是咁的，我同女神做咗鄰居: 187.

「我就唔信你夠膽喺度做！嚟吖，你咪嚟囉，做咩唔過嚟呀？唔敢呀？呵，我實在係太太太了解你啦。」啊童睜大自己的雙眼注視著我。

「哼！我唔係唔夠膽，只係我身為一個奉公守法嘅好公民，我係唔會做出違法嘅事㗎！」

「講咁多嘢咪又係唔夠膽，都話你廢㗎啦。」啊童說。

「我認我廢呀，咁點吖？」

啊童沒好氣地搖了搖頭，然後我們便離開了那間文具店。





我們之後又繼續在街上遊盪，只要有興趣的店舖也會進去逛一下。

去到大約六時，我們便沿著海旁走回家。

「如果你話日日都可以咁行你話幾好吖。」啊童說。

「唓，你日日都可以咁行㗎啦，睇你肯唔肯㗎啫。」

「我意思係同你呀！」





「呢點就有啲難度喎，你知啦，我個人就比較懶嘅，日日都要我咁行嘅話咁咪會攰L死我囉。你都係想有我喺度啫，嚟我屋企打下Overcook咪算囉，再唔係同你出去行街買嘢我都OK㗎。」

「趁有得行好陪我行啦，遲啲想行都冇得你行呀。」

「傻嘅，我Google過你個夜盲症，你至少都要去到五六十歲視力先至會完全衰退，即係變盲，仲要個前題係病情惡化得快咋喎，如果你好彩啲嘅話最多都係視力衰退，應該唔會去到全盲咁慘既。你個『遲啲』冇返十年八載應該都唔會發生，所以我地都仲有時間。」

「緊係唔係...啦。」啊童語氣間帶點失落地說。

「緊咩唔係啫，日日咁行呢，我就應該唔得同冇時間嘅，但係每個星期都陪你咁行都仲OK既，不過去到夏天就盡量唔好啦...怕熱呀哈哈。」





「我唔係呢個意思呀。」啊童急道。

「咁請問係咩意思呢？小弟願洗耳恭聽。」

「啫係我...嘖唉...呃...」

「講啦，咁猶豫做乜啫。除非係啲對我唔...哦！你偷食！你背住我去搵第二個。」我笑說。

啊童反了反白眼，然後拉著我的手在一張長椅上坐下。

「搞咩呀你？唔係返屋企咩？」我不解地問。

「你有冇咁蠢呀，難得出到嚟，緊係要睇埋個日落先㗎啦。」啊童說。

「哦，原來有人想睇橙海，隨你啦咁，反正我又冇嘢做嘅，陪你喺度睇下都冇所謂。」





於是我們便坐在長椅上，靜靜看著那片夕陽美景。

隨著太陽朝地球的另一邊移動，海由原本的藍色，慢慢被照耀成金色，最後再回歸根本，變回黑色。

直至到太陽完全落下，天空隨了西邊還有一點點的餘輝外，抬頭就只見一片漆黑。

「走啦。」我站起身準備回家。

「等等先...我...有啲嘢想同你講。」啊童拉住我不讓我離去。




跪求大家Follow我既IG: MaanYin05