隊既成員,平時又打開籃球,體能同力氣都有返咁上下既。」我自信滿滿地說。



 「你辛唔辛苦啊?你辛苦可以放返我落嚟㗎喎。」過了一會後,她又再在我耳邊問。

 「辛咩苦啫,又有得抽水啦我,不知幾開心。」我回頭奸笑著對她說。 

「仲識講笑啫係唔辛苦啦。」啊童打了我頭一下。 

「喂...痛...我好心孭你返去仲要比你打。」我抱怨。 

「邊個叫你成日𥄫我又借啲意抽我水啫,死變態。」 



「我會𥄫你即係證明你夠靚夠索囉,我平時都唔𥄫女仔既,淨係𥄫你一個。」我說。 

「即係你認你成日𥄫我啦。哼,我宜家要去報警,話有個咸濕仔一日到黑都係到𥄫我。」

 「你咪報囉,唔好唔記得你宜家就係趴緊係你口中既咸濕仔身上面,仲要係佢耳邊同佢講緊野添,我就睇下你點樣去報警。」我得戚地說。

 「哼,我落嚟自己行過去咪得囉。」 

「小姐,請你唔好忘記,由你上咗嚟我背脊個一刻起,你就已經失去咗你既行動自由,所以我都係勸你乖乖地唔好亂郁,如果唔係,嘿嘿...」

我緊緊地抓著正在掙扎的啊童的雙腿,不讓她下來。


 「放我落嚟啊,放我落嚟啊死變態!」啊童笑著說。 

「我死都唔放開你㗎啦,你死心啦。」我說。



 「我就唔信你呢一世都咁樣孭住我唔放我落嚟。到時你一放低我我即刻跑去報警。」

 「如果你肯既話,我孭你一世又有咩所謂丫。」我很自然地說出。 

「...」 啊童聽到後愣住了,一言不發,

大概在思考著我剛才所說的話,


 我繼續背著啊童向前行,

而啊童則輕輕地的把頭靠著我的頭,


 偶爾,微風輕輕掠過,



把啊童的秀髮吹起,碰到我的臉頰。
 

我多麼的,

多麼的想把時間暫停,

讓我們永遠停留在此刻,


 時間可否不要再向前走,

 就讓我們留在這裏,永不離去。

 但,

在旁駛過的車輛,




在側走過的行人,

 就像在笑我這個想法, 

提醒著我,時間永遠,

都只會向前走,
 

不會停下來,

亦不能後退。


 此刻的我,能做的,就只有珍惜。



 過了良久,啊童深吸了一口氣,開腔問我,

 「其實...你係咪鍾意我。」

 我比這條突如其來的問題嚇倒,身體一震,

 在路上停了下來, 腦中一片空白,

 回頭看著啊童, 在這短短幾秒之間,

心裏反覆思索著應該如何回應她的問題,
 

究竟我應該賭上這段關係,

向她如實相告,自己由看到她第一眼時便喜歡她了,


 抑或是,為了保住我們這段珍貴的關係,

而說謊跟她說自己只視她如密友,好兄弟。


 不知道啊童如果得知我暗戀了她很久後,

會有甚麼反應,
 

究竟是會如我所希望的一樣,接受我, 

還是會因為怕尷尬而自此慢慢疏遠我, 

令我們的關係從此破裂,

再也不能完全修補好,
 

在我們之間,多了一層隔膜。

 我,沒有勇氣去回答這條問題,

 因為我怕,我很怕會失去啊童。

 於是,我便選擇用另一條問題,

去回答這一條問題。


 「點解你會咁問呢。」我裝作沒事地說。 

「講下笑咋!你睇下你吖,塊面青晒,仲停咗落嚟,聲都震埋,做咩啊?你驚呀?定係...」 

聽到她這樣說後,我鬆了一口氣,重新起步向前行。

 「定係咩呀。」驚魂未定的我問。 

「定係...」啊童停了一停,然後把嘴伸到我耳邊, 

「你.比.我.講.中.咗.呀?」

 「緊...緊係唔係啦。」缺乏勇氣的我立即否認。 

「嘻嘻,都唔知係咪真㗎,不過如果你係真係鍾意我呢,就要努力啲啦。」啊童繼續說。 

慢著,啊童這樣說,是不是代表她叫我追求她... 



跪求大家Follow我既IG: MaanYin05 
已有 0 人追稿